ETAPPE 01
D AHREIS
D AHREIS ISCH CHLI CHAOTISCH GSI. ISCH JA ABER NI Z ERSTE MAU WOS CHAOTISCH ISCH WORDE BIM REISE. SCHINS HETME VOREM ABFLUG MÜESSE IRGENDWELCHI FORMULAR ZWINGEND USFÜUE.. ISCH NO GUET STRESSIG WORDE, HET GHEISSE DAS SI 2 TÄG BEARBEITIGSZIT BRUCHE.
IMMERHIN HEISI MR NERE ES UPGRADE ID BUISSNESSCLASS GÄ. DAHER SI D FLÜG NERE SEHR AHGNÄM GSI.
HIE AHCHO, HANI CHLI SCHISS GHA WAS UF MI WIRD ZUECHO BIM IMMIGRIERE. LUSTIGERWIS HET KEIN SCHWEIN DIE FORMULAR WÖUE GSE. SI HEIMI EIFACH DÜREGWUNKE. VO DEMHER ISCH DR GANZ STRESS FÜRD FÜCHS GSI.
MITEM TAXI BINI NERE VOM FLUGHAFE ZUM HOSTEL GFAHRE. DIE STADT ISCH EIS RISE CHAOS. MEH TAXIS U ROLLER AUS IN HANOI, ÜBERAU MÖNSCHE, ÜBERAU SISI AM TANZE, ES LÄBT ÜBERAU TROTZ DEM CHAOS. WÜRD SÄGE DAS DAS HIE WIE FÜR MI GMACHT ISCH. ES ISCH ZWAR UFE ERST BLICK NI E WAHNSINNIG SCHÖNI STADT, ABER ES LOUFT ÖMU ÖPPIS. DENKE WIRDE HIE OH NI AUT, HAMER IZE MAU 2 NÄCHT IM HOSTEL RESERVIERT, U NERE SÖTS DE SCHO WITER RICHTIG MEDELLIN GA.
IM HOSTEL FRÖHLECH EMFANGE IM SÄCHSERZIMMER VO PAARNE WO OH GAD SI AHCHO, SIMER NERE NO E WELCOMEDRINK GO NÄ U HEI CHI BRICHTET ÜBER ÜSI ( BI MIR NID VORHANDNIGÄ) REISEPLÄN.
DR JETLAG FAHRT IZE ABER SCHO GUET IH, VO DÄMHÄR GUET NACHT!
ETAPPE 02
BOGOTA
NACHERE NACHT MIT SEHR WENI SCHLAF, CHLI SEHR LUT GSI IM HOSTEL BINI BI ZITE UFGSTANGE, ZMÖRGELET U CHLI DÜRS QUARTIER LA CANDELARIA GLOFFE. ISCH FÜR BOGOTA ES RÄCHT HÄRZIGS ABER SEHR TOURISTISCHES QUARTIER.
AM 10NI BINI MIT PAARNE VOM HOSTEL DE LOS UFENE DOCH RÄCHT KRIMINEUI VELOTOUR DÜR GANZ BOGOTA. INSGESAMMT HEIMER 7 STUNG GHA.
KRIMINEU ISCHES NI NUME WÄGEM VILÄ VRCHEHR U SCHWIRIGE STRASSEVRHÄUTNISS GSI, WEME NARCOS GLUEGT HET, ISCH EIM RÄCHT VIU BEKANNT VORCHO. AH VIUNE STEUÄ WOMER SI AHGHAUTET SI BEKANNTI POLITIKER, KOMIKER U KÜNSTELR ERMORDET WORDE. DR NÖI JUSTIZPALAST SIMER OHNO SCHNEU GO AHLUEGE, DÄ ISCH JA VORE PARAMILITÄRISCHE ORGANISATION WÄGEM ESCOBAR AHGRIFFE WORDE, D REGIERIG HET NI LANG ZÖGERET U HET DÄ MIT PANZER AM ÄRDBODE GLICH GMACHT.
ZUMGLÜCK ISCH D TOUR ABER NI NUME VO DÄM PRÄGT GSI. SI MAU NO I CHLI WOUHABENDERI VIERTU U NERE IH CHLI ÄRMERI VIERTU GFAHRE, WOBI DIÄ ÄRMERE DOCH VIU AHSPRÄCHENDER SI.
MIR SI OH AH SEHR VIUNÄ GRAFFITIS AHGHAUTE WOMER CHLI VODR JUNGÄ GSCHICHT VOR STREETART IN BOGOTA HEI DÖRFE ERFHARE. NICE TO KNOW, NUR DANK JUSTIN BIEBER SI GRAFFITIS IZE LEGAU IN BOGOTA.
WITER ISCHES INE KAFFIRÖSTEREI GANGE, WONI MIS ERSTE SEHR GUETE KAFFI HIE HA BECHO. HEI OHNO CHLI I GANZ VRARBEITIGSPROZÄSS CHÖNNE IHNELUEGE.
E SCHOGGIFABRIG ISCH OHNO UFEM PLAN GSI, ISCH ABER IZE NI BSUNGERS GSI.
Z HIGHLIGT VOR TOUR ISCH DR GIGANTISCH FRÜCHTEMARKT GSI. SI DERT AH UNZÄHLIGE PRAU GFÜUTÄ FRUCHT- U GMÜÄSSTÄNG DÜREGLOFFE. NERE HEIMER BI EIM WO E RISIGI USWAU HET GHA DÖRFE AHFA PROBIERE. ES HET AUS GÄ WOMÄ SO KENNT, ABER OH MEGA VIU FRÜCHT, WONI NO NIE HA GHÖRT U GSE. ZUM BISPIU SÜÄSSI GURKE, BOUMTOMATE (OH E SÜÄSSI FRUCHT) U NO SEHR VIU ME. ZUMTEU SISI SEHR SEHR GWÖHNIGSBEDÜRFTIG, VORAUEM D KONSITÄNZ. ABER MUES SÄGÄ MEEEGA FEIN!
ÄS LÄBT HIE ÜBERAU, EXTREM VILI MÖNSCHE SI HIE AM WEEKEND UNGERWÄGS, DAS WUCHENEND SPERÄ SI OH DIE HAUBI STADT AB FÜRE VRCHER WÄGÄMNE GROSSE FESTIVAL. ISCH SCHONO COOL, ABER MI MUES LEIDER GENG UFD HOSÄSECK UFPASSE. ALEI SÖTTMÄ EUE NI HIE UMEHÄR WANDERE.
BOGOTA ISCH FÜR MI NI E STADT, WONI IZE E LÄNGERE UFENTHAUT BRUCHE. ES ISCH SCHWIRIG, HIE Z FUESS DÜR Z ZÜG Z LOUFÄ, DA MÄ RÄCHT SCHNÄU AMNÄ ORT ISCH, WOME LIEBER NI WETT SI. HA MITTLERWILE SCHO PAAR GSCHICHTLI GHÖRT VO LÜT WO Z FUESS UNGERWEGS SI GSI I DEMENTSPRÄCHENDE QUARTIER. SI BIS UFD UNGERHOSE USGROUBT WORDE.
DÜR DAS DASME NI Z FUESS UNGERWEGS ISCH, ISCHES DOCH OH SEHR SCHWÄR, IRGENDWIE SECH CHÖNNE Z ORIENTIERE. AUERIHÖCHSTENS DIE HÖCHE BÄRGÄ HÄUFÄ EIM.
NICHTS DESTO TROTZ ISCHES E SPANNENDI STADT, MITERÄ SEHR BEWEGTE, DOCH OH SEHR GWAUTÄTIGE VRGANGEHEIT WOSI ABER DOCH LANGSAM WEI ABSCHLIÄSSÄ DRMIT U WITER CHO.
FÜR MORN HANI MR ES TICKET BUECHET, DAS HEISST ES GEIT AB UF MEDELLIN!
BIS IZE HIE NUME GUETS GHÖRT VO MEDELLIN, IM VRGLICH ZU BOGOTA, DAHER DENKI DASI DERT MAU ES ZITLI WIRDE BLIBÄ. SCHINS CHAME DERT OH SEHR VIU MEH MACHE. BI GSPANNT!
ETAPPE 03
MEDELLIN
MEDELLIN, KRASSI STADT, SCHO NUR WEME DÜRD HÜGLE HEREFAHRT U ZERSTE MAU DRUF ABE GSEHT. IRGENDWIE NO SCHWIRIG GSI HIE HEIL AHZCHO, CHLI VIU VRSPÄTIG U CHLI VIU CHAOS, ABER HE, MI HET JA ZIT. IMMERHIN DOCH NO IM HOSTEL AHCHO.
WÜRKT SCHO ME WIENES HOSTEL WIEMES KENNT. LOUFT ÖPPIS, VIU LÜT WOME CHA LEHRE KENNE. SO MUESES SI.
UFE ERST BLICK HETME HIE ZUM GLÜCK SO VIU MEH MÜGLECHKEITE, ÖPPIS Z UNGERNÄ. VO NATUR, ÜBER GLEITSCHIRMFLÜGE, AUS UME ESCOBAR UME, GEILS ESSE, TANZKURSE BIS ZU GUETEM USGANG.
GLOUBE HIE SI D MÜGLECHKEITE VIUSITIG, HIE LANIMRS MAU CHLI LA GUET GA. STRESS HANI JA KENE.
MITLERWILE BINI DOCH SCHO DÜR PAAR QUARTIER HIE GLOFFE, MAU NO UFENE MÄRIT U NO CHLI GO IHCHOUFE.
ABER IM GROSSE U GANZE MACHI HÜT E FULÄ TAG. HOUPTSÄCHLECH OH CHLI IM HOSTEL PLEGERE CHLI BÄDLE US EIFACH GMÜETLECH NÄ.
FÜR MORN HANI E STADTTOUR DÜRNE FRÜECHER SEHR BERÜCHTIGTI GÄGEND BUECHET. SÖTT SCHINS MEGA SPANNEND SI. MI ERFAHRT VIU ÜBERD GSCHICHT, ÜBER D PROBLEM U WIE D KUNST, VORAUEM STREETART DEM GANZE ES ÄNDI HET CHÖNNE SETZE.
BI GSPANNT.
Z WÄTTER ISCH ÜBRIGENS IM MOMENT NO SEHR DÜRZOGE. RÄGNE DUETS EIGENTLECH NO JEDE TAG, ABER IMMER NUR FÜRNE CHURZI ZIT. IN MEDELLIN ISCHES OH NI AUZU HEISS, SO DASME DÜRE TAG WES NI RÄGNET GUET IM CHURZERMU CHA UMELOUFE, ABER GÄGE ABE ISCHME DE SCHO FROH FÜRNES JÄGGLI. Z GANZE WIRD SECH SCHINS IM DEZEMBER ZIMLECH SCHNÄU ÄNDERE. AHFANGS DEZEMBER FAHT SCHINS D TROCHÄZIT AH. U SOBAU ME MEH RICHTIG KÜSTE GEIT, WIRDS SCHINS DE UNGLOUBLECH WARM.
ETAPPE 04
BARRIO-TOUR
HÜT BINI UFENE UNGLOUBLECH SPANNENDI TOUR IMNE BARRIO (QUARTIER) GANGE. DERT ISCHES HOUPTSÄCHLECH UMD TRANSFORMATION VO DEM GANZE BARRIO GANGE. DAS QUARTIER BESTEIT US MEHERNE TEILE, DR MARKANTIST PUNKT ISCH E CHLINÄ HÜGU.
MITEM GANZE CHRIEG IDE 60ER JAHR SI IMMER MEH FLÜCHTLINGE VOM LANDESINNERE IDE STÄDT, I DÄMFAU HIE Z MEDELLIN GLANDET. DAHER HET DENN HIE ES FÜRD REGIERIG UNBERÄCHEBARS WACHSTUM VOR BEVÖUKERIG STATTGFUNGE. D MÖNSCHE HEI MEH ODER WENIGER GMACHT WASI WEI, JOBS HETS KENI GÄ, D ARMUT ISCH UNHEIMLECH GROSS GSI.
GANZ AM AHFANG ISCH DR GRÖST TEU VOM QUARTIER FLACH GSI. HET SOGAR E CHLINE SUMPF GHA. IRGENDWENN ISCH D STADT SO GROSS WORDE, DASI NÜMM HEI GWÜSST WOHERE MIT AUEM. UNGERANGEREM MITEM ABFAU. AUSO HEISI UF DÄM SUMPF AHGFANGE DR ABFAU UFZBIGÄ. DAS HET SOMIT IMMER MEH MÖNSCHE AHGLOCKT WO DERT SI BLIBE. DÄ RISIG ABFAUBÄRG HETNE NI NUME E ARBEIT BOTTÄ, SONDERN OH (BÖS GSEIT) NAHRIG GÄ, U ES DAHEI. D BIUDER SI DOCH RÄCHT SCHOKIEREND GSI, MÖNSCH WO IM U USEM ABFAU CHLINI HÜTTLI BOUE, DERT CHOCHE U SCHLAFE,CHINGO DERT SPILÄ. MIT DR ZIT SI SO IMMER MEH MÖNSCHE DERT HERE CHO, SO HETSECH DERT E CHLINI KOMUNE BIUDET. D LÜT SI SOGAR STOUTZ GSI UF DAS, IMMERHIN HEISI SO ES DAHEI BECHO. Z GANZE ISCH NATÜRLECH GAR NI LEGAU GSI, D REGIERIG ISCH EIFACH OH MASSLOS ÜBERFORDERET GSI. IRGENDWENN ISCH DÄ HÜGU DOCH RÄCHT HÖCH WORDE, SO HET D STADT ENTSCHIDE, DR ABFAU NÜMME DERT HERE Z BRINGE. IZE HEI D MÖNSCHE ENDGÜUTIG DÄ HÜGU I BESCHLAG GNO. SI HEI DERT ZERSCH WÄUBLÄCHHÜTTLI SPETER HÜSLI US BACHSTEINE AHFA HÄRÄ BOUE. IRGENGENWENN WO D REGIERIG NERE ENDLECH MAU GNUE KAPAZITÄTÄ HET GHA, HEISI MAU AHFA KONTROLIERE, WÄR DER ÜBERHOUPT WOHNT, WAS DER EIGENTLECH SO ABGEIT. SI HEI OH GUETACHTE LA MACHE MIT VRNICHTENDE ERGÄBNISS...
SI HEI GMERKT DAS DÄ HÜGU, DA ER JA VOU MIT ABFAU ISCH, NI WAHNSINNIG GSUNG ISCH ZUM LÄBÄ. DA KOMPLET JEDI ART VO ABFÄU DERT HÄRÄ BRACHT SI WORDE ISCH DAS GANZE ZIMLECH VRSÜCHT. DIE BÖDE SI ABER VODE LÜT BRUCHT WORDE ZUM SACHE AHPFLANZE.. SO HEISI WENNSCHON ÖPPIS Z ESSE GHA. Z SCHLIMMSTE SI ABER DÜRD VRWÄSIG DIE ENTSTEHENDE GAS GSI, GNAU GSEIT METHAN. DAS HET OH ÖFFTER ZU GRÖSSERE BRÄND DERT GFÜHERT. IRGENDWENN ISCH DR DRUCK FÜRD REGIERIG Z GROSS WORDE U SI HEI MÜESSE HANDLE. AUSO HEISI IMNE ZIMLECHE TEMPO, AM NÄ HANG GANZ WIT OBE AHFA WOHNTÜRM BOUE. DÄ MÖNSCH UFEM HÜGU ISCH NERE AHBOTE WORDE, IHRI HÜTLI Z VRLA, U GRATIS DERT INE WOHNIG IHZIEH. ES TÖNT UFE ERST BLICK NACHEMNE RECHT GUETE DEAL, VORAUEM WES HEISST, DASI SI WOHNIG EIFACH IDE ERSTE 5 JAHR NI DÖRFE WITERVRCHOUFE, GHÖRE DUETSI IHNE.
HIE HET DR GUIDE NERE MIT ZWÖI BIUSPIU AHFA ARGUMENTIERE.
ÖPPER WO VO AHFANG AH ISCH DER GSI, DÄ HET E SCHLECHTÄ GMACHT. US IHRNE BACHSTEIHÜTTLI SI MIT DR ZIT 3 STÖCKIGI HÜSLI WORDE. IM OBERSTE HEI SI GWOHNT, DIE UNGERE ZWÖI HEISI CHÖNNE VRMIETE. DA DAS GANZE NI LEGAU ISCH GSI, HEISI KENI STÜRE UND GEBÜHRE FÜR STROM U WASSER MÜESSE ZAHLE. WEMESE AUSO ZWINGT UMZZIEH, DE VRLIERE SI IHRES IHKOMME U HEI HÖCHERI USGABE, WÜU STÜRE U GEBÜHRE FAUE NATÜRLECH I DENE NÖIE WOHNIGÄ AH.
FÜR ÖPPER WOSECH RECHT SPÄT, ÖPPE IM JAHR 2000 I DENE WOHNIGÄ HET IHGMIETET ISCHES JEDOCH HINGÄGE E SEHR GUETE DEAL GSI. SI HEI NÖI ÖPPIS EIGETS GHA, U DAS EICH GRATIS.
DAHER SI RUND 90% UMZOGE. DIE VRBLIBNIGE 10% HEISECH GWEIGERT, U HEI SECH ZURE GRUPPIERIG FORMIERT.
DIÄ ANGERE QUARTIERTEILE UME HÜGU UME SI ZWAR NI VRSÜCHT GSI, SOMIT OHNI BETROFFE VOR UMSIDLIG, ABER D ARMUT ISCH SEHR GROSS GSI, U SOMIT E DORN IM OUG VOR REGIERIG. SI HEI Z MILITÄR I DIE TEILE GSCHICKT UMD D HÜSLI AM ERDBODE GLICH Z MACHE.
HIE CHÖME DIE LOKALE HEUDÄ IS SPIU. SI SÄGENE WÜRKLECH SO, DA DIE PERSONE DÜR IHRI ARBEIT FÜR D BARRIO VREHRT WÄRDE. ES HET AHGFANGE MITEMNE PRIESTER, WOSECH NI Z SCHAD ISCH GSI, UF DÄM ABFAUBÄRG GO MIT AHZPACKE, U HET DE LÜT SINI BEWUNDERIG USGSPROCHE. DIE MÖNSCHE ARBEITE U CHÖISECH SO SÄUBER VRSORGÄ. ZUDÄM HETER DÄ MÖNSCHE GUUFÄ, DAS D HÜSER VOM MILITÄR NI ABGRISSE WÄRE. DAS MITEMNE EIFACHE TRICK. JEDES HÜSLI HET EIFACH MÜESSE E KOLUMBIANISCHI FAHNE UFHÄNKE. AM NE SOUDAT ISCHES NI GSTATTET, E FAHNE ABZHÄNKE. SOMIT HETME SE IRUE GLA. E ANGERI ISCH D MAMA CHILLA GSI. SI HET IHRES HUS GOPFERET, UM E CHINDERGARTE Z BOUE U HETSECH AB DENN FÜRD MÖNSCHE IHGSEHZT U INE WO OH IMMER SI CHA GHUUFÄ. AU DIE SOGENANNTE HEUDÄ U HEUDINNE, MEHRHEITLECH HEUDINNÄ, DA D MÄNNER AM SCHAFFE SI GSI, U D FROUE D HÜSER BOUE HEI U FÜR LÜT GSORGT HEI, SI OMNIPRÄSENT. IHRES ERBE WIRD AH SEHR VIUNÄ WÄNG MIT ZEICHNIGE VO IHNE DOKUMENTIERT. JEDE IM QUARTIER KENNTSE. MIR SI OH PAAREN WO NO LÄBE, ODER IHRNE NACHKOMME ÜBERE WÄG GLOFFE, U HEI CHÖNNE MITNÄ REDE. ZUM TEU EXTREM SCHOKIERENDI SACHE HEISI Z VRZEUE GHA. HIE GITS NO VIU ZITZÜGE, DA DAS NO GAR NI MAU SO LANG HÄR ISCH.
ES ISCH KRASS, MIT WAS FÜRERÄ CHRAFT SECH DIE LÜT IHSETZE, UNZÄHLIGI MAU, IMMER U IMMER WIDR, GÄGE D REGIERIG, WÜUSI NIX Z STANG BRINGT. DAS ISCH EIFACH ZUM BEWUNDERE! SO LÜT FÄHLE LEIDER ES BIZLI BI ÜS..
WAS DIE AUES ERLÄBT HEI, U WASI ERREICHT HEI ISCH GANZ KRASS.
ÖPPE IM JAHR 2004 HET DR BÜRGERMEISTER US DÄM HÜGU VOU ABFAU, WO ZUEDECKT ISCH MIT HÜSERRUINE, ÄNDGÜLTIG WOUE ABSCHLIESSE. D BEWOHNER HEISECH NERE ZUR WEHR GSETZT. DIE NÖIBOUTE WOHNTÜRM SI ZWAR GUET U RECHT. ABER ES BRUCHT E SYMBOLISCHE AKT, E NÖIAHFANG FÜR DIE MÖNSCHE. IR STADT HETME DENE LÜT ZWÖI NÄMÄ GÄ, ÜBERSETZ HETMENE "MÖNSCHE VOM ABFAU" ODER "MÖNSCHE US ABFAU" GSEIT...
KLAR HEISI DÄM BIUD OH WÖUE ENTGÄGEWÜRKE.
SOMIT HET E GRUPPE US BARRIO-LEADERINNÄ ES PROJKET VORGSCHLAGÄ. DR HÜGU KOMPLETT BEGRÜENÄ, ES GWÄCHSHUS OBE DRUF Z BOUE, U D REGIERIG SÖU DE MÖNSCHE DERT D USBIUDIG ZAHLE, DASI DIE GANZE PLANTAGE CHÖI BEWIRTSCHAFTE U SO IM GLICHE ZUG WIDR E JOB HEI. Z GANZE NATÜRLECH SO, DAS D PFLANZE NI MITEM BODE I KONTAKT CHÖME.
DIE IDEE HET VIU MÖNSCHE AHGSPROCHE U SOMIT HETME DAS PROJEKT AHFA UMSETZE. ES ISCH SO ZUM SYMBOU VOR TRANSFORMATION VO DEM GANZ KRASS ARME QUARTIER WORDE, WOSECH I DERE CHURZE ZIT INES DOCH SEHR LEBENSWÄRTS, ZWAR IMMER NO ÄRMERS, DOCH ABER SCHÖNE STADTTEU HET VRWANDLET.
DAS GANZE ISCH GUET GANGE BIS IS JAHR 2021. SITEMNE JAHR ISCH DÄ GANZ HÜGU WIDR VOU MIT HÜSLI.
COVID HET OH HIE ZUEGSCHLAGE. IN KOLUMBIE HETME BIM ERSTE MAU ÄHNLECHI REAKTIONE ZEIGT WIE BI ÜS. MIT GROSSEM VRSTÄNDNISS VOR BEVÖUKERIG. SOGAR D STÜRERHÖCHIG UMD CHÖSTE Z DECKE HETME IH CHOUF GNO, ABER D POLITIK HETS Z WIT TRIBE. DIE ÄRMSTI SCHICHT HETS WIDR MAU AM MEISTE BETROFFE. SO SI RISIGI USSCHRITIGE ENTSANGE, WO CHRIEGSÄHNLECHI ZUESTÄNG HEI AHGNO. ES SI RUND 800 MÖNSCHE ERSCHOSSE WORDE VOR ARMEE. U DAS IM JAHR 2021.
DA D REGIERIG SOMIT SÄMTLECHI POLIZEI U ARMEE HET BRUCHT, UMD INFRASTRUKTUR Z SCHÜTZE, HEISI AUES ABZOGE USDE QUARTIER. D GANGS HEI IZ DÄNKT, VOU EASY, KENI POLIZEI, MIR CHÖI UME MACHE WAS MR WEI. SI HEI WIDR HÜSLI AHFAH BOUE U DIE AHFA VRMIETÄ. SO SI D LÜT WIDR UF DÄ HÜGU ZOGE. MITLERWILÄ ISCH DR HÜGU WIDR VOU, ES WOHNE ÖPPE 8000 LÜT DRUFF. DAS INNERHAUB VO ÖPPE 11 MÖNET. SCHO KRASS GSI ZUM GSHE. JEDOCH GHÖRE DIE LÜT IZE OH NÜMME ZU DR ÄRMSTE SCHICHT. SI HEI WASSERAHSCHLUSS, STROM, SATELITESCHÜSSEL U WEME DÜRD STRÄSSLI LOUFT, GSEHTME DASI FLACHBIUDSCHIRMFERNSEH U AUS HEI.
ES ISCH SEHR SPANNEND ZUM GSEH, WISECH HIE INNER HAUB CHURZER ZIT AUS CHA VRÄNDERE INÄ POSITIVI RICHTIG U I NO CHÜRZERER ZIT WIDR RÄCHT VIU ÜBERE HUFE GWORFE WIRD.
NICHTS DESTO TROTZ ISCH D LÄBENSFRÖID, D CHRAFT, U DR MUET VO DÄ MÖNSCHE I DÄM BARRIO EXTREM RISIG, DAS CHAME GSPÜRE, U ZWAR SEHR STARCH! DAS GEIT UNGERD HUT, UMSO MEH WEME D GSCHICHT KENNT.
ETAPPE 05
GONDELI FAHRE
HÜT HANI MR WIDR CHLINE RUHIGERÄ TAG GÖNNT. HOUPTSÄCHLECH HANI MAU EIS VO DENE VIUNE GONDELI USPROBIERT. ES ISCH DÜRD BARRIOS GANGE BIS UFENE BÄRG. GONDELI SI HIE NÄBE DR METRO ES SEHR GÄBIGS FORTBEWEGIGSMITTU. SI OH SEHR GÜNSTIG. ZUDEM HETME E UNGLOUBLECHE USBLICK ÜBER DIE STADT. ERSCH SO MERKTME WIE EXTREM GROSS DIE STADT ISCH U ÜBER WAS FÜRNE FLÄCHI SI SECH ZIEHT. GENAU DÄ USBLICK HANI AM AHFANG CHURZ MAU GHA, HAMER DENN SCHO GSEIT DASI DAS MAU NO MIT MEH ZIT MUES GSE. UNGLOUBLECH!
NERE ISCHS IS STADTZENTRUM GANGE, ÖPPIS GO ESSE. HIE MERKTME D ARMUT RÄCHT, MUES JE NACH DEM OH GUET UFD HOSESECK UFPASSE. ABER AUS ISCH GUET GANGE. HET SEHR VIU LÜT UNGERWEGS, ES LÄBT ÜBERAU. HIE ERLÄBTME SO RICHTIG WIE E SÜDAMERIKANISCHI STADT SO TICKT U LÄBT. CHA ÜBERFORDERND SI, MIR GFAUTS ABER.
HINECH ISCH Z FEST ALBORADA, ES TYPISCHES FEST FÜR MEDELLIN.
ES FINGT ABEM 00.00 STATT, MI DUET SO DR DEZEMBER WIUKOMME HEISSE. MIT ANGERNE WORT VRABSCHIDET ME SECH VOR RÄGÄZIT. SCHINS SÖTTIS EXTREM VIU FÜHRWÄRCH GÄ ÜBER DIE GANZI STADT VRTEUT. DAS LANI MR NI LA ENTGA. USEM WHIRLPOOL UF DR DACHTERASSE IM HOSTEL WIRD DAS SICHER WUNDERBAR!
MORN HANI NERE WIDR E ACTIONRICHERE TAG IHPLANET. ES WIRD FÜR MI E PREMIERE, SEHR LUFTIG, SEHR WINDIG, DRFÜR NO E SCHÖNERI USSICHT. LA MI LA ÜBERRASCHE!
ETAPPE 06
MEDELLIN
D FÜHRWÄRCH SI SUPPER GSI, D STADT AM BRÖNNE. UF DR DACHTERRASSE HETME Z SPEKTAKU PERFEKT CHÖNNE AHLUEGE.
MI FIRET NI NUME Z ÄNDI VOR REGEZIT, MI FIRET OH EIFACH DASES DEZEMBER WIRD. SIG DR LIEBLINGSMONET VO DE KOLUMBIANER, HET OH MIT WIEHNACHTE Z TÜE.
NI SCHLÄCHT HANI ABER ÜBERD D PÜNKLECHKEIT VOM WETTER GSTUNET. CHUM ISCHES DEZEMBER, RÄGNETS GAR NÜM. ES ISCH HEISS WORDE, U DR GANZ TAG SCHINT D SUNNE. HETS IDE TÄG VORHER NI GÄ, WENNS MAU SUNNIG ISCH GSI, DE ÖPPE FÜRNE STUNG.
SOMIT PERFEKTS WETTER ZUM GO GLEITSCHIRM FLÜGE!
FÜR DAS SIMER ZOBERST UFE UFENE HÜGU GFAHRE, WO NERE AUS ZIMLECH SCHNÄU ISCH GANGE. PLÖTZLECH HANI SCHO Z GSTÄUTLI ANNE GHA U HA MITEM GUIDE MÜESSE LOSSEKLÄ. D USSICHT ISCH DR WAHNSINN GSI, ZUM ERSTE MAU E KLARI SICHT ÜBERD STADT, U VORAUEM ÜBERD HÜGLE IR UMGÄBIG. MEGA SCHÖN GSI.
WITERI GONDELIFAHRTE SI NERE SOGAR OHNO DINNE GLÄGE. 2 VO 5 HANI DEMFAU GMACHT. DIE NÄCHSTE CHÖME IDE NÄCHSTE TÄG.
MEDELLIN ISCH E RICHTIG COOL STADT. ES LOUFT NI NUME MEGA VIU, D STIMMIG ISCH EIFACH SUPPER.
TROTZ DR EXTREM GWAUTÄTIGE VRGANGEHEIT VO KOLUMBIE UND GNÄUER GSEIT VO MEDELLIN ISCH D LÄBENSFRÖIT RISIG. BIMNE BEGLEITETE SPAZIERGANG DÜRS STADTZENTRUM, WOME VIU ÜBERD GSCHICHT LEHRT, HETME ÜS GSEIT, DAME SEHR GUET ISCH IM VRGESSE, BESSER GSEIT IM ERINNERE LÖSCHE. DA EIFACH SO VIU SCHLIMMI SACHE HIE SIT D 60ER JAHR PASSIERT SI, SI "CHLINERI" EREIGNISS WI Ä HANDGRANATE IM POLIZEIPOSTE, ODER EXPLOSION AM NE FESTIVAL MIT 20 TOTE SCHNÄU VRGESSE. MI BLÄNDET SE E BITZ WIT US, U FIRET DIE CHLINE SACHE, WIE ZUM BISPIU IZE DR DEZEMBERAHFANG. MI NIMMT DAS WOME HET U MÄ ISCH, U FIRETS EIFACH, MI FIRET Z LEBE, WÜUS HIE OH EIFACH SEHR CHURZ CHA SI.
WASMR CHLI IHFAHRT ISCH WIE BI ÜS IR SCHWIZ ODER EUROPA DR POBLO ESCOBAR ZUMTEU WEGE SERIE UF NETFLIC UND CO. WI NARCOS ODER SO GFIRET WIRD. ES HEISST BI ÜS, ER HEIGSECH FÜR DIE ARME IHGSETZT, HEIG HÜSER BOUE FÜR DIE ARME U SCHUTTFÄUDER UND SO WITER.
VO DERE STIMMIG MERKTME HIE SPANNENDERWIS NI WAHNSINNIG VIU. MI VRMIDÄT IR ÖFFEBTLECHKEIT ÜBERNÄ Z REDE. MI WEISS WIE VIU TOT U ZERSTÖRIG ER HIE AR GSEUSCHAFT HET AHGRICHTET.
HÜSLI HETER ÖPPE 250 BOUE, UFENE BEVÖUKERIG VO DENN ÖPPE 2.5 MILLIONE MÖSCHE ISCH DAS DOCH RECHT BESCHEIDE. ES FUESBAUFÄUD HETER OH NI BOUE, SONDER NUR D BELÜCHTIG GSPONSERET, WO NERE NI FUNKTIONIERT HET, ODER NUMÄ E MONET LANG. DAS GANZE ISCH OH NUR WÄREND SIM WAUKAMPF PASSIERT WONER PRÄSIDENT HET WÖUE WÄRDE.
WEME HIE IR ÖFFENTLECHKEIT ÜBERNE RED, WIRDME DIREKT SEHR DUMM UND HÄSSIG AHGLUEGT. D TOUR-GUIDES SEGENIM DAHER OH IMMER NUME P.E.
ER GHÖRT ZUR GSCHICHT VO MEDELLIN, OHNI FRAG, ABER ISCH FÜR SEHR VIU MISSTÄNG VRANTWORTLECH.
NI OHNI GRUND ISCH MEDELLIN DIE GFÄHRLECHSTI STADT GSI UF DR WÄUT IDE 90ER JAHR. SI HET E DRÜFACH HÖCHERI TODESRATE GHA AUS DIE GFÄHRLECHSTI STADT HÜT ZU TAGS. MITEM VRFASSE VOR NÖIE VRFASSIG U NERE 2 JAHR SPÄTER MIT SIMB TOD HET DAS ZUMGLÜCK DRASTISCH AHFA ABNÄ. HÜT GIUTSI AUS EINI VODE SICHERERÄ STÄDT IN KOLUMBIÄ. DAS ZUM GROSSE TEU OH DANKE DENE QUARTIERHEUDÄ WONI SCHO DRÜBER GSCHRIBE HA.
EIGENTLECH HÄTTMI DIE TOURE ÜBER IHN NO WUNGER GNO, ABER HIE WÄRDE DR SCHO D OUGE GÖFFNET, SO DASI DAS NI CHA UNGERSTÜTZE, SINI VILLA ODER SO GO AHZLUEGE. ES STECKT EIFCAH Z VIU LEID DRHINGER, LEID WOME DOCH NO BIS IZE CHA WAHRNÄ.
ETAPPE 07
ABSCHLUSS MEDELLIN
IG HA BSUECH BECHO, D ANNA U D RAPHAELA SI GUET AHCHO, U MIR HEI ÜS AM MITTAG IM HOSTEL TROFFE. MIT IHNE WIRDI HIE DIE 2 LETSTE TÄG Z MEDELLIN VRBRINGE.
SI SI DOCH RÄCHT KABUTT GSI, DAHER HEIMER AKTIVITÄTE UFÄ NÄCHST TAG VRSCHOBE. HEI DR ABE IM WIHRLPOOL LA USKLINGE U SI NERE GO ESSE.
D NACHWEHE VOM ESSE HANI NERE ABER WIDER IR NACHT Z GSPÜRE BECHO, ERSTI LÄBENSMITTUVRGIFTIG HETS SOMIT GRATIS ZUM ÄSSE DRZUE GÄ. D NACHT ISCH DEMENTSPRECHEN MIT VIUNE WC-PSÜECH VRBUNGE GSI U GAR NI ERHOUSAM. HA DÜRD NACHT NI RECHT GWÜSST, OBI DE AM NECHSTE TAG CHA MIT UFD TOUR COMUNA 13. DS ISCH ES WITER BARRIO, WO BEKANNT ISCH FÜR SINI STREETART. Z GANZE QUARTIER ISCH MEGA BUNT.
AM NÖCHSTE MORGE HANI MI DOCH IR LAG GFÜEUT, MITZGA U DENKE HETMR SOGAR NO GUET DA. ISCH SEHR SPANNEND GSI, ABER D GSCHICHT HANI LETSTENDLECH SCHO IR STADTTOUR ODER IR ANGERE TOUR ERFAHRE. DAHER ISCHES CHLI Z GLICHE GSI. NACH DR TOUR SIMER NO DERT IMNÄ KÄFELI GSI, U NERE GO GONDELIFAHRE. SO CHÖI SI D STADT OH MAU CHLI VO OBE ERBLICKE. IG BI ANSCHLISSEND ZRÜGG IS HOSTEL CHLI GO SCHLAFE, SI SI NÄRÄ NO IS STADTZENTRUM.
HÜT ISCH DR LETST ABE HIE, MORN GEITS ÄNDLECH CHLI ID NATUR. AB UF SALENTO. BI GSPANNT!
ETAPPE 08
SALENTO
NACHERE DOCH CHLI BESCHWÄRLECHE REIS, SIMER GUET IN SALENTO AHCHO. ANSTATT 8 STUNG IM BUS SIS NÄRE DOCH MEH AUS 12 WORDE, DAS UNGERWEGS WIDR MAU E ÄRDRUTSCH HET GÄ, PASSIERT ÖPPTERS IR LETSTE ZIT, WÜUS SO VIU HET GRÄGNET DAS JAHR. ZIMLECH KABUT HEIMER ÜSES ZÜG IM HOSTEL DEPONIERT, SI NERE NO CHLI I DAS CHLINE MALERISCHE STÄDTLI GANGE. ISCH IM VRGLICH ZU MEDELLIN E KRASSE VRGLICH. ES ISCH AUS ANGERS, VOM KLIMA BIS ZU DE HÜSER, U WIESI AUI KUNTERBUNT AHGMAUT SI. VO IZE AH HEISI NATÜRLECH OH DIE GANZI WIEHNACHTSBELÜCHTIG USPACKT... KITSCH PUR, ABER NAJA.
NACH DÄM REISETAG SIMER AUI DOCH EHER KABUTT GSI, DAHERE SIMER NACHEM ESSE IR STADT NERE ZRÜGG IS HOSTEL GO LIGE. AM NÄCHSTE TAG ISCH E 6 STUNDE WANDERIG AHGSEIT GSI. ZWAR HET ÜS DIE MITEMNE JEEP IS COCORA-VALLEY GFÜEHRT. PAARI KENNES VILICH, DAS ISCH DERT WOS SO MEGA VIU ALEISTEHENDI PAUME HET IDE BÄRGE. D WANDERIG ISCH LETSTÄNDLECH WENIGER STRÄNG GSI AUS BEFÜRCHTET, AM AHFANG RÄCHT UFWÄRTS, U VO DENN AH AUS DÜRE DSCHUNGU AMNÄ FLUSS ENTLANG WIDR ABE. MÄNGISCH ISCH DR WÄG OH DÜRE FLUSS U ÜBERE FLUSS MITEMNE BRÜGGLI GANGE. DÄMENTSPRÄCHEND NASS U DRÄCKIG ISCHME DRBI OH WORDE, DA VIU DR GANZ WÄG MIT SCHLAMM BEDECKT ISCH GSI.
ZRÜGG IN SALENTO HETSMI ZERSCH IN LADE ZOGE, WONI MIS TAGESPROGRAMM FÜR MORN HA BUECHTE. ES GEIT UFENEN MOUNTAINBIKE TOUR IM NÄ ÄHNLÄCHE TAU. DAS WIRD SUPPER. ANSCHLIESSEND HETS ÜS INES KAFI ZOGE, UM ES FEINS KAFI Z NÄ. NID FÜR NÜT HEISST DIE REGION HIE Z KAFFEE-DRÜEGG. ÜBERAU GSEHTME KAFFEEPLANTAGE. MI CHA OH KAFFEETOURE MACHE HIE, WAS Z TAGES PROGRAMM VODE ANGERE MORN WIRD SI.
UNGERWÄGGS ZUM KAFI SIMER DE PER ABSOLUTÄ ZUEFAU ID GIANNA U I MIKE GLOFFE. DAS SI ZWÖI GUETI KOLEGE VOR SCHWIZ. D GIANNA HET MIT MR D LEHR SCHO GMACHT, SI ZEME IS STUDIUM U NERE OH Z SULAWESI GO REISE. SO TRIFFT ME SECH AUSO WIDR. HA NUME GWÜSST DASI OH IN KOLUMBIE ISCH, JEDOCH HANI DENKT SI SIG NO AR PAZIFIKKÜSTE. WIE CHLI DOCH D WÄUT, ODER JA SALENTO, ISCH. Z MEDELLIN WÄR DAS ÄUÄ NI PASSIERT!
ETAPPE 09
SALENTO 2.0
MIT DERÄ LUSTIGE TRUPPE SIMER AM ABE NO GO TEJO SPILÄ. DAS ISCH ÄS KOLUMBIANISCHES SPIU, WIEME BI ÜS BILLIARD ODER DART SPIUT. DRZUE GITS Z EINTÄ ODER ANGERÄ BIER. ES HETS NO INSECH, DA Z GANZE ZIMLECH LUT ISCH UND SEHR VIU ROUCH MACHT. MI SCHIESST MITEMNE SCHWÄRÄ FLACHE TONSTEI UFÄNÄ HUFÄ MIT WEICHEM LEHM. IR MITTI VOM HUFÄ HETS Ä METAURING MIT ÖPPE 10CM DURCHMÄSSER. DER DRUFFE LIGE US PAPIER GFAUTETI DRÜEGGLI, WO GFÜUUT SI MIT SCHWARZPUUFER. WÄR AM MIT EM STEI AM NÖCHSTE BIM RING ISCH BECHUNNT E PUNKT, WEME ID MITTI VOM RING TRIFFT US KE EXPLOSION GIT, DE BECHUNNTME 6 PUNKT, WEME DIE DRÜEGG TRIFFT, DR STEI ABER NI BLIBT LIGE ODER CHLÄBÄ, DE GITS 3 PUNKT, WEME ID MITTI TRIFFT U ES GIT E EXPLOSION U DR STEI BLIBT, DE GITS 9. Z GANZÄ GEIT BIS ÖPPE 21 PÜNKT HET. MI SCHIESST DR STEI GLICH WIE BIM BOULE, EIFACH ÖPPE USERE DISTANZ VO 8 METER. BI PROFIS SIGÄS 20. ÄS MACHT UNGLOUBLECH SPASS, ISCH E SEHR COOLI AUTERNATIVE ZU DART ODER ÄHNLECHEM, DAS OH EIFACH CHLI ROUCHNÄT U VORAUEM EXPLODIERT.
AM NÄCHSTÄ MORGE FRÜE HANI DE MÜESSE UFSTA, DA IG BI GO MOUNTAINBIKE IDE HÜGLE UM SALENTO. WÄHREND DIE ANGERE MITEM ROSS UFENE KAFFEE-FARM SI, HA IG MI HEUM AHGLEIT U MIR SI LOSGFAHRE. ES HET GHEISSE, ES SÖTT ZIMLECH EXTREM WÄRDE, MI WÄRDI VO CHOPF BIS FUESS VOU SCHLAMM. LETSTÄNDLECH HETS OH GHEISSE DASES VORAUEM DOWNHILL-BIKE WIRD. DA HANI MI NATÜRLECH GFREUT, DAS NI Z VIU UFWÄRTS SÖT GA.
VELO U ÜSI GRUPPE HETME HINGER UFENE PICKUP GLADE U SI ÖPPE E STUNG LANG DÜR WAUDWÄGLI D BÄRGÄ UFGFAHRE. ISCH DOCH E SEHR WAGGELIGI AHGLÄGEHEIT WORDE. D VELOS SI SUPPER GSI, DOWNHILLBIKES VOM FEINSTEN AUSO OH SEHR SCHWÄR U HEI NUR EI EINZIGÄ GANG GHA, DAS JA NUR ABE WIRD GA. HEISI ÖMU DENKT. ABER DA AM TAG VORHÄR ES WITERS MAU, WÄR HÄTS DENKT, E ÄRDRUTSCH PASSIERT ISCH, HEISI DIE ÜBLECHE RUTENE ZUE DA. DAHER HEISI MIT ÜS E NÖI ROUTE GFAHRE, WOSI NO NIE GMACHT HEI. DR AHFANG ISCH GUET GANGE MIT DENÄ VELO, JEDOCH SCHLUSSÄNDLECH SIMER MEH UFWÄRTS AUS NIZI GFAHRE. MINI BEI SI CHURZ VOREM ABSTÄRBE GSI, DA DÄ EINT GANG WOMER HEI GHA ZUM ABEFAHRE DÄNKT ISCH GSI. ABER HE, ES ISCH ES LUSTIGS ERLÄBNISS GSI, U HEI E COOLI GRUPPE GHA. ÖPPIS GEIT GENG FAUSCH, HIE SIS MEISTENS ÄRDRÜTSCH (BIS IZ), WEMES NIMMT WIES CHUNNT, HETMÄ OH SPASS DRANN.
AM ABE SIMER EIFACH NO SEHR FEIN GO ESSE AUI ZEME, U HEI ÜS EINISCH DÜRT DESSERTWÄUT VO SALENTO PROBIERT. DÄMENTSPRÄCHEND VOUGSTOPFT SIMER DE GO LIGE.
AM LETSTE GANZE TAG SALENTO HEIMER IMNÄ TAU E CHLINI WANDERIG ZU WASSERFÄU IM DSCHUNGU GMACHT. ISCH NO SCHÖN GSI, ABER IZE NI MEGA SPEKTAKULÄR. Z BESTE DRANN ISCH Z SCHWÜMME BI DENE WASSERFÄU GSI. JEDOCH ISCH Z WASSER DOCH SEHR CHAUT GSI, LANG SIMER ÖMU NID DINNE BLIBE.
MORN GEITS ZERSCH UF PEREIRA, NÄRÄ MITEM FLUGI AB UF CARTAGENA! SOMIT HEISTS VORERST ABSCHID NÄ VOM LANDESINNERE, VOM GMÄSSIGTE BIS CHAUTE KLIMA, VODE GRÜENE HÜGLE U VODÄ KAFFEEPLANTAGE. DRFÜR CHUNNT IZE KARIBIK MIT VIU SUNNE, BIS ZU 40°, MEER, WIUDI STÄDT, SCHÖNI NATURPÄRK MIT TOLLÄ STRÄND UND NO VIU MEH! MIR FREUE ÜS SEHR. IM VRGLICH ZU AU DENE CHAUTE WINTERBIUDLI WOMER VOR SCHWIZ BECHÖME, WIRD DAS SUPER.
SOMIT CHANI MAU ES ERSTS FAZIT ZIE:
Z LANDES INNERE IN KOLUMBIE ISCH SEHR DIVERS, MEGA ABENTÜRLECH, ABER SEHR SCHÖN. MIT MEDELLIN U SALENTO HANI DOCH E SEHR GROSSE KONTRAST CHÖNNE ERLÄBÄ, EINISCH E WIUDI, TOBENDI STADT MIT EXTREMER ÄBÄNSFREUD U EINISCH ES CHLISES VRSCHLAFNIGS MALERISCHES BÄRGDÖRFLI. BEIDES SUPPER ORTÄ, JEDOCH SALENTO HETME HAUT OH RÄCHT SCHNÄU MAU GSE. MEDELLIN GFAUT MR NACH WIE VOR SEHR SEHR GUET. CHAMER GUET VORSTEUE DASMI MINI REIS NOMAU ZRÜGG WIRD FÜEHRE.
IZE CHUNNT D KARIBIKKÜSTE DRA, AUSO DR GANZ NORDÄ. MIR WÄRDE ZÄMÄ VORUSSICHTLECH VO CARTAGENA BIS PALOMINO REISE I DERÄ ZIT WO D RAPHAELO NO HIE ISCH, AUSO BIS AM 29. DAS WIRD TOP! ÄNDLÄCH RICHTIGI WÄRMI.
ETAPPE 10
CARTAGENA
HIE Z CARTAGENA SEHR GUET AHCHO, HEIMER DIRÄKT AHFA SCHWITZE. IR NACH ÖPPE 27° HEIMER BISHÄR NO NI GHA. ISCH ABER DOCH E SEHR WIUKOMMENI ABWÄCHSLIG. LIEBER SO AUS DR SCHNEE IR SCHWIZ. HEI DE DR ABE IM HOSTEL MIT PAARNE BIER LA USKLINGE. DIE ANGERE ZWÖI SI DE NO IH USGANG, IG HAS ABER NO BIS RECHT SPÄT IR HÄNGEMATTE GHANGET, U BI NERE GO LIGE.
AM NÄCHSTE MORGE HEIMERÜS DE UFE WÄG GMACHT, IDR SCHÖN BUNTE AUTSTADT VO CARTAGENA GO Z ZMÖRGELE. HÜT WIRD GANZ E GMÜETLECHE TAG. CARTAGENA ISCH ZWAR E SEHR SICHERI STADT, ABER SEHR TOURISTISCH U DAHER EXTREM TÜR. MIT EXTREM TÜR MEINI DASES FÜR ÜS SCHO ZAUBAR ISCH, ABER ANGERNE ORTE CHAME FÜR Z GÄUD VOMNE ZNACHTESSE EUE 5 TÄG LANG IM NE HOSTEL LÄBÄ. TOURISTISCH HEISST, DASES EXTREM PENETRANNTI VRCHÖIFER HET, WODER AUS, EGAU OB TOURÄ, SCHMUCK ODER ESSE, WEI AHTRÄIE. SOGAR JENSTI DROGE SI IM AHGEBOT. LEST NACHT IM USGANG SI OH DEMENTSPRECHEND VIU TOURISTE, ÖMU VIU WO BI ÜS IM HOSTEL SI, VRHAFTET WORDE. SCHINS SISI DE MITERW BESTÄCHIG UME FREIGLA WORDE. CHA SI DASS DAS CHLINES ABGSPROCHNIGS SPIU ISCH, AM ERSTE EGGE VRCHOUFESIS, U AM NÄCHSTE STEIT D POLIZEI.
NACHEM ZMORGE SIMER ZRÜGG IS HOSTEL GO SIESTA MACHE. DR GRÖSSTÄ HITZ UMÄ MITTAG UME SIMER IR HÄNGEMATTE ENTCHO. CHLI SPETR SIMER DE ZUR AUTE STADTMUR, CHLI GO SHOPPÄ, MAU NO ZUM MEER FÜRE U EIFACH DÜR DIE SCHÖNI AUTSTADT GLOFFE. ISCH EIM CHLI VORCHO WIE Z SPANIE. ANSCHLIESSEND ZRÜGG IS HOSTEL GO ABCHÜELE U CHLI SI. ZUM ABSCHLUSS GITS NOMAU ES TÜRS, ABER ES DOCH SEHR FEINS Z NACHT.
MORN GEITS DE WITER NACH SANTA MARTA.
ETAPPE 11
SANTA MARTA
MITEM BUS ISCHES BI ZITÄ AB UF SANTA MARTA GANGE. MIR HEI DÄNKT MIR GÖ CHLI FRÜECHER, D REIS SÖT "NUR" 4 STUNG GA, DE HEIMER CHLI ZIT IN SANTA MARTA. SO HEIMERS DE OH GMACHT. SI SI SOGAR PLANMÄSSIG ABGFAHRE. ABER UNGERWÄGS HEIMER DE DOCH WIDR MAU E PANNE GHA. USNAHMSWIS ISCHES KE ÄRDRUTSCH GSI, SONDRN E KOMPLETT KABUTTE PNEU HET ÜSS NÄRÄ E SCHTRICH DÜRD RÄCHNIG GMACHT. ABER OH DÄ PNEU ISCH IRGENDWENN USGWÄCHSLET GSI U DE HEIMER CHÖNNE WITERFAHRE.... BIS BARNQUILLA. DERT HEIMER INE "NID KABUTTE" BUS MÜESSE UMSTIGE, WOSI NÄRÄ GMERKT HEI, DASI ÜS ES FAUSCHES TICKET HEI USGSTEUT. MIR HEI 20'000 PESOS Z VIU ZAUT FÜRD STRECKI CARTAGENA - STANTA MARTA, Z TICKET ISCH ABER NUR BIS BARANQUILLA GANGE... SOMIT SIMER IN BARANQUILLA ES ZITLI LANG GSTRANDET, BIS ÜS DE DOCH E BUSFAHRER WIDR HET MIT GNO. IZE CHA ÜS ABER NÜMM UFHAUTE, MIR HEIS DE DOCH NO GSCHAFFT UF SANTA MARTA.
SANTA MARTA ISCH AH SICH NÜT WAHNSINNIG SCHÖNS. E SEHR LÄBIGI STADT AM MEER. ES ISCH ABER E ORT, WOME SEHR VIU CHA MACHE. VO HIE STARTE SEHR VIU TOURÄ FÜR COOLI ABENTÜR. MIT HEI DE IM HOSTEL NO CHLI ENTSPANNT, SI DE NERE GO ZNACHTÄSSÄ U SI DE OH BI ZITÄ IS BETT. DIE NÄCHSTÄ ZWÖI TÄG WÄRDE MR FERNAB VOR ZIVILISATION VRBRINGE, DAHER MÜESSE MR OH FRÜE UF.
ETAPPE 12
TAYRONA NATIONALPARK
FRÜE UFGSTANGE, SIMER IN SANTA MARTA ZUM MARKTPLATZ GANGE. HIE HEIMER DR BUS VRWÜTSCHT WO ÜS ZUM NÄ IHGANG I TAYRONA NATIONAU PARK BRINGT. ES HET AUS SUPER KLAPPT, BIS DR BUS PLÖTZLECH AM STRASSÄRAND ISCH BLIBÄ STA. ES HET GHEISSE MOTORSCHADE... ES WITERS MAU STÖMER CHLI AM STRASSERAND UME. BUS FAHRE ISCH NISO ÜSES DING HIE. DR NÄCHST BUS WO ISCH DÜREGFAHRE HET ÜS ABER DE MITGNO, SO HEIMERS DOCH EINGIGERMASSE SCHNÄU ZUM PARKIHGANG GSCHAFFT. HIE ISCHMÄ NERE GAD CHLI GÄUD LOSWORDE. ES HET GHEISSE, ZERSCH MUESME E BITRAG ZAHLE, DASME DR ERST TEU VOM WÄG CHA BRUCHÄ. D REGIERIG GÄBI IHNE KE GÄUD FÜR DÄ WÄG INSTAND Z HAUTE, DRUM EHÄBÄ SI DIE GEBÜHRE. Z DING ISCH ABER SI FAHRE JA SÄUBER MIT IHRNE MOTORCROSS TÖFFÄ DERT IM ZÜG UME, ES RÄGNÄT VIU... DAHER SISI JA EIGENTLECH CHLI SUBERTSCHULD. ABER EGAU. MIR SI NERE AHFA LOUFE. NACH 10 MIN HETS GUET AHFA RÄGNÄ U HET OH NI WÖUE UFHÖRE. SO SIMER UFEMNÄ PFAD DÜRE DSCHUNGU GLOFFE, UMGÄ VO DICHTEM UHRWAUD, VIUNÄ MUGGE U HIE U DERT PAAR ÄFFLI. MIR SI SEICH NASS GSI, D RÄGÄJAGGE HANI BRUCHT, DAS WENSCHON DR RUCKSACK MIT DE ERSATZCHLEIDER NI AUZU NASS WIRD. MIR HEI NUR E CHLINÄ DRBI GHA, DR GROSS HEIMER Z SANTA MARTA GLA. ES ISCH E SCHÖNI WANDERIG GSI, DÜRE RÄGÄ HETME D DSCHUNGUHITZ OH NI SO GMERKT, SO HEIMER OH NI SO FEST GSCHWITZT. NACH ZIMLÄCHE UFSTIGÄ ISCHES DE NERE VIU GRADUS GANGE U NERE ZIMLECH LANG ABWÄRTS. IRGENDWENN HETME DE DIE LUTI BRANDIG VOM STRAND AHFA GHÖRE.
PLÖTZLECH LIECHTET SECH DR URWAUD U MIR SI AR PLAYA BRAVA. HIE WÄRDÄ MR DR RÄST VOM TAG VRBRINGE, ES ISCH OH ERSCH MITTAG, U NERE HIE AM STRAND IR HÄNGÄMATTE SCHLAFE. ES ISCH TROUMHAFT SCHÖN HIE. GROSSI GRASFLÄCHINÄ MIT PAUMÄ, CHLINI HÜTLI MIT HÄNGÄMATTE, KENI MÖSCHE, E WUNDERSCHÖNE EINSAME STRAND, PAAR COOLI LÜT, EBEFAUS VIU MUGGÄ, CHLI BIER, KOKUSNÜSS U NO VIU ME. SO LAHTSECHS LA LÄBÄ. ÜSI NASSE CHLEIDER HEIMER CHÖNNE UFHÄNKÄ ZUM TROCHNÄ U DE SIMER EIFACH AM STRAND GSI U HEI ENTSPANNT. ES SI HIE DOCH RÄCHT HEFTIGI WÄUENÄ, MIT STARCHE STRÖMIGE, DAHER DARFME OH NI AUZU WIT IS WASSER, HET ABER GLÄNGT ZUM CHLI BÄDÄLÄ. ES HET ES CHLISES RESTURANT WO ZUM "CAMPING-PLATZ" GHÖRT. HIE HEIMER CHÖNNE ZMITTAGESSE U DE OH ZNACHT. SI HEI MEGA FEIN KOCHET. CHLI FLEISCH, GMÜES, RIS U PLATANOS. AUS HET PASST. NACHEMNÄ ÄBFAUS GUETE ZANCHT, HEIMER DE NO CHLI AHFA SPILÄ, DRZUE HETS DE DOCH DIE EINT ODER ANGERI FLÄSCHÄ RUM GÄ. IR NACHT SIMER NÄRÄ NO FÜRE AH STRAND. UNGERÄMNE WUNDERBARE STÄRNÄHIMMU, UMGÄ WO DSCHUNGU, VOM RUSCHÄ VODÄ WÄUE, VOMNÄ LIÄCHTÄ WIND, VOM BLINKÄ VODÄ GLÜHEWÜRMLI, VO LÜCHTENDEM PLANKTPON IM MEER UMNÄ LIECHTE ABER DOCH SPÜRBARE RUSCH VOM RUM HANI HIE UF DERÄ REIS Z ERSTÄ MAU SO RICHTIG Z GFÜEU VO FREIHEIT BECHO. I HA D FREIHEIT IZE HIE EIFACH Z MITZ IM NIGERNDWO UNGER DENÄ UMSTÄNG CHÖNNE Z SI, IG HA KENI PROBLEM, KENI SORGÄ, KE JOB, KES ÄND VOR REIS IN SICHT, PARKTISCH KENI VRPFLICHTIGÄ U NÜT WO IM MIM CHOPF DI GANZ ZIT UMÄSCHWIRRT. DAS ISCH E LUXUS, WONI GMEKRT HA, ISCH OH FÜR MI SCHWÄR Z ERREICHE, BISHÄR ISCHES FÜR MI OH NI IMMER SO EIFACH GLOFFÄ, WIES UF VRGANGENÄ REISE SCHO ISCH GSI. HA MEH MÜEH MIT GWÜSSNE UMSTÄNG, CHA NÜMM GENG EIFACH AUS SO NÄ WIES CHUNNT. SO HANI DS GFÜEU VO GLÜCK I DERÄ ART SCHO LANG NÜMM DÖRFE ERLÄBÄ. E WUNDERBARI KULISSÄ U DAS CHANI MIT GUETE MÖSCHE TEILE, BESSER CHAS NI SI, FÜR DAS GEITMÄ GO REISÄ, FÜR SETTIGI MOMÄNTÄ LÄBT MÄ!
I BI DE DOCH NO ES ZITLI AM STRAND VORÄ BLIBE, U BI DE IRGENDWENN IR NACHT MAU ZRÜGG ID HÄNGEMATTE GO LIGÄ. ES HÄTTSÄCH DOCH RÄCHT GUET LA SCHLAFE, NUR ISCH MIS MUGGÄNETZ KABUTT GSI, DAHER ISCHES E RÄCHT JUCKENDI NACHT WORDE. ZUESÄTZLECH HET DR WIND MIT DR ZIT SEHR AHFA ZUENÄ, SO DASES SCHO FASCH CHLI UNAHGNÄM ISCH WORDE. ISCH ABER DOCH ERTRÄGLECH GSI, DAHRE SIMER EINIGERMASSE USGRUHIT UFGWACHET. AM MORGE SIMER GO ZMÖRGELE, HEI ÜSES ZÜG ZÄMÄ GSUECH, WO VOM WIND IR NACHT ÜBERAU HÄRÄ GLUFTET ISCH WORDE, PACKT U SI WIDR LOSGLOFFE.
ENTLANG VOMNÄ USTROCHNETEÄ FLUSS SIMER NERE WIDR DÜRE DSCHUNGU AMNE PFAD ENTLANG GLOFFÄ, ISCH AUBE GAR NI SO EIFACH GSI UFEM RICHTIGÄ WÄG Z BLIBÄ, ISCH OH SEHR SCHLAMMIG GSI, DÄMENTSPRÄCHEND DRÄCKIG ISCHMÄ WORDE. IRGENDWENN ISCHES DE NÄRÄ BÖS UFWÄRTS GANGE, DAS IR KOMBINATION MITEM VOUÄ DSCHUNGUKLIMA WOMER IZE Z GSPÜRE HEI BECHO, ISCH Ä SCHWIRIGÄ MIX GSI. IG MUES SÄGÄ DAS MINI HOSÄ, UNGERHOSE U VORAUEM MIS TSHIRT NACH DÄM UFSTIG NASSER SI GSI, AUS GESTR WOMER IM RÄGÄ SI GLOFFE. ÄUÄ NO NIE I MIM LÄBÄ SO GSCHWITZ. HA EIFACH NUME NO TROPFÄT. ABER I BI JA OH NI DR EINZIG GSI WOS SO GANGE ISCH. D HITZ, U DIE HÖCHI LUFTFÜÄCHTIGKEIT GÄBÄ EIM DR RÄST. SOBAU MR DOBÄ SI GSI, ISCHES DE DOCH E SEHR SCHÖNI WANDERIG DÜRE DSCHUNGU WORDE. MI ISCH ALEI, NUR URWAUDGRÜSCH UM DI UME, ES ISCH ES CHLISES PARADIS HIE.
OH HIE GHÖRTME IRGENDWENN Z RUSCHÄ VOM MEER WIDR. IRGENDWENN LIECHTET SECH DR URWAUD UME U MI ISCH WIDR AM STRAND. VO HIE AH HEIMER ÜS DÜR SCHLAMM MÜESSE WITER KÄMPFE BISMR DE ZUM "TOURISTRAND" SI CHO. HIE HETS DOCH IM VRGLICH SEHR VIU LÜT GHA, SI NACHEM LETSTE TAG DOCH GAD CHLI ÜBERFORDERET GSI. DR STRAND ISCH ABER SCHÖN GSI, HET OH GUET DA, DR GANZ DRÄCK VOR WANDERIG CHÖNNE ABZWÄSCHÄ U CHLI AM STRAND Z LIGÄ. VO HIE HÄTTÄ MR CHÖNNE WITRLOUFE ZUMNÄ USGANG VOM PARK. MIR HEI ÜS ABER DRFÜR ENTSCHIDE, ES BOOT Z NÄ U ZRÜGG BIS FASCH UF SANTA MARTA,GNÄUER GSEIT NACH TAGANGA, Z NÄ. MIT DERE HEFTIGÄ BRANDIG ISCH DAS DOCH E SEHR WAGGELÄGI U NASSI AHGLÄGEHEIT WORDE. JEDOCH ISCHES MEGA SCHÖN GSI, DR PARK VOM MEER US Z GSEH. ES ISCH ES RÄCHT GROSSES GEBIET, DAHER ISCH D FAHRT OH RÄCHT LANG GANGÄ. MIR SI DOCH DE FROH GSI, SIMER SICHER AHCHO. VO HIE HEIMER ES TAXI UF SANTA MARTA GNO, WOMER Z GEPÄCK SI GO HOLE.
IZE HEISSTS AB ID BÄRGÄ, WOS CHLI CHÜEHLER ISCH, ABER GRAD SO SCHÖN, AUSO AB UF MINCA. HIE LÖMERS ÜS PAAR TÄG LA GUET GA. MIR HEI ES MEGA WITLÖIFIGS ABER RUHIGS HOSTEL BUECHET. SCHLAFE DUET ME PRAKTISCH DUSSE, UF MATRATZE UNGER MUGGÄ NETZ. Z HOSTEL HET ÜBERAU UFGHÄNKTI NETZ ZUM DRUFFÄ LIGE, ES FLIESST E FLUSS DÜRS HOSTEL, SEHR FEINS ÄSSÄ, VIU HÄNGÄMATTE, LAGERFÜR, E GUETI BAR, SCHÖNI NATUR U ZUMGLÜCK DUSCHINÄ, DIE BRUCHE MR IZE UNBEDINGT. ES HET SO GUET DA Z DUSCHÄ, ISCH ABER CHAUT GSI. ES ISCH E ECOLODGE WOMER IZE EIFACH CHÖI ENTSPANNE. IM VRGLICH ZUDÄ BISHÄRIGE HOSTELS ISCH DAS HIE E TROUM.
HIE HAUTE MRS SICHER SEHR GUET US!
ETAPPE 13
MINCA | TAGANGA
NACH 2,5 SEHR ERHOUSAME TÄG IN MINCA GEITS WITER UF TAGANGA, DR NACHBARORT VO SANTA MARTA. MINCA ISCH SUPER GSI. Z HOSTEL HET SEHR PASST, HAS NIMAU USEM HOSTEL USE GSCHAFFT. Z ESSE HET VIU CHÖNNE, POOL, FLUSS, HÄNGEMATTE, LIGENETZ, U MEGA VIU HÄRZIGI HÜNG HEI E GUETI ABWÄCHSLIG GSCHAFFE. MEHRERI PASSIONSFRUCHTSMOOTHIES PRO TAG HEI DRFÜR GSORGT, DASI GUET HYDRIERT BI. Z LÄBÄ ISCH SCHÖN ESO. EI NACHTEU HET MINCA ABER, WEME IN COLUMBIE UMHÄRREIST, GHÖRTME GENG GRÜCHT VO MINCA-LEGS, AUSO MINCA-BEI. DIE GRÜCHT HEISECH DE DU ZIMLECH BEWAHRHEITET, AU MINI UNZÄHLIGE MUGGESTICHE U SANDFLÖHSTICHE ADE BEI FÜEHLE SECH AH, AUS WÄRE SI ZU EIM GROSSÄ ZEMEGWACHSE. D BEI DÜE MITLERWILE WEH, U SI SOGAR CHLI UFGSCHWUUÄ. WASME NI AUS MACHT ZUM ENTSPANNE. I HOFFE ABER DOCH, DAS DAS GLI UME WÄG GEIT. Z STÄNDIGE CHRATZE SCHAFFT OH NUR CHURZFRISTIG LINDERIG. ABER JA IZE AB UF TAGANGA. DAS ISCH ES DÖRFLI, WÄSENTLECH SCHÖNER AUS SANTA MARTA, WOS PRAKTISCH NUR UMS TOUCHÄ GEIT. DAS ISCH OH ÜSE PLAN FÜR MORN. MIR WÄRE MORN 2 TOUCHGÄNG AM NAMI ABSOLVIERE, IG SÄUBER WIRDE DE EUE ZWÖI SEPERATI MACHE, DA DIE ANGERE KENI TOUCHZERTIFIKAT HEI. FÜR MI WIRDS DE CHLI ES USPROBIERE, OBI HIE DIE NÄCHSTE SCHRITTE SÖU MACHE, AUSO DR RESCUE-DIVER, UM DE DR DIVEMASTER Z MACHE. MIR GSEH DE, WIE COOL DASES DE WIRD. CHAMER ABER VORSTEUE, DASES ÄHNLECH WIRD SI WIE SCHÜSCH IR KARIBIK, AUSO VIU WO SCHO ABGSTORBE ISCH, LAMI ABER GÄRN LA ÜBERRASCHE. MI GÖNGI SCHINS VOREM TAYRONAPARK GO TOUCHE, WASI MR DOCH SCHONO SCHÖN VORSTEUE, DERT SIMER JA VOR PAAR TÄG SCHO MAU MITEM BOOT DÜRE DÜÜSET. NACHEM TOUCHGANG MÜESSE MR DE GAD ÜSI SIBÄ SACHE PACKE U NERE AB UF PALOMINO. CHLI WITER IM NORDE VO SANTA MARTA LIGT DAS HIPPIE-DÖRFLI, WOMER AM MEER WÄRDE SI. ES WIRD ÜSI LETSTI STATION SI, BEVOR MIR IS COSTEÑO BEACH HOSTEL GÖ, WOMER WIEHNACHTE WÄRDE VRBRINGE. AUI SCHWÄRME VO DEM HOSTEL EGAU WOME ISCH, MIR HEIS ZUMGLÜCK OH SCHO GANZ AM AHFANG VOM TRIP BUECHET, SCHÜSCH HÄTIS KE PLATZ ME GHA.
ETAPPE 14
DIVING
IRGENDWENN AM MORGE SIMER DE MAU UFGSTANGE, STRESS HEIMER KENE GHA. HEI DE SCHO MÜESSE USCHEGGE IM HOSTEL U ÜSI SACHE PACKE U IM GEPÄCKRUM VRSORGÄ. MIR HEI BISES EIS ISCH GSI CHLI IM HOSTEL AM POOL GFULÄNZT. WOS DE SOWIT ISCH GSI, SIMER ZUM DIVE-CENTER GANGE. MI HET ÜS NÄR USGSTATTET MIT WETSUITS, U MITEM GANZE ZUEBEHÖR. SO SIMER DE LOSGLOFFE ZUM BOOT. UFEM BOOT HET VORAUEM FÜR DIE ANGERE E CHLINI SCHUELIG GÄ ÜBER AUS WODE MUESCH WÜSSE ZUM TOUCHE. FÜR MI ISCHES E GUETE UFFRÜSCHIGSKURS GSI, ABER FÜRD ANNA U D RAPHAELA HAUT DOCH NO WICHTIG, D ZEICHE U AUS Z CHÖNNE. D RAPHAELA HET SCHO MAU TOUCHET, FÜRD ANNA ISCHES Z ERSTE MAU GSI.
IRGENDWENN HET Z BOOT GSTOPT, MIR HEI ÜSI FLOSSE, MASKE U FLÄSCHE AHGLEIT, HEI ÜS HINGERZI VOM BOOT IS WASSER LA PLUMSE U SI DE LOS. ZERSCH SIMER IM SEICHTE WASSER GSI, ZUMLUEGE WIES GEIT, VORAUEM FÜRD ANNA, U DE SIMER VO DERT LOS ID TÖIFI. DA DIE BEIDE KES ZERTIFIKAT HEI, SIMER NUR BIS UF MAX 12 METER ABE. MIR SI E GRUPPÄ GSI, DAHER BI IG OH MIT IHNE MIT. ZERSCH HANIS NO SCHAD GFUNGE, DASI NI WITER ABE CHA, ABER HA DE SCHNÄU GMERKT DASES WITER UNGER, AH DEM TOUCHPLATZ WOMER SI GSI, NI WAHNSINNIG SPEKTAKULÄRER WÄR. Z MEER ISCH E BITZ WIT SO GSI WIENIS ERWARTET HA, D SICHTWITI ISCH CHLI BESCHRÄNKT GSI U SEHR VIU KORAUÄ SI TOD. JEDOCH HERS VIU SEHR GROSSI GHIRNKORALLE, WO DOCH RÄCHT IHDEÜCKLECH SI GSI. MIR HEI DOCH OH VIU FISCHE GSE, UNGERANGEREM AALÄ, FÜRFISCHE U CHUGUFISCHÄ. NACH CHLI MEH AUSERE HAUB STUNG ISCH DE DR ERST TOUCHGANG VRBI GSI, SO SIMER ZRÜGG UFS BOOT, HEI CHLI ÖPPUS GÄSSE U TRUNKE U CHLI PÖISELET. NACH ÖPPE 40 MINUTÄ ISCHES DE WITER GANGE ZUM NÄCHSTE TOUCHGANG. HIE SIMER DIREKT AR ANKERLEINÄ ABETOUCHT. VOUM TOUCHGFÜEU HER HETMI DÄ BESSER DÜECHT, ABER MIR HEI WENIGER SACHE GSE UFEM ZWÖITE.
I DÄNKE DASI IRGENDWENN IM JANUAR NOMAU ZRÜGG GA, NO EINISCH PAAR TOUCHGÄNG DERT WIRDE MACHE, WO CHLI ZU ANGERNE RIFF GÖ WO TÖIFER LIGE U DE NERE NO DR RESCUE-DIVER AHHÄNKE. DÄ GEIT OH NI AUZULANG, U CHOSTET IN TAGANGA OH NI VIU. ABER CHAMER ÖMU NI VORSTEUE, HIE DR DIVE MASTER Z MACHE. Z MEER ISCH Z KABUT, U Z DORF ISCH Z CHLI FÜR SONE LÄNGERI ZIT DERT Z BLIBE. DIE PAAR TÄG FÜRE RESCUE-DIVER WÜRDE ABER DINN LIGE.
NACHEM 2. TOUCHGANG SIMER NERE WIDR UFS BOOT U ZRÜGG NACH TAGANGA GFAHRE. DERT D SACHE USGLADE, ÜSES ZÜG ABZOGE U GREINIGER U DE SIMER ZRÜGG IS HOSTEL. MIR HEI NUMÄ ÜSE RUCKSACK MÜESSE HOLE U DE SIMER SCHO UNGERWÄGS GSI NACH PALOMINO. NACH ÖPPE 2 STUNG FAHRT SIMER DE SICHER DERT AHCHO, U HEI DR ABE LA IR HÄNGEMATTE USKLINGE. SI OH CHLI ZERSTÖRT GSIVOM TOUCHÄ.
ETAPPE 15
PALOMINO
DR ERST TAG IN PALOMINO HEIMER GNÜTZT, UM CHLI Z DÖRFLI AHZLUEGE. SI CHLI FÜRE AH STRAND, U HEI CHLI D LÄDELI ABKLAPPERET. UNGERWEGGS SIMER LUSTIGERWIS SEHR VIUNE BEGÄGNET, WOMER IRGENDWO UF DR REIS HEI LEHRÄ KENNE. NACHEM SHOPPÄ SIMER DE EIFACH ZUM POOL GLÄGE U HEI ENTSPANNT. MITEMNÄ GUETE PASSIONSFRUCHTSAFT GEITS NO VIU GÄBIGER. REISÄ CHA HAUT SCHO STRESSIG SI.
IRGENDWENN, NACH PAARNE BIERLI SIMER DE AM NE ORT SEHR GUET GO ZNACHTESSE. DRBI SI DRÜ GSI WOMER EBE AM MORGE PER ZUEFAU GFUNGE HEI. SPETER SIMER ZRÜGG IS HOSTEL, WO NO WITERI SI DRZUEGSTOSSE WOMER GFUNGE HEI. SO ISCHES DOCH OH CHLI SPETER WORDE U MIR SI Z FRIDE GO LIGE.
NACHEM Z MORGE AM NÄCHSTE TAG SIMER WIDR MAU CHLI UMEGLÄGÄ, MITEM ZIU, AM EIS DE GO Z TUUBÄ.
FÜR DAS SIMER UFEMNE JEEP UFGHOCKET, D GUMMI RINGE SI UFEM DACH GSI, U ÜBER DIE HOUPRIGE SANGSTRASSE VO PALOMINO I WAUD GFAHRE. IRGENDWENN HET DE DR JEEP AHGHAUTE, WIT VORHÄR, WONER EIGENTLECH HÄTTI SÖUE AHHAUTE. ES HET GHEISSE DAS E LASTWAGE DR WÄG BLOCKIERT. AUSO HEIMER D RINGE GNO U SI LOS GLOFFE. GLI HETSECH DE DR EFFEKTIV GRUND OFFEBART. ZWÖI STIERE, WO ZIMLECH HÄSSIG SI GSI, SI HINGER EM LASTWAGE AM TOBE. SOMIT HEIMER CHLI MÜESSE WARTE BISI SECH BERUHIGT HEI, U DE SIMER HINGER DÜRE GSCHLICHE, SAMT RINGE. IRGENDWENN SIMER DE AM PUNKT GSI WO ÜS DR JEEP HÄTTI ABGLADE. VO HIE AH ISCHES IZE DEFINITIV Z FUESS WITER GANGE. NIEMER VO ÜS HÄTT DÄNKT, WASMER FÜRNE WANDERIG IDE FLIPFLOPS WÄRDE MÜESSE MACHE. ISCH DE IM DSCHUNGU ES WITERS MAU SCHWÄR BÄRGUF GANGE. WIEMRS SO VODE VORHÄRIGE DSCHUNGUTOURÄ KENNE, ISCH NI WENI SCHWEISS GFLOSSE. I BI SO NASS GSI, DASI EIFACH MITEM TSCHIRT U AUEM IS WASSER BI, HET EH KE UNGERSCHID ME GMACHT. SOMIT ISCH DI EIGENTLECHI AKTIVITÄT LOS GANGE. MIR SI I RING GHOCKET U HEI ÜS LA TRIBE. ZERSCH SI ES PAAR BEWEGTERI ABSCHNITTE CHO, NERE HET DR FLUSS DOCH SEHR RUHUG SINI KURVÄ DÜRE DSCHUNGU ZOGE. MIR HEI ÜS LÄNGER AUS ERWARTET CHÖNNE LA TRIBE. ISCH SEHR SCHÖN GSI, SO D NATUR, D GRÜSCH, DR WIND U D FLÖIGELI UF EIM CHÖNNE LA Z WÜRKE. ZUMGLÜCK KENI MÜGGELI. MI ISCH AB UND ZUE AMNE DÖRFLI VO INDIGENE IHWOHNER VRBI TRIBE. BI EIM HET ÖPPER SOGAR MEGA SCHÖN MIT ÄRÄ FLÖTE MUSIG GMACHT, NÜT HET DIE IDYLLE CHÖNNE TRÜEBE, BIS UFS GSCHWÄTZ VOM GUIDE WO DRBI ISCH GSI, I HAMI DOCH DE IMMER CHLI ABGSETZT VOR GRUPPE, DASI DAS CHLI ALEI CHA GNIESSE, ABER OH WENI 200 METER HINGER DRANN BI GSI, NI D VÖGU SI Z LÜTISTÄ GSI, SONDERN ÄR. ABER JA ER ISCH E LUSTIGÄ GSI U MACHT OH NUR SI JOB.
IRGENDWENN WIRD DE DR FLUSS BREITER U LANGSÄMER. JE NÖCHER ME AD KÜSTE ISCH CHO, AUSO NÖCHER AH PALOMINO, DESTO ME IHHEIMISCHI SI IM FLUSS AM BADE, SPILÄ, DUSCHE, FISCHE ODER WÄSCHE GSI. IRGENDWENN HEI ÜS DE IHHEIMISCHI CHING AHFA BEGLEITE BIS ZUM ORT, CHURZ VOR DR MÜNDIG IS MEER, WOMER SI USGSTIGE. SI SI MEGA LUSTIG GSI, SI DIE GANZ ZIT UNGER DE RINGE DÜRE TOUCHT. SI HEI ÜS DE AS UFER WÖUE ZIE, DASI ÜS ES PAAR PESOS CHÖI ABLUCHSE. D RAPHAELA HETNE DE IHRES MÜNZ GLA. SO SIMER NERE AM STRAND NA BIS ZUM HOSTEL ZRÜGG GLOFFE. DI TOUR HET SPASS GMACHT, MIT DE BIER U AUEM DRUM U DRA ISCHES E GLUNGNIGE TAG GSI. DÄ HEIMER NERE BIMNE ZNACHT LA USKLINGE, U SI NERE ZRÜGG IS HOSTEL, WONI MI IR HÄNGEMATTE VRCHROCHE HA.
AM NÄCHSTE MORGE HETS SCHO UME SACHE PACKE GHEISSE. AB IS COSTEÑO BEACH HOSTEL, DA WOMER WIEHNACHTE WÄRDE VRBRINGE. MITEM TAXI SIMER DIREKT DERT HERE BRACHT WORDE. ITE BINI GSPANNT, OBS WÜRKLECH SONES GUETS HOSTEL ISCH, WIES AUI SEGE. MI GHÖRT WÜRKLECH SEHR VIU VO DEM HOSTEL.MIR SI GSPANNT, DR ERST IHDRUCK ISCH ÖMU SICHER NI SCHLÄCHT!
ETAPPE 16
FROHI WIEHNACHTÄ
MIR SI DA IM COSTEÑO BEACH HOSTEL AHCHO. ES ISCH SUPER HIE, SCHÖNE STRAND, GUETS ÄSSÄ, PAAR GUETI LÜT, POOL, DRINKS U EINE VODÄ BESTÄ STÄRNÄHIMMU WONI JEMAUS GSEH HA. DAS WÄG VODÄ DÖRFER ISCH, ISCH D LIECHTVRSCHMUTZIG SEHR CHLI.
HÜT AM MORGE CHLI VRKATHERET UFGWACHT. ES HET E PARTY IM HOSTEL GESTRGÄ U SI DE NERE NO RÄCHT LANG AM STRAND UMEGHANGET. DR STÄRNEHIMU U PLANKTON IM MEER LÜCHTET SO SCHÖN.
ES ISCH SEHR UNGWOHNT, ES ISCH DR 24. MI WACHT UF, GEIT USEM ZIMMER U ISCH AM STRAND. WIE SCHÖN ISCH DE DAS?! VORAUEM ISCHES WARM.
MIR WÄRDE HÜT CHLI AM STRAND U POOL VRBRINGE, AUSZU VIU ANGERS MACHTME HIE OH NI, U NERE HEIMER DE ABGACHT ZUM WIEHNACHTSESSE MIT PAARNE ANGERE. CHÖNNT AUSO SCHLECHTER SI.
SOMIT WÜNSCHI AUNE E SEHR SCHÖNI WIEHNACHT, GNIESSTES!
ETAPPE 17
COSTENO BEACH
ES ISCH WIEHNACHTE, MI WACHET UF U GEIT INE HÄNGEMATTE MITEMNE PASSIONSFRUCHT U MANGO SMOOTHIE. ZUESÄTZLECH ISCHES WARM, D SUNNE SCHINT U MI GHÖRT Z RUSCHE VODE WÄUÄ. SO LAHTSECHS LA LÄBÄ. DR GANZ RÄSTLECH TAG HETSECH NERE AM STRAND ABGSPIUT. IDE GROSSE WÄUE CHLI GO VRSUECHE Z SCHWÜMME U DR BI SCHITERE, CHLI GA LIGE UMDI VODE STRAPAZE IDE WÄUE Z ERHOLÄ, ÖPPE IMMER WIDR CHLI ÖPPIS ESSE U SO DR EINT ODER ANGER MOJITO, SO ISCHES DOCH SEHR ENTSPANNT GSI.
AM ABE SIMER DE IS BOHEMIAN BEACH HOSTEL, ÖPPE 15 MIN SPAZIERGANG AM STRAND ENTFÄRNT. DERT HET ÜS ES GUETS ZNACHT ERWARTET, UNGEREMNÄ MEGA SCHÖNE AMBIENTE U VIUNE GUETE LÜT. ES ISCH SCHO NO SO SPIEZIEU GSI, DASI HIE AH DEM TISCH HOCKE U NI IR SCHWIZ BIR FAMILIE. I MUES SEGE, SO RICHTIG VIU WIEHNACHTSSTIMMIG ISCH GAR NI UFCHO HIE. ES ISCH NO LUSTIG Z GSEH, GANZ KOLUMBIE VRZIERT AUS MIT GANZ VIU LIECHTER U SCHÜSTIGEM KITSCH, HIE IDE HOSTELS ISCH GAR NIX VRZIERT GSI. MI HETS ABER OH NI GSTÖRT, DR STRAND U AUS DRUMM U DRANN MACHT AUS WETT. NACHEM ZNACHT SIMER DE INES ANGERS HOSTEL CHLI GO FIRE, IG BI MITEM KOLLEG ABER FASCH DR GANZ ABE IMNE LIGENETZ GLÄGE.
DR NÄCHST TAG HET NI VIU ANGERS AHGFANGE, EIFACH NI IR HÄNGEMATTE, SONDERN AM STRAND. HA ABER ZERSCH NO DR POOL MÜESSE USPROBIERE, U MUES SÄGE, ISCH DOCH NO GANZ ENTSPANNT. DAS ISCH MAU E PENDÄNZE-LISTE WO NI SO MÜEHSAM ISCH.
NACHEM MITTAG HEIMER DE BOOGIEBOARD GMIETET, AUSO SO BRÄTTER US STYROPOR, WOME SECH MIT DE WÄUE RÄCHT LANG CHA GEGE STRAND LA TRIBE.
JE NACH DEM ISCHES SCHO SEHR HEFTIG GSI IDE WÄUE. ZUM TEU ISCHDR Z WASSER BIDE CHNÖI, U D WÄUE ISCH ÖPÄ 2 MAU GRÖSSER AUS IG. SI HEI E RISE CHRAFT. ABER WEDE D WÄUE RICHTIG VRWÜTSCHISCH, DE MACHTS SEHR VIU SPASS. WESDI ABER I D WÄUE INE NIMMT, SCHÜTTLETS DI DOCH SEHR HERT DÜRE UND MI HET SANG ABSOLUT ÜBERAU. NACHERE STUNG HEIMER DE NÜMM MÖGE, HEI D BOARDS ZRÜGG DA U SI ÜSERE HOUPTBESCHÄFTIGUNG NACHEGANGE, ESSE PSTEUE, TRINKE MITNÄ, U AH STRAND GO LIGE. IRGEND WENN HEISI DE ES DJ PULT UFGSTEUT U HEI GUETI BEATS AM STRAND AHFA MACHE. ES DE LETSTENDLECH ZUMNE CHLINE RAVE WORDE. SO HETT DÄ TAG OH SIS FRIDLECHE ÄNDI GFUNGE.
DR LETST GANT TAG HIE HANI AM STRAND, MIT FRÜCHT, SPIUGUEIER U BROT GSTARTET. SO HANI ÖMU GNUE ENERGIE TANKT, UM NERE GANZ FÜRE AH STRAND Z GA, FÜR CHLI GA Z LIGE. SPÄTER ISCH NOMAU BOOGIEBOARDE AHGSEIT, DA MUESME SCHO USGRUIÄT SI. SO SIMER DE NOMAU I DE WÄUE, HEI ÜS PAAR MAU GUET D OHRÄ U D NASE LA SPÜELE U HEIS DE IRGENDWENN OH GSE. DAHER BESSER UME MAU ÖPPIS ESSE U VILECHE E MOJITO GA HOLE. HÜT ISCH DR ABSCHLUSS ABE. MIR GÖ MORN ZRÜGG UF PALOMINO, DR MASOULT GEIT ZRÜGG NACH DÜTSCHLAND U FASCH AU ANGERE WOMER HEI LEHRE KENNE, GÖ OH IRGENDWO WITER. D RAPHAELA ISCH NERE NO EI ABE MIT ÜS IN PALOMINO, NERE GEIT SI UF SANTA MARTA, U AM NÄCHSTE TAG VIA BOGOTA ZRÜGG ID SCHWIZ. MIT IHRE FIRE MER DE MORN NO ABSCHID. FÜR MI U D ANNA HEISSTS IZE NO DI PAAR TÄG PALOMINO, BIS NACH NÖIJAHR. DENN TRENNE SECH DE OH ÜSI WÄGE, SI GEIT DENN RICHTIG SANTA MARTA. MINI AKTUELLE PLÄN FÜR NÄRE FÜEHRE MI NERE EUE RICHTIG WÜESTI. DERT GITS E COOLI MEHRTÄGIGI TOUR DÜRD GÄGEND. ANSCHLIESSEND BAHNI MR EUE WIDR MINI WÄGE ZRÜGG RICHTIG CARTAGENA, DAS ABER NO MIT PAARNE ZWÜSCHESTOPPS. WIES WITER USGSEHT WEISI NO NI, ECUADOR STEIT IMMER NO UFEM PLAN, ÖMU AUS VARIANTE, DERT REITZ MI ABER EIGENTLECH NUME D GALAPAGOS INSLE. E ANGERE PLAN WÜRDI MI UF GUATEMALA TRIBE. JE NACH DEM NERE UF HONDURAS, DERT UFD INSLE UTILA GO TOUCHÄ. HA IZE SCHO PAAR MAU DIE EMPFÄHLIG BECHO. MUES NO RÄCHT SCHÖN SI. ABER IG HA NO CHLI ZIT ZUM MI Z ENTSCHEIDE. DIE NIMI NR OH.
ETAPPE 18
NEU JAHR IN PALOMINO
PALOMINO, HA ES PAAR DÜTSCHI LEHRE KENNE, WOMER HEI GSEIT DASSI SCHO MEHERERI WUCHE HIE SI. HAS NI RÄCHT VRSTANGE WISO, MI CHA JA OH NI AUZU VIU MACHE HIE. MITLERWILE WEISI ABER WISO, ISCH EIFACH EXTREM ENTSPANNT I DÄM DÖRFLI. ES LOUFT ABER VORAUEM OH AM ABE RÄCHT VIU, VORAUEM PARTYS AM STRAND. MIR SI HIE IMNE CHILLIGE CHLINNE HOSTEL AHCHO, MEGA FAMILIÄR. D RAPHAELA HET NO IHRE LETST TAG, U ISCH DE NERE RICHTIG SANTA MARTA.
AM ERSTE TAG NUME NO Z ZWÖIT HEIMER VORAUEM CHLI IR HÄNGEMATTE VRBRACHT. AM ABE NO GO ESSE U NERE AM WIDR AM CHILLE.
AM NÄCHSTE TAG HEIMER PAAR DÜTSCHI LEHRE KENNE GEGE ABE, SI DE MITNÄ GUET GO MOJITOS TRINKE. LETSTENDLECH SIMER DOCH DE BIS SEHR SPÄT NO AM STRAND ARE PARTY GLANDET, DRZUE HETS WITERI MOJITOS GÄ.
LUSTIGERIWIS HEIMER DOCH DE AM NÄCHSTE TAG CHLI REGENERATIONS ZIT BRUCHT, HIE HETME EIGENTLECH KE KATHER, ABER MIR SI DOCH SEHR FULÄ GSI. ZUMGLÜCK GITS JA HÄNGEMATTE. DR TAG ISCH ZIMLECH RUHIG GSI. SI OHNO CHLI AM STRAND GSI, U HA NO PAAR GUETI EMPANADAS GHOUT.
AM NÄCHSTE TAG HEIMER DE FOUS PROGRAMM GHA.
MIR HEI TÖFFÄ GMIETET U SI LOSGFAHRE MITEM ZIU, GO D FLAMINGOS Z LUEGE. DE SIMER DE LOSGFAHRE, ENTLECH WIDR TÖFFFAHRE! MEGA GUET.
CHURZ VOREMNE HOGGER HET ABER PLÖTZLECH MI TÖFF ABGSTEUT, HANE NÜMM CHÖNNE AHLA...
ZWÖI TYPÄ UFEMNE TÖFF SI DE ABGSTIGE U HEIS OH VRSUECHT U HEIS OH NI GSCHAFFT, AUSO BINI UFE TÖFF GSTIGE U SI HEI MI MITEM FUESS VO IHREM TÖFF US GSCHOBE.. ISCH RÄCHT LUSTIG GSI, SO AR POLIZEI VRBIZFAHRE. SI HEIMI DE BIS IS NÄCHSTE DORF GFAHRE. DERT BINI ZUM MECHANIKER GANGE, DÄ HET ES TEILI USTUSCHT, U DE ISCH NERE WITER GANGE.
FÜR 20 MINUTE...
HA DE PLÖTZLECH GMERKT WIENI UFEM TÖFF HIN U HÄR RÜTSCHE, U DE ISCHES Z MITZ IM DSCHUNGU SEHR SEHR HOUPRIG WORDE. MI HINGERREIFE HET DU KE LUFT ME GHA. AUSO HANI ÖPPE 30 MINUTE UFEM PANNESTREIFE LANGSAM MÜESSE DÜRE DSCHUNGU FAHRE, MITEMNE KABUTTÄ PNEU. HET SCHONO GFÄGT.
WONI ÄNDLECH IM NÄCHSTE DORF BI AHCHO HANI DR TÖFF BIMNE LADE HEREGSEUT, WO PNEUS REPARIERE.. DIE HEIMER NERE GSEIT, MIT DEM CHANI NÜMM FAHRE. AUSO HANI DR TÖFF DERT GLA, U BI BIR ANNA UFE TÖFF GSTIGE. DIE VOR VRMIETIG SI DE DR TÖFF GO HOLE. ENDLECH HEIMER OHNI PROBLEM CHÖNNE WITERFAHRE. IRGENDWENN SIMER DE BIM PARK AHCHO, HEI E TOUR BUECHET U SI ÜBER SONE SCHITTERI SANGPISTE ZUR LAGUNÄ GFHARE.. HIE ISCH SCHO FASCH WÜESTI, MEGA SCHWIRIG GSI HIE Z FAHRE, PAAR SI OH UMGHEIT. DERT AHCHO SIMER DE UFENES BÖTLI U SI DÜR TUSIGI VO FLAMINGOS PADLET. DAS HET SCHONO GFÄGT, COOL GSI MAU FLAMINGOS IR NATUR Z GSEH!
NACH DERÄ TOUR SIMER DE NO WITER NACH CAMARONES GFAHRE, ES DÖRFLI IM NO WITER IM NORDE, ÖPPIS GO ESSE AM MEER. WOU GSÄTTIGET SIMER DE WIDR UFE TÖFF U SI AHFA ZRÜGFAHRE. LÄCK SIMER DÜREGHEITZT BIS UF PALOMINO. UFD MINUTÄ GNAU SIMER DE UME ZRÜGG GSI, HEI D TÖFFE JA WIDR MÜESSE ABGÄ. VOR GANZE SUNNÄ SIMER DE MEGA KABUTT GSI, U EXTREM DRÄCKIG. D DUSCHI HET SO GUET DA! NERE SIMER DE NO E PIZZA GO HOLE U HEI NO RÄCHT LANG IM HOSTEL CHILLT U EIFACH GRED.
HÜT, AM LETSTE TAG VO DEM JAHR MACHEMRS ZIMLECH ENTSPANNT, AM ABE DE AH STRAND GO FIRÄ.
IG DÄNKE MIR BLIBE NO BIS AM 2. HIE, DE CHÖIMER DE NO USNÜÄCHTERE U DE GEITS ID RICHTIG SANTA MARTA.
DAS ISCH DR LETST IHTRAG I DEM JAHR. ISCH E COOLI REIS GSI BIS IZE. D FRAG ISCH GENG NO WIES DE WITER GEIT. IG BI GSPANNT.
IG MERKE HIE, WASES FÜRNES PRIVILEG ISCH, WAS IG HIE CHA MACHE. EIFACH FREI SI, CHA MACHE WASI WETT. FÜR DAS BINI SEHR DANKBAR. HOFFE IM NEUE JAHR GEITS SO WITER. FREUE MI DRUF, ABER ZURZIT SETZT MR MINI UNGWÜSSHEIT CHLI ZUE. MUES MI IZE DE MAU WÜRKLECH ENTSCHEIDE, WIE LANG I NO IN KOLUMBIE BI, U WASI HIE NO WETT MACHE. MOMENTAN GSEHTS NACH CALI US. MAU GUGGE.
SOMIT WÜNSCHI AUNE WO DAS LÄSE ES GANZ GUETS NEUS JAHR! HOFFE ES WIRD ES SUPPER JAHR FÜR EUCH AUI.
ETAPPE 19
NEUS JAHR IN KOLUMBIE
SIUVESTER HEIMER 2 MAU CHÖNNE FIRE. AM 6I HEIMER ZERSTE MAU AHGSTOSSE, DENN WE D SCHWIZ NEUJAHR HET. FÜR ÜS GRUND GNUE UM MIT BIER NÄ AHZFAH. NACH DEM BIER HETS DE ZERSCH MAU E DUSCHI BRUCHT. AM NAMI SIMER AUS GO IHCHOUFE, DASMER NERE CHÖI CHOCHE. MIR HEI TORTILLAS GMACHT MIT GANZ VIU GUETE SACHE FÜR DRI. MIR HEI SO SEHR GÜNSTIGS ABER ES MEGA GUETS FESTMAU GHA. ANSCHLIESSEND ABGWÄSCHE U DE HEIMER DI NÄCHSTE BIER U DR RUM USPACKT. NÖI JAHR HIE OHNI RUM CHAME SECH JA NI VORSTEUE. MIR HEI DE GENAU GLICH WIE IM TAYRONAPARK AHFA ES WÜRFUSPILI SPILÄ. SO HEIMERS MEGA LUSTIG GHA BIS ÖPPE AM HAUBI 12. MIT ERE GROSSE GRUPPE VO LÜT USEM HOSTEL SIMER DE NERE AH STRAND FÜRE. DERT SI ÜBERAU PARTYS GLOFFE. DRINKS ZUM AHSTOSSE HEIMER SÄUBER GMISCHT U HEI SO MIT GANZ VIU MÖNSCHE UFS NEUE JAHR GWARTET.
MIT DR ZIT HEISIS NISO GNAU GNO, DIE ERSTE FÜRWÄRCH SI SCHO 5 MIN VORHER LOSGANGE. E COUNTDOWN HETS OH NI GÄ, ABER ES ISCH DE SEHR LUT WORDE. AUI SISECH IDE ARME GHANGET U HEI AHGSTOSSE. SCHONO E COOLI STIMMIG, AM STRAND, STÄRNEHIMMU, FÜRWÄRCH, RUM, GUETI MÖNSCHE U MUSIG. CHÖNNT SCHLIMMER SI. ANSCHLISSEND SIMER DE UF DI BENACHBARTI PARTY GANGE U HEI ÜS DR AHFANG VOM NÖIE JAHR SCHÖN TANZET. HET MEGA VIU LÜT GHA, U HA WIDR MAU VIU TROFFE WOMER IRGENDWO UFDR REIS SCHO MAU SI BEGÄGNET. MIT DENE HETME NATÜRLECH OH MÜESSE AHSTOSSE.
SO ISCH DR ERST TEU VOM ABE VRBIGANGE. DA ISCH DR POSITIV TEU GSI.
I BI DE NÄRÄ AH STRAND, DERT HETME E GROSSI GRUPPE VO MÖNSCHE GSE, WO IMNE KREIS STÖ. AUI HEI Z HANDY DUSSE GHA U HEI FOTOS GMACHT, HAMI ABER GFRAGT VO WAS. ZMITS IM KREIS ISCH NO D POLIZEI GSI. HA DE SCHNÄU GMERKT DAS DERT AM BODE E MA LIGT, ZUEDECKT VORE DECHI, DR POLIZIST HET DENN GAD DECHI UFGLÜPFT... DA ISCH D STIMMIG BERG AB GANGE.
DÄ MA SIG MIT SIRE FROU IDE WÄUE ERTRUNKE, D FROU HETME NI GFUNGE. SCHINS SIG E POLIZIST OHNO ERTRUNKE. DAS ISCH ÜS SCHONO RÄCHT FAUSCH IHGFAHRE. HÄTTI IZE OH NI BRUCHT, GANZ AM AHFANG VO DEM JAHR E LEICHE Z GSE. VORAUEM HANIS MEGA FRAGWÜRDIG GFUNGE, WIE DIE MÖNSCHE EIFACH RUNDUME SI GSTANGE US GFIUMET HEI ODER GFÖTTELET. AHGÖRIGI VO IHM SI IWIE OH NI UME GSI, GANZ SPEZIEU GSI DAS GANZE. MIR SI DE WITR ANE ANGERI PARTY WÜUSI DERT LANGSAM D MUSIG HEI ABGSTEUT.
AM 5I AM MORGE SIMER DE WIDR VRBIGLOFFE U DE SI NUR NO POLIZISTE DERT GSI, RUND UME ISCH ABGSPERRT GSI U Z SCHWÄR BEWAFFNETE MILITÄR ISCH OH UME GSTANGE. DR TYP HEISI ABER IMMERNO EIFACH ZUEDECKT AM BODE LA LIGE, FRAGMI NI WENN SI DÄ HEI WÖUE ABTRANSPORTIERE. OH HÜT DÜRE TAG HETS VIU MILITÄRPRÄSENZ GHA HIE, DA FRAGI MI OB VILICH NI ÖPPIS ANGERS PASSIERT ISCH. WIRDME EUE NI ERFAHRE.
SOMIT ISCHES Z 3. MAU HIE, WOME SO ÖPPIS MITBECHUNNT. DA SIMER IZE ZIMLECH NÖCH DRANN GSI, DI ANGERE MAU HETMES EIFACH ÜBER ANGERI VRNO. SCHINS ISCH VOR DR WIEHNACHT E TOURIST IMNE HOSTEL IM FLUSS ERTRUNKE U CHURZ VOR DEM DASMER IN TAGANGA AM TOUCHE SI GSI, SIG E MA AM STRAND DÜRD MAFIA ERSCHOSSE WORDE, WAS DENN DIE HÖCHI POLIZEIPRÄSENZ ERKLÄRT.
ZRÜGG AH STRAND HÜT MORGE, WO DE Z GANZE MILITÄR ISCH UFKRÜZT ISCHES FÜR ÜS DE Z ZEICHE GSI, HEI Z GA. D ANNA ISCH SCHO AM LIGE GSI U I BI DENN NO MIT ANGERNE UNGERWEGS GSI, ES HET ABER BI AUNE ZIMLECH UFD STIMMIG GSCHLAGE. DE SIMER HEI, HEI DR SANG IR DUSCHI NO ABGWÄSCHE, SO VIU WIE MÜGLECH U SI GO LIGE.
I BI DE UME RÄCHT FRÜE UFGWACHET U BI CHLI ID HÄNGEMATTE. KATHER HANI KENE GHA, BI ABER EIFACH KABUTT GSI. HA SCHO IZE GMERKT DASI HÜT HÖCHSTENS FÜRNE SMOOTHIE, PAAR EMPANADAS ODER Z ZNACHT US DR HÄNGEMATTE WIRDE UFSTA. SO ISCH DR LETST GANZ TAG IN PALOMINO VRLOFFE. NO EINISCH SCHLAFE U DE GEITS ZRÜGG UF SANTA MARTA. DERT WIRDI EI NACHT SI, U NERE EUE RICHTIG CALI GA.
ETAPPE 20
ABSCHID
MITEM BUS HEIL IN SANTA MARTA AHCHO, DASMAU SOGAR OHNI PANNE, SIMER DE MAU DIREKT IS HOSTEL GLOFFE. DERT HEIMER ÜSI SACHE DEPONIERT U HEI SCHÄU HURTI CHLI UF DR DACHTERASSE GLÖIÄT. AM 2 HEIMER DR NÄCHST TERMIN GHA. AUSO SIMER INES TAXI GSTIGE, U SI IRGENDWO INE ANGERE STADTTEU GFAHRE, U SI ZUMNÄ TÄTTOWIERER. DERT HEIMER DOCH DE ES PAAR STUNG VRBRACHT.
NERE HEIMER NO E USFLUG INE GROSSE IHCHOUFSLADE GMACHT, FÜR SO DIE NÖTIGE SACHE WIDR MAU UFZFÜUE, MIT NÖIEM ZAHNBÜRSTLI, DUSCH U ZAHNPASTA + NO E HUSCREMÄ SIMER DE UME IS HOSTEL GLOFFE. DERT HEIMER NO PAAR TROFFE, WO ÜS AH NEUJAHR IN PALOMINO SI BEGÄGNET, HEI PAAR BIERLI GNO U SI DE WITER ID NACHTMEILE GANGE UFD SUECHI NACH ÄSSÄ. MITEM BSTEUIGÄ UFNÄ HEISIS ABER NISO GHA, AUI HEI ÖPPIS ANGERS BECHO AUS SI BSTEUT HEI. SACHE GITS, ISCH ZWAR NI ÜBERRAGEND GSI, ABER MI HETS CHÖNNE ÄSSÄ. AM NÄCHSTE TAG HETS DE ÄNDGÜUTIG GHEISSE ABSCHID NÄ. HIE HEISECH D WÄGÄ VOR ANNA, MIR U VOR GISA US DÜTSCHLAND TRENNT. FÜR MI ISCHES DE UF ZUM FLUGHAFE GANGE U AB INES FLUGI NACH CALI. IZE ISCH SALSA AHGSEIT.
FÜRD ANNA ISCHES MITEM BUS NACH CARTAGENA GANGE U VO DERT US VRLAHT SI NÄRÄ Z LAND NACH PANAMA MITEM ÄNDZIU MEXICO.
D GISA HET DR BUS NACH MEDELLIN GNO, U VO DERT DE DR NÄCHST OH NACH CALI. SO WIES DÖNT ISCHES DOCH EHER E BESCHWÄRLECHI REIS BI IHRE, IG BI SCHO 2 TAG HIE, SI ISCH GENG NO UNGERWEGS. IG HA MR DENKT, MIT MIM GLÜCK UF BUSREISE, DUENI MR DAS NI AH, 2 TÄG IM BUS. WE IG DR BUS HÄTT GNO WÄRES ÄUÄ 4 TÄG WORDE.
HIE IN CALI ACHO BINI DE IS HOSTEL. HA "WIDR MAU" PAAR DÜTSCHI LEHRE KENNE, MIT DENE BINI DE GO ZNACHT ÄSSÄ. AHSCHLIESSEND NO IM HOSTEL ES BIERLI GNO U BI DE BI ZITÄ GO LIGE. DÄ TAG HETMI IRGENDWIE FERTIG GMACHT.
IZE MAU GUGE, WASES Z CALI SO Z MACHE GIT, VIU SÄGÄ USSERT SALSA GITS NI VIU ZUM MACHE. MIR WÄRDES GSE, U WES DE NUME SALSA ISCH DE ISCH OH GUET. I WIRDE IZE HIE ES PAAR TÄG VRBRINGE, NERE ZIEHTS MI EUE DE WIDR MAU ZRÜGG NACH MEDELLIN. HAMR GSEIT DASI UF DERE REIS NOMAU ZRÜGG WETT. VO AUNÄ STÄDT HIE IN COLUMBIE HETSMR DIE AM MEISTE AHDA. OBWOU IG AM AHFANG SCHO ÜBER ZWÖI WUCHE BI DERT GSI, HANI NO NI GNUE GHA VO DERÄ STADT.
DA FREUI MI DRUF.
ETAPPE 21
SALSA DE CALI
CALI, MI HETMI VORGWARNET, ES GÄBI NI AUZUVIU ZUM MACHE, BIS UF SALSA. IM HOSTEL AHCHO ISCHMER DOCH EIS GSICHT SCHO BEKANNT VORCHO. DR SALSA LEHRER, WONI Z MEDELLIN SCHO HA GHA ISCH LUSTIGERWIS OH HIE. DE HANI ÖMU GAD ES PAAR STUNGE BUECHET. WEME SCHO HIE ISCH, DE MUESME DAS SCHO MACHE. CALI HET SINI EIGETI SALSA ART U DIE STADT LÄBT VO SALSA. SCHO AM ERSTE ABE SIMER UFENE GROSSI STRASSEPARTY GANGE, AUI SI AM TANZE GSI. JEDOCH MUESME HIE SCHO RÄCHT UF SINI HOSÄSECK UFPASSE. PAARI HEI D GLÄGEHEIT WÖUE NÜTZE, ABER WEMES RÄCHTZITIG BEMERKT U ME IRE GRUPPE ISCH, DE PASSIERT NIX. AUZU LANG HANI ABER OH NI MÖGE. BI DE IS HOSTEL GO LIGE.
AM NÄCHSTE TAG HETSECH MIS DASI HOUPTSÄCHLECH UFE STADTTEU SAN ANTONIO KONZENTRIERT. HA HIE KAFFEES ABKLAPPERET U NACH GUETE RESTAURANTS GSUECHT. GEGE ABE HANI DE UME E SALSASTUNG GHA, NERE HETS BIER IM HOSTEL GÄ. MIT PAARNE DÜTSCHE BINI DE GO ZNACHTESSE. AHSCHLIESSEND, WÄR HETS DÄNKT, SIMER DE WIDR I SALSA USGANG. DIE TANZE HIE SCHO IRE ANGERE WÄUT, ISCH ABER MEGA LUSTIG IMMER WIDR CHLI Z VRSUECHE MIT DE IHHEIMISCHE, VORAUEM D SCHRITTE WOME DÜRE TAG HET GLEHRT CHLI Z FESTIGE. ABER VIUFACH HEIMER OH EIFACH CHLI BEOBACHTET U GNOSSE. ISCH SCHO ES SPEKTAKU WIESI TANZE.
DR NÄCHST TAG HANI CHLINES TÖIF GHA, BI EIFACH CHLI IR HÄNGEMATTE UMGEGLÄGE, HA EUE ÖPPIS Z ESSE NISO GUET VRTREIT. ABER ISCH DE SCHNÄU UME GANGE. AM ABE SIMER DE GO ESSE, U NERE HET UFEMNE PLATZ, WIE JEDE DONSTIG, E GMEINSCHAFTSTANZ STATT GFUNGE. ES HET PAAR INDIGENI TANZLEHRER GHA, U MIT DENE HETME IRE RISIGE GRUPPE ZU TRADITIONELLER MUSIG TANZT. HET MEGA GFÄGT U ISCH E SUPPER STIMMIG GSI! ES ISCH VORAUEM UMS MITMACHE GANGE, OH WEME D SCHRITTE NI HET KENNT. DA SIMER BI WITEM OH NI DIE EINZIGE GSI. WO DAS ISCH FERTIG GSI, SIMER DE NO INE BAR GANGE U HEI SO DR ABE LA USKLINGE.
AM NÄCHSTE MORGE ISCH DE E STREETFOODTOUR AHGSEIT GSI. MIR SI DÜR SAN ANTONIO GLOFFE, HEI ÜBERAU IMMER WIDR ÖPPIS Z ÄSSÄ BECHO U HEI CHLI VOR KULTUR VO CALI MITBECHO. AM SCHLUSS ISCHME UFEM MARKT GLANDET, WOMER ÜS WIDR MAU DÜR AUI MEGA GUETE FRÜCHT HEI CHÖNNE DÜREPROBIERE, NERE HETS IHHEIMISCHES ESSE GÄ, LIMONADE U KAFFEE. HET MEGA GFÄGT.
D GISA ISCH MITLERWILE OH IN CALI AHCHO U ISCH DE NO DRZUE GSTOSSE. AM ABE SIMER DE AUI ZEME IMNE QUARTIER, WOS MEGA VIU RESTAURANTS HET GHA, GO ZNACHT ESSE. MIR SI NO DERT BIS ÖPPE AM 3 AM MORGE GSI, DE HANI DU DE EIS HEI MÜESSE. AM 6I ISCHES DE LEIDER SCHO UME WITERGANGE ZUR BUSSTATION FÜR WIDR ZRÜGG UF MEDELLIN! I FREUE MI!
CALI HET GFÄGT, GWÜSSI SACHE HETME CHÖNNE MACHE, ABER Z MEISTE ISCH WÜRKLECH SALSA GSI. MIT DENE PAARNE NÖIE SCHRITTE IM REPETOIRE CHANI JA Z MEDELLIN VILICH OHNO ÖPPIS AHFA.
ETAPPE 22
MEDELLIN AUS ABSCHLUSS
ES ISCH WIENES HEICHO, AUS HIE IN MEDELLIN FÜÄUT SECH SO VRTROUT AH, IM GÄGESATZ ZU CALI U SANTA MARTA FÜÄUT ME SECH OH EIFACH VIU SICHERER. MI LOUFT DÜRD STRASSE, U VIU ISCH EIM SCHO VRTROUT. ES FÜEUT SICH GANZ ANGERS AH, AUS NO GANZ AM AHFANG, WO COLUMBIANISCHI KULTUR NO NEULAND ISCH GSI.
DIE LETSTÄ PAAR TÄG MEDELLIN HANI MIT CHLINERE AKTIVITÄTE VRBRACHT U HA SACHE GMACHT, WONI EIFACH NO ODER NOMAU HA WÖUE MACHE:
EMPANADAS ÄSSÄ.
ALFAJOR ÄSSÄ (SI SO ZWÖI SHORTBREAD GÜETZI, ZÄMÄGCHLÄBT MIT KONDÄNZMIUCH.U UMMANTLET MIT KOKUSNUSS).
ZWÜSCHEM ÄSSÄ SMOOTHIES TRINKE.
FRÜCHT ÄSSÄ, VORAUEM DIE WONI NI KENNT HA.
IDE HOSTELS HÄNGEMATTE TESTÄ.
DRZUE GITS ES SMOOTHIE.
VILICH NO EINISCH GA FIRE.
Ä LUSTIGE KATHER TAG HET OHNO PLATZ.
DRZUE GITS NID NUMÄ EIS SMOOTHIE.
ES TATTOO LIGT OHNO DRINN.
NACHEM TATTOO, D NÄRVE GO STIUE MIT EMNE EMPANADA.
DRZUE HETS ES SMOOTHIE GÄ.
GO GONDUBAHN FAHRE. U IDÄ PÄRK GO CHILLE MITÄRÄ GUETE USSICHT.
MIT DR USSICHT HETS NO ES SMOOTHIE GÄ
JE NACH DEM SOGAR ES ALFAJOR.
MINI SACHE PACKE, SO DAS AUS PLATZ HET.
ISCH DOCH KNAPPER GSI MITEM PLATZ AUS DÄNKT.
ZUR BELOHNIG HETS ES SMOOTHIE GÄ.
MI NO MIT LÜT TROFFE, WOME UNGERWEGS HET LEHRE KENNÄ.
MIR SI GO ES SMOOTHIE TRINKE...
AM SCHLUSS HANI MI IR HÄNGEMATTE UF MI LÄNG REISETAG VORBEREITET.
DAS VORAUEM MITEMNE SMOOTHIE.
D HEIREIS HET FRÜE AHGFANGE. I BI DENN UFGSTANGE, WO ANGERI VOM HOSTEL SI HEICHO VOM FIRÄ. SO HANI MI AM HAUBI 5I UFÄ WÄG ZUM FLUGHAFE GMACHT. DR ERST FLUG GEIT NACH BOGOTA. MITEMNÄ KAFI HANI MI DE AM FLUGHAFE VO MEDELLIN VRABSCHIDET U SI PÜNKTLECH ABGFLOGE. IN BOGOTA HANI MIS GEPÄCK GHOUT U BI ÖPPIS GA ESSE. HA MEGA VIU ZIT GHA. 6 STUNG AM FLUGHAFE IN BOGOTA FÜEUT SICH NO LÄNG AH. SO HANI DE MIS GEPÄCK IHCHECKT U BI DÜRD SICHERHEITSKONTROUE. DA DS DIE FÜR DI INTERNATIONALE FLÜG ISCH GSI, ISCHME ZU DÄ ÜBLECHE KONTROUENE NO ABTASTET U AUS DÜRSUECHT WORDE. LUSTIGERWIS NUME D MÄNNER. HET RICHTIG VIU ZIT BRUCHT, WONI JA EIGENTLECH HÄTT GHA, WONI ABER DUSSE HA WÖUE VRBRIGÄ WONI SACHE CHA ESSE. HAS JA NI GWÜSST GHA. HET JA DE LETSTENDLECH OH KLAPPT, WÜUSI DÜR WITERI SICHERHEITSKONTROUE DR FLUG HEI VRSPÄTET. BIM BOARDING ISCHES EXTREM LANGSAM VORWÄRTS GANGE. SI HEI KOMISCHERWIS IMMER NUME GANZ CHLINI GRUPPE INEGLA. WONI DE DRANN BI GSI, ISCHES DE EIM KLARWORDÄ WISO.
VOREM IHSTIG IS FLUGZÜG HEISI AUI NOMAU DÜRSUECHT. MÄNNER HEI ADI LINGI WANG MÜESSE, FROUE A DI RÄCHTI WANG. Z GEPÄCK ISCH IR MITTI AM BODÄ GSI U MI HETS MÜESSE UFDUE. BIM GEPÄCK SISI MITEM HUNG DÜRE. U HEI PAARI DÜRSUECHT. DRZUE HEISI NUMÄ D MÄNNER NOMAU ABTASTET, DAS GANZ GRÜNDELCH. FROUE HEISI ÄUÄ NI, WÜUSI KE FROU DRBI HEI GHA. SO SIMER NACH 1.5 STUNG VRSPÄTIG DE IM FLUGZÜG GHOCKET. PLÖTZLECH LOUFE UME POLIZISTÄ MIT HÜNG IM FLUGZÜG UME. STICHPROBEARTIG MÜESSE USERWÄUTI WIDR UFSTA, U WÄRE WIDR ABTASTET U DÜRSUECHT. MIT 2.5 STUNG VRSPÄTIG SIMER DE ABGFLOGE. DR FLUG ISCH ABER US PLATZMANGU, DRUS ENTSTEHENDR UNBEQUEMHEIT U DUMME LÜT, WOSECH NI MIT EM FLIGHTATTENDENT VRSTÖ, NI WAHNSINIG ENTSPANNEND GSI. ERSTUNLÄCHERWIS HEIMER AUS BIS UF 30 MIN CHÖNNE UFHOLE. Z PROBLEM ISCH, DASI Z BARCALONA NUMÄ ANGERHAUB STUNG UFENTHAUT HA GHA. SO HANI CHLI MÜESSE STRESSÄ. BI ABER SCHÖN PÜNKTLECH BIM GATE GSI. SO BINI NO UF ZÜRI GFLOGE U HA UF MIS GEPÄCK GWARTET. LEIDER HANI DE MÜESSE USEFINGE DASES NO NI IR SCHWIZ ISCH.
HOFFÄMR MAU, DASIS RÄCHTZITIG WIRD BECHUME. HA NUMÄ 4 TÄG ZIT, NÄR GEITS WITER.
KOLUMBIE HETMR GFAUE. ES ISCH ES MEGA SCHÖNS LAND MITERE RICHÄ KULTUR URÄ EXTREM BEWEGTÄ VRGANGEHEIT. MI ERFAHT VIU SCHOCKIERENDS, ABER OH SEHR VIU SCHÖNS. ES ISCH KRASS, WIE SECH D MÖNSCHE ORGANISIERT HEI, TROTZ DERÄ VRGANGEHEIT. HIE SIS OH WÜRKLECH D MÖNSCHE GSI, WÜU D REGIERIG NI VIU GMACHT HET.
I HA DIVERSI HIGHLIGTS DÖRFE ERLÄBÄ. GANZ WIT VOR ISCH WIEHNACHTE U DIE GANZI ZIT IM COSTEÑO HOSTEL GSI. ISCH EIFACH WUNDERBAR GSI. DR TAYRONAPARK U D ZIT IN PALOMINO SI OH GANZ WIT VORÄ GSTANGE. HA TROTZ AUEM SEHR GUETI LÜT LEHRE KENNE. EIFACH MIT DÄ BUSFAHRTE HANIS NISO GHA, E PANNE HET FASCH IMMER DRZUE GHÖRT.
I CHAS JEDEM WITEREMPFÄHLE, ABER VILICH NI ALEI. SO WIE VIU ANGER ALEIREISENDI, HA OH IGS CHLI SCHWIRIG GFUNGE, ALEINI HIE Z REISE. DÜR DAS DASES GRÜPPLI AH REISENDE GIT, ISCHES NO SCHWÄR, LÜT Z LEHRE KENNE, WOME VILICH DE OH MITNE MIT REIST. IM VRGLICH Z ANGERNE LÄNDER, HANI MI IRGENDWIE OH PERMANENT CHLI UNSICHER GFUNGE. MI VRNIMMT HAUT OH VIU GSCHICHTLI VO ANGERNE REISENDE, WAS HAUT CHA PASSIERE IN COLUMBIE.
DIE ZIT MIT DR RAPHAELA U DR ANNA ISCH ABER SUPER GSI!
AM MEISTE WIRDI VORAUEM EUE D FRÜCHT U DR GUET RUM VRMISSE.
SO GEIT Z KAPITU COLUMBIE VRBI U I FREUE MI UFS NÄCHSTE WO IZE NACH PAAR TÄG UFENTHAUT IR SCHWIZ WIDR AHFAHT. HOFFENTLECH HANI BIS DENN MIS GEPÄCK!