Vietnam 2023
ETAPPE 01
HANOI
ZRÜGG IN VIETNAM! SO GUET! I LIEBE HANOI EIFACH. E STADT MIT MEGA VIU CHARM, GUETME ESSE, ES RISE VRCHERSCHS-CHAOS, VIU LÜT, GUETI HOSTEL U VIU ZUM MACHE. OBWOU IG HIE ES VISA FÜR 30 TÄG HÄT, WIRDI NUR PAAR TÄG IN VIETNAM VRBRINGE. HANOI HANI NOMAU HERE WÖUE, U IN HOIAN WETTI PAAR SACHE ERLEDIGE U VORAUEM BAHN-MI ÄSSE. VILICH GITS DE DERT NO ES PAAR MASSGSCHNIDERETI CHLEIDIGSSTÜCK. MIR WÄRDES GSE. IN VIETNAM WIRDI WAHRSCHINLECH ÖPPE 2 BLOG-IHTRÄG MACHE, DA IG HIE VORAUEM SACHE WIRDE ABKLAPPERE WONI SCHO GMACHT HA, WONI ABER WIDR HÄRE HA WÖUE. VORAUEM WIRDI VIETNAM AUS HUB BRUCHE, UM NERE VO HOIAN NACH SIEM REAP IN KAMBOTSCHA Z CHO. DER WIRD DE Z ÄND VO MIRE REIS IHGLÜTET, WONI DI RÄSTLECHE TÄG CHA VRBRINGE. SO NIMMT MINI REIS IZE HIE SCHO MAU ES ÄND, ZWAR HÖRT MINI GMEINSAMI REISEROUTE MIT DR ANNA US DR USA UF. SI ISCH E SUPPER REISEBUDDY GSI, MIR HEI DOCH E GROSSE TEU VO ÜSERE SÜDOSTASIE TOUR ZEME VRBRACHT. ES ISCH SCHÖN, ÖPPER HIE ZHA, VORAUEM FÜR DIE LENGERE REISEROUTE. ISCH IMMER GUET WEME DIE NI ALEI MUES MACHE U WEME HAUT IRGENDWO MAU GSTRANDET ISCH, DASME DENN NI ALEI ISCH. UNGERWEGS HEIMER VIU ZEME GMACHT, ABER JEDE HET OH EIFACH SIS EIGETE DING IMMER WIDR CHÖNNE MACHE. SO HEIMER ÜS SEHR GUET VRSTANGE U HEI EIFACH DAS CHÖNNE MACHE, WOMER BOCK DRUF HEI GHA. SO ISCH DAS WAHRSCHINDLECH DOCH EINE VO DENE REISEFRÜNDSCHAFTE, WO LENGER WIRD BESTANG HA. OH FÜRD ZUEKUNFT, WENI MAU UF NEW YORK ODER PHILADELPHIA WETT, HANI E ORT WONI HERE CHA, U SI GENAU SO WESI MAU WIDR ID SCHWIZ WETT.
DIE PAAR TÄG IN HANOI IZE WIRDI MIT ESSE U UMELOUFE VRBRINGE. ERSTI SACHE WIE E PHO SUPPÄ ODER ES EGG-COFFEE HANI SCHO GHA. ISCH WIDR EIFACH UNGLOUBLECH FEIN GSI. WIRD OH NI Z LETSTE GSI SI. WAS WITER WIRD PASSIERE HIE, WÄRDE MR GSE.
ETAPPE 02
ABSCHIED
HANOI HETSECH UME GLOHNT. IRGENDÖPPIS ISCH A DERE STADT EIFACH MEGA GUET. VILICH ISCHES D MISCHIG ZWÜSCHE DE CHAOTISCHE ZUESTÄNG VORE ASIATISCHE STADT, EM CHARM VOR AUTSTADT, DÄ LÜT U EM FEINE ÄSSE. ES HET EIFACH ÖPPIS DIE STADT. ZUM GLÜCK HANI MI DRZUE ENTSCHIDE WIDR DAHERE Z CHO, NI NUME WÄGE DE EGG-COFFEES U DE PHO SUPPE. MIR HEI E SUPPER ENTSPANNTI ZIT GHA U DAS NI NUME WEGE DE WUNDERBAR U GÜNSTIHE MASSAGE. ZEME MIT DR ANNA U DR AMANDA HEIMER SO ÜSI LETSTE GMEINSAME TÄG VRBRACHT. DR KRÖNEND ABSCHLUSS ISCH E NACHT UF DR TRAINSTREET U NERE UF DR BEERSTREET GSI. WIDR MAU Z NACHTLEBE VO HANOI CHÖNNE Z GNIESSE ISCH SCHO SEHR SPEZIEU. ES LOUFT EIFACH MEGA VIU, AUI RESTAURANT U BARS STUELE WIT UFD STRASS USE, OBWOU SI DAS NI DÖRFE. IMMER WE D POLIZEI WIDR MIT EM NE PICKUP VOU POLIZISTE VRBICHUNNT, MUESME Z ESSE U Z BIER PACKE U SCHNÄU IHNE GA BISI WÄG SI. MIT DENE CHLINE PLASTIGTISCHE U STÜEU GEIT DAS JA ZIMLECH SCHNEU. DINNE ISCHES NERE AUBE HURTI GUET ÄNG, DA SO VIU MÖNSCH I DI CHLINE RESTAURANT INEGSTOPFT WÄRDE ABER JA. IG CHA DIE STADT NUME EMPFÄHLE. WIRD EUE OH NI Z LESTE MAU GSI SI WONI HIE BI. DÄ CHARAKTER VO DERE STADT HANI BISHER EIFACH NO SICHER I KERE ASIATISCHE STADT VRNO, ABER OH VO VIUNE STÄDT IN EUROPA ODER OH SÜD UND ZENTRAUAMERKIA KENNI DAS NI. I WIRDES VRMISSE, ABER JA, BIS ZUM NÄCHSTE MAU! IZE GEITS UF HOIAN.
ETAPPE 03
HOIAN
HOIAN, I WIRDE DIE 4 TÄG I EIM BRICHT VRFASSE. FÜR MI ISCH DAS E ZWÜSCHEPHASE HIE. NACH ERE LANGE ZIT, WONI MIT VIUNE MÖNSCHE UMHER BI GREIST, I DORMS VO HOSTELS GSCHLAFE, WO DOCH ZUMTEU ERSCHREKENDI ZUESTÄNG SI GSI, WOMER HAUT GMACHT HEI WÜUS GÜNSTIG ISCH, WOMER VIU UNGER NO HEI, U OH VIU IM USGANG SI GSI, BRUCHI DAS HIE UM WIDR MAU CHLI RUE LA IHZCHERÄ BEVOR MINI LETSTI REISE ETAPPE AHFAHT. Z ERSTE WONI HIE HA GMACHT ISCH NATÜRLECH ES BAHN MI GO ESSE. DA BINI BIRE FAMILIE VRBI GANGE, WONI VOM LETSTE MAU NO KENNT HA. LETST MAU BINI SO OFT DERT GO SONES BERÜEMTS SANDWICH ESSE, DASI MI A MIM LETSTE ABE HEI ZUM ZNACHT BI IHNE DAHEI IHGLAD. U OH IZE WIDR.. ES ISCH SO UNGLOUBLECH FEIN GSI DAS SANDWICH... CHUME AUBE CHUM USEM SCHWÄRME USE. Z SCHÖNE ISCH GSI, DASI MI VO AHFANG AH WIDR HEI ERKENNT, SI HET DR FAMILIE AHGLÜTE U NACH 20 MIN SI AUI DA GSI U HEISECH GFREUT DASI WIDR Z BSUECH BI. MIR HEI DOCH NO RECHT LANG GREDT, WIES MIR GEIT, WIES IHNE ISCH GANGE GAD VORAUEM IDE LETSTE JAHR MIT CORONA, WOSI AUS HEI MÜESSE ZUEDUE. ISCH DOCH SEHR BEDRÜCKEND WIE DAS AUS HIE ISCH GLOFFE OHNI TOURISMUS, MIT VIU KORRUPTION, OHNI CHANCE UF GÄUD Z VRDIENE. SCHÖN HEISIS AUI SO GUET ÜBERSTANGE!
MINDISTENS EINISCH TÄGLECH BINI DE AUBE VRBI GANGE FÜR SONES BAHN MI. WUNDERBAR! E NÄCHST STATION ISCH DR BA BI FASHION LADE GSI, WONI LETST MAU HA MI AHZUG LA MACHE. HIE HEISI SECH OH MEGA GFREUT, BINI ZRÜGG CHO, U HEIMER DOCH E SAFTIGE DISCOUNT AHBOTE. DÄ HANI USGNÜTZT U HAMI CHLI LA GA, VILICH SOGAR Z VIU. LETSTENDLECH BINI MIT ZWÖI HEMLI U 3 HOSE USE. D BANANA, D INNHABERIN, HETMI DE I LADE NEBE DRANN BRACHT ZU IHRE SCHWÖSTER WHY NOT. DERT HANI EIGENTLECH EIFACH NUR ES PAAR LÄDER FLIPFLOPS WÖUE LA MACHE. DA ABER DR DISCOUNT DERT OH HET GUUTÄ, HANI ES PAAR LÄDERSCHUE U ES PAAR LÄDERSTIFU LA MACHE. NATÜRLECH WIE OH D CHLEIDER PERFEKT UFD MINI KÖRPERMASS AHPASST. WONI DE AM NÄCHSTE TAG VRBI BI UMD SCHUE GO Z PROBIERE, HANIMI DE NO ZU ZWÖI LÄDERTÄSCHE LA ÜBERREDE. DAS MITTLERWILE I MIM RUCKSACK SEHR ÄNG ISCH WORDE, U IG MI HIE DERART HA LA GA, HEISI MR AHBOTE DAS AUS HEIZSCHIKE. SO HANI DI CHLINI TÄSCHE, WONI DE FÜRS SCHAFFE CHA BRUCHE, MIT 2 PAAR SCHUE LA VRSCHIFFE. DIE GROSSI BRUCHI IZE AUS HANDGEPÄCK. D CHLEIDER HEI NO GAD HÄB CHLÄB PLATZ GHA IM RUCKSACK. SO HANI DOCH NO ES ORDENTLECHS PROGRAM IN HOIAN UFD REIE BECHO. NEBEAU DEM SHOPPÄ HANI MI ABER OH GUET CHÖNNE USRUIHE. Z HOSTEL ISCH OH SUPER CHILLIG GSI. SOGAR FÜRNE STRAND TAG HETS NO GLÄNGT. U OH HIE, OBWOUS DOCH SEHR SEHR TOURISTISCH ISCH, WIRDI SICHER UME HERE GA. MIT DENE VOM BAHN MI LADE ODER OH VOM BABI FASHION LADE HEIMER GWITZLET DASMR ÜS I 3 JAHR UME GSEH. WÄR WEIS! IRGENDWENN SICHER UME, HAUT DE WENI NEUI CHLEUIDER U SCHUE BRUCHE.
IZE ERWARTET MI UME ÖPPIS NEUS. AB UF SIEM REAP IN KAMBOTSCHA. DA BINI EXTREM GSPANNT DRUF WIE DAS WIRD. NUME GUETS GHÖRT VO DERT!