ETAPPE 01
LUANG PRABANG
AB GEITS UF LAOS! MITEMNE OUTO SIMER ABGHOUT WORDE U ZUR GRÄNZE BRACHT WORDE. DERT HEIMER DR USREISESTÄMPU GHOUT VO THAILAND. NERE SIMER DÜRE ZOLL GANGE U HEI UFENE BUS GWARTET. DÄ HET ÜS DE ÜBERE MEKONG U ÜBERD FRIENDSHIPBRIDGE 4 ZUR GRÄNZKONTROUE VO LAOS BRACHT. AUS SCHWIZER ISCHES HIE DOCH SEHR PRAKTISCH, MIR HEI HIE 14 TÄG VISAFREI IHTRITT. NACH DEM DASI DERT MI STÄMPU AR GRÄNZE HA BECHO, SIMER DE MITEM TUC TUC AH BUSBAHNHOF BRACHT WORDE. ES ISCH E GANZI FAMILIE GSI, WOSECH UM MI UD KOLEGIN KÜMMERET HET. SI HEI ÜS DIREKT E NÖI LAOTISCHI SIMCHARTE ID HÄNG DRÜCKT, HEI ÜS Z BUSTICKET ORGANISIERT U AUS ANGERE ERLEDIGT. SO ISCH DAS SEHR GÄBIG GANGE. AM SCHLUSS HEIMER DE ÖPPE NO E STUNG ZIT GHA, UM ÖPPIS GO Z ESSE, BEVOR DR SCHLAFBUS ISCH ABGFAHRE. Z ABENTÜR ISCH AUSO LOS GANGE. ES CHÖME DIREKT ERINNERIGE AH VIETNAM UF I DÄM BUS. ES SI DI GLICHE BUSÄ, WIES IN VIETNAM OH HET GÄ. USGSTATTET MIT DENÄ BETTÄHNLECHE SITZE WO ÜBERENANG GSTAPLET SI, ISCH D REIS FÜR DIE ERSTE STUNGE DOCH SEHR ERTRÄGLECH. JEDOCH HEI HAUT GROSSI MÖNSCHE DOCH HEFTIGI PLATZPROBLEM, DA DR BUS HAUT FÜR CHLIGWACHSNIGI ASIATE USGLEIT ISCH. WEME DENKT, DASMR VOM 17.00 BIS AM 07.00 AM NÄCHSTE MORGE I DEM BUS WÄRDE SI, FÖH EIM D BEI DIREKT AHFA WEH DUE.
DR BUS ISCH LOSGFAHRE U DÜRD STRASSE SIMER DIREKT ERINNERIGE AH SULAWESI ODER NICARAGUA UFCHO. ES HUDLÄT EIFACH NUME, D STRASSE SI PRAKTISCH EIS GROSSES SCHLAGLOCH. ISCH DOCH E SEHR ABENTÜRLECHI FAHRT WORDE, WOBIS OH HÄT CHÖNNE SCHLIMMER SI. Z MITS IR BUSFAHRT HET DE DR TAG GWÄCHSLET, U ES SI PLÖTZLECH GANZ VIU MÖNSCHE UM MI GSTANGE U HEIMER GRATULIERT. DAS HET NATÜRLECH D KOLEGIN IHGÄDLET GHA. GSCHLAFE HANI NI WÜRK VIU, D KOLEGIN HET ABER PRAKTISCH DÜREPFUSET. WOMER DE ÄNDLECH IN LUANG PRABANG SI AHCHO HANI JEDOCH GAR KES GFÜEU VO MÜEDIGKEIT EMPFUNGE, SONDERN I MIR INNE HETSECH E SEHR GROSSI EUPHORIE BREIT GMACHT. IRGENDWIE HETSECHS AHGFÜEUT WIE MIS REISE ABENTÜR ERSCH IZE WÜRD STARTE. GLICHZITIG HETSECH THAILAND IM RÜCKBLICK IZE AHGFÜEUT WIENI EIFACH CHLI FERIE HA GMACHT, U IZE FAHT Z ABENTÜR AH. IG GLOUBE DAS HANGET OH CHLI MIT DR HOUPRIGE BUSFAHRT U DE STRASSEVRHÄUTNISS ZEME. ISCH HAUT LANG NISO GUET USBOUE WIE NO IN THAILAND. ZUDÄM HEIMER ERSCH RÄCHT SPÄT GMERKT, DAS MR HIER AR ENDSTATION SI, ÜSI RUCKSECK SI DUSSE UMEGLÄGE, SO HEIMER DIE GNO U HEI MAU MÜESSE USEFINGE WOMER SI U WIES WITER GEIT. SO SIMER DE MIT EMNE TUC TUC ZUM HOSTEL BRACHT WORDE, WOMER ÜSI SACHE DEPONIERT HEI U ÜS NERE ES USGIBIGS ZMORGE GÖNNT HEI. DA SIMER ID ZURICH BAKERY GANGE. E SCHWIZER BSITZER HET HIE DIE BÄCKEREI UFGMACHT. D VRLOCKIG U MIS VRLANGE NACH GUETEM BROT, ÖPPIS WONI EUE FASCH AM MEISTE VRMISSE AH DAHEI, ISCH GROSS GNUE GSI, DASI MI DERT EIFACH DÜRD SACHE HA DÜREBROBIERT. D GIPFELI, D SURTEIGBROT U AUS SI EIFACH GENAU SO GSI AUS WÄRME IR SCHWIZ. LÄCK HANI DÄ BITZ BROT MIT CHLI ERDBEERGONFI GNOSSE!
MITEMNE UNGLOUBLECH VOUE BUCH SIMER DE WIDR ZRÜGG ZUM HOSTEL, UNGERWEGS HEIMER ABER NO E ROLLE USGLEHT. MIT DÄM SIMER DE VOM HOSTEL ÖPPE E STUNG INE PARK GFAHRE, WOME UNGLOUBLECH SCHÖNI WASSERFÄU WO SO TÜRKISFARBIGI POOLS MACHE, CHA GSE. BADE CHAME ZUMGLÜCK OH. SO HEIMER DER AM NAMI CHLI GSÜNNELET, SI CHLI UMEGWANDERET U SI CHLI I DENE POOL UMHÄR GSCHWUMME. NACH DERE LÄNGE BUSREIS ISCH DAS DOCH SEHR SEHR ERHOUSAM GSI!. IRGENWENN HEIMER ÜS DE ABER WIDR UFE WÄG ZRÜGG GMACHT.
ZRÜG IN LUANG PRABANG SIMER DE GO DUSCHE U HEI ÜS READY GMACHT FÜRD NACHT. D KOLEGIN HETMI MITEMNE MEGA FEINE INDISCHE RESTAURANT ÜBERRASCHT. HIE HEIMER ÜS MIT SEHR VIUNÄ DIVERSE GRICHT LA VRWÖHNE, DRZUE HETS UNGLOUBLECH VIU CHNOBLINAAN (INDISCHES CHNOBLIBROT) GÄ. SCHOWIDR MITEMNE VOUE BUCH SIMER DE IS HOSTEL ZRÜGG GO VRDOUÄ. HIE SIMER UFENE GRUPPE VO REISENDE GSTOSSE. MIT DENE HEIMER DE AHFA SPILI SPILE U HEI CHLI BIER GNO. IN LAOS HETS CHLI DIE GLICHE REGEL WIE OH IM NORDE VO VIETNAM. AUI BARS DÜE AM 23.00 ZUE. ES GIT HIE ABER EI ORT, GNAU GSEIT E BOWLINGBAHN, WO BIS AM 02 OFFE HET. DA TUMMLÄ SECH NERE AUI IHHEIMISCHE U AUI REISENDE. DAS ISCH OH ÜSES ENDZIU GSI. IRGENDWIE HETSECH DAS HIE AHGFÜEUT WIE UFEMNE CHINDERGEBURI IR USA, NUR HEISI ANSTATT COLA, VODKA U BIER SERVIERT. MIT ÜSEM GRÜPPLI HETS DE DOCH UNGLOUBLECH VIU SPASS GMACHT U HA SOMIT E WUNDERBAHRE U VOUGSTOPFTÄ GEBURI CHÖNNE ABSCHLIESSE. DÄ TAG HET IRGENDWIE EIFACH AUES GHA WONER HET BRUCHT, OH WED BUSFAHRT CHLI BESCHWÄRLECH ISCH GSI. BESSER HÄT DR TAG U OH DR START IN LAOS NI CHÖNNE SI! FREUE MI IZE UNGLOUBLECH DRUF, WASMI IN LAOS WIRD ERWARTE. IG HA Z GFÜEU DASES MEGA GUET WIRD.
ETAPPE 02
LUANG PRABANG
NACH DEM WUNDERBARE GEBURI HEIMER ÜS CHLI E ENTSPANNTERE TAG GÖNNT. SI GUET GO ZMÖRGELE U NERE ISCH E POOL TAG AHGSEIT GSI U DR ZUE HEIMER CHLI ÜSI REIS BESPROCHE U CHLI GLÖIET. ENTSPANNT SIMER NERE RICHTIG NIGHT MARKET GO ZNACHTESSE. ES HET UNGLOUBLECH VIU ESSENSSTÄNG MIT VIUNE TISCHE, Z ESSE ISCH EIFACH DR WAHNSIN. IG HA ZERSCH DENKT DASES DE ÄHNLECHER WIRD WIE THAILÄNDISCH, ABER ZUMTEU VAREIERTS RÄCHT. Z FRITIERTÄ SEEGRAS USEM MEKON HETS MR BSUNGERS AHDA. NACH DERÄ FEINE MAUZIT SIMER ÜBERE MÄRIT GLOFFE, MIT EM ÄNDZIU INE BAR GO CHLI WII NÄ. LETSTÄNDLECH SIS DE DOCH ZWÖI FLÄSCHE WORDE. SO HEIMER ES SEHR LUSTIGE ABE GHA.
AM NÄCHSTE MORGE SIMER EIFACH MITEMNE ZIMLECH SCHWÄRE CHOPF UFGWACHET. SO HEIMER NATÜRLECH MAU GMÜETLECH, ABER ZÜNFTIG, ÖPPIS ZMORGE HA. SO HEIMER DR TAG I ÜSERE LIEBLINGSBÄCKEREI GSTARTET U HEI ÜSES PROGRAM VOM TAG BESPROCHE. DR ERST PUNKT ISCH MAU Z BOMBÄ MUSEUM GSI. ZERSCH HANI DENKT, DASES DE ÄHNLECH WIRD SI WIE DENN IN HO CHI MING CITY, ABER DA HANI FASUCH DENKT. ES ISCH ES MUSEUM VORE NON PROFIT ORGANISATION, WO VOR UNO U VO GANZ VIUNÄ LÄNDER, DRUNGER OH D SCHWIZ UNGERSTÜTZ WIRD.
ES GIT KES LAND UF DR WÄUT, WO ME ZERBOMBT ISCH WORDE AUS LAOS. NIMAU DÜTSCHLAND IM ZWÖITE WÄUTCHRIEG HET ME BOMBE ABBECHO. DA IM VIETNAMCHRIEG D VIETKONG USEM NORDE ZUMTEU SI NACH LAOS USGWICHE, HEI D AMIS HIE FLÄCHEDECKEND AUES ZERBOMBT. D VIETNAMESE HEI LAOS AUS NACHSCHUBRUTE U VRSTECKMÖGLECHKEIT BRUCHT. SO HETSECH DR HO CHI MING PFAD DÜR GANZ LAOS ERGÄ. ENTLANG DEM HETS AM MEISTE BOMBE, MIENÄ, RAGETÄ, CLUSTERBOMBE U NO VIU ME GRÄGNET.
IM MUSEUM STEI E ZAU VO ME AUS 60 MILIONE BOMBE WO SI HEI LA GHEIÄ. NEBE DRANN STEIT, DAS ÖPPE 40% VO DENÄ NI SI EXPLODIERT. SO LAUERE DIE GANZE GRANTE U SPRÄNGKÖRPER IMMER NO UNGER DR ÄRDÄ. NO HÜT STÄRBE JÄHRLECH ME AUS 100 LÜT AH EXPLOSIONE VO DENE VRSCHOLLENE BOMBE. CHING SUECHE IR ÄRDE NACH WÜRMER FÜR GO Z FISCHE U WÄRDE DRBIE ID LUFTGSPRÄNGT. BIM FÜRMACHE, RISSTÄCHE ODER BIM GRABE CHA GENAU Z GLICHE PASSIERE. RISIGI CLUSTERBOMBE WO HUNDERTI CHLI CHUGLE DINN HEI WO AUI EXPLODIERE CHÖI E FLÄCHI VO 3 SCHUTTFÄUDER LA ID LUFT GA. I DEM UMREIS WIRD DIE MUNITION VRSTRÖIT, DEMENTSPRÄCHENT UFWÄNDIG ISCH Z ABSUECHE NACH DENE RÄSTBESTÄNG.
WAS DIE ORGANISATION MACHT ISCH DAHER ÖPPIS SEHR WICHTIGS. SI SUECHE NI NUME MIT VIUNE MÖNSCHE AUS AKRIBISCH MIT METAUDEDEKTORE AB U ENTSCHÄRFE ODER SPRÄNGE D BOMBE. SI GÖ ID DÖRFER U KLÄRE DI IHHEIMISCHE ÜBER D GFAHRE UF. IMNE VIDEO HEISSTS ZUM BISPIU DASME NI UFEM BODE SÖU FÜRMACHE, SONDERN IMMER UF GRÖSSERE STEINE. SI GÄBE EMPFÄHLIGE FÜR BSTIMMIT TECHNIKE UM MIT DR SCHUFLÄ CHÖNNE IM BODE GRABE, ODER WASME BIM RIS SETZTE ODER ÄRNTE SÖU BEACHTE. MITTLERWILE SI DICHT BESIDLERETI ORTE ZIMLECH SICHER. ABER DIE GANZE LÄNDELCHE REGION MÜESSE HAUT OHNO ABGSUECHT WÄRDE.
IG HAS NO KRASS GFUNGE, DAS TROTZ AUEM GSCHICHTSUNGERRICHT WOMER IR JEMAUS IR SCHUEU HEI GA, DÄ TEU VOM CHRIEG NIE ERWÄHNT ISCH WORDE. ES NEUTRAUS LAND WIRD EIFACH FLÄCHEDECKENT ZERBOMBT. ISCH SEHR E SPANNENDE RUNDGANG GSI MUESI SÄGÄ.
NACH DERE GSCHICHTSLEKTION HEIMER DE E MASSAGE BRUCHT, SO SIMER E EISTÜNDIGI MASSAGE GO LA MACHE. VÖLLIG ENTSPANNT HEIMER SO NERE NO CHLI CHILLT, HEI HOSTEL GWÄCHSLET, SI UFE NACHTMÄRIT GO ZNACHTESSE U HEI NO CHLI GSCHOPPET.
IZE HEISST UME MAU SACHE PACKE, ES GEIT AB I NORDE, GNAUER GSEIT NACH NONG KHIAW. ES SCHINS ES WUNDERBAR CHLISES DÖRFLI AMNE SCHÖNE FLUSS, ES LOUFT NI VIU, NI VIU TOURISMUS, ABER MI CHA SCHÖNI WANDERIGE MACHE. I BI GSPANNT!
ETAPPE 03
NONG KHIAW
NONG KHIAW HET SCHO ZIMLECH VIU CHÖNNE. NACHERE SEHR ÄNGE BUSFAHRT SIMER I DEM ABGLÄGENE DÖRFLI AHCHO. IM BUS HEISI SO VIU LÜT INEGMOSTET, DASME HET MÜESSE STA 3.5 STUNG LANG, UF DERE KURVIGE U SEHR HOUPRIGE FAHRT. MIR HEI DE WOMER SI AHCHO ÖPPIS Z ESSE GSUECHT U SI IM HOSTEL AM FLUSS GSI U HEI CHLI BÄDLET I DERE WUNDERBARE UMGÄBIG. ES ISCH SEHR HÜGLIG HIE, DAHER ISCH D USSICHT MEGA SCHÖN. NO NIE HANI SONES GUETS ECHO GHÖRT WIE HIE, WEME ÖPPIS USESCHREIT GHÖRTMES SICHER NO 4 WITERI MAU.
MIR SI AUI RÄCHT KABUT GSI, DAHER SIMER CHLI FRÜECHER IS BETT. AM NÄCHSTE MORGE SIMER DE FRÜE UFGSTANGE U ABGLOFFE. ÜSES ZIU ISCH DR EINT VIEWPOINT GSI. ZUMGLÜCK HEIMER NI LENGER GSCHLAFE, WÜU SCHO SO ISCHES GNUE HEISS WORDE. D WANDERIG ISCH ZWAR NUME SO 2.5 STUNG GANGE, ABER WOW ISCH DAS STEIL GSI. VIUFACH HETME OH CHLI MÜESSE CHLÄTTERE. ES HET OH VIU BAMBUSLEITERE GHA. LÄCK HEIMER GSCHWITZT. DOBE AHCHO HEISECH DE DIE STRAPAZE USZAUT. D SICHT ISCH ZWAR CHLI BEITRÄCHTIGET GSI, DA SI HAUT AUI IHRI FÄUDER ABBRÖNNE US ÜBERAU MEGA VIU ROUCH HET. AH DAS MUESME SECH IM NORDE HAUT EIFACH GWÖHNE. GLICH ISCHES MEGA SCHÖN GSI. NACH ÖPPE 3 STUNG DERT OBE UF DR SPITZE HEIMER ÜS DE UME ABSTIG KÜMMERET. ISCH NO TRICKY GSI, ÜBER DIE FEUSE WIDR ABEZCHO. MIR SI DE ZIMELCH DIREKT IS HOSTEL. DERT HET ÜS DR FLUSS ERWARTET. SO HEIMER DR TAG AM FLUSS LA USKLINGE, HEI DE DUSCHET U NERE SIMER INES INDISCHES RESTAURANT GO ESSE.
HIE HETS MEGA SPASS GMACHT, U ES ISCH EIFACH EXTREM SCHÖN U RUHIG. MIR AUI HEI ÜS NERE GWÜNSCHT, DASMR LENGER DA OBE CHÖNNTE BLIBE. LEIDER HEIMER ABER SCHO DR ZUG BUECHET FÜR NACH VANG VIENG. SO SIMER DE AM NÖCHSTE TAG FRÜE UFE BUS, FÜR ZRÜGG NACH LUABG PRABANG. DER CHURZ E POUSE GMACHT, U SI DE ZUM BAHNHOF BRACHT WORDE. ES ISCH E SEHR MODERNI ZUGSTRECKI, WO CHINA MIT LAOS VRBINDET. CHINA HET DIE STRECKI I PAAR JAHR USEM NÜT UFBOUE, ISCH DOCH ZIMLECH IHDRÜCKLECH. VORAUEM SEHR MODERN. D FAHRT ISCH SEHR RUHIG GSI, OBWOUS MEGA VIU LÜT HET GHA. ISCH EXTREM GUET ORGANISIERT, DR PASS U Z TICKET WIRD SOGAR MEH KONTROLIERT AUS AM FLUGHAFE, SOGAR Z GEPÄCK DÜRSUECHE SI. D FAHRT RÄNDIERT DOCH ABER SEHR, MITEM BUS HÄTME 6 STUNG HOUPRIGI STRASSE, MITEM SCHNÄUZUG NUME 45 MINUTE. KRASS DAS FASCH DIE GANZI STRECKI IMNE TUNNU ISCH. NACH CHLI SCHLAFE IM ZUG SIMER DE IN VANG VIENG, DR BACKPACKER HOUPTSTADT VO LAOS AHCHO. MIR SI GSPANNT WAS HIE WIRD PASSIERE, SCHINS GITS VIU ZUM MACHE, ES CHA ABER OH GANZ WIUD WÄRDE HIE. MAU LUEGE WAS WIRD PASSIERE.
ETAPPE 04
VANG VIENG
VANG VIENG HET HAUT SCHO ÖPPIS. ES ISCH ES SCHÖNS DORF, UMGÄ VOMNÄ FLUSS U BÄRGÄ, MI CHA SEHR VIU UNGERNÄ U ES HET MEGA VIUBACKPACKERS. HIE AHCHO, HEIMER ÜSI SACHE IM HOSTEL DEPONIERT U HEI EICH NUR ÖPPIS WÖUE ESSE. DAS HEIMER DE GMACHT, MIR SI RECHT KABUTT GSI VOR REIS, HEI DAHER GSEIT MIR WÄRE NI I USGANG GA HINECH. PLÄN ÄNDERE SECH HIE ABER SEHR SCHNÄU NACH DE ERSTE BIER. MIR SI DE IH EINI VODE BEKANNTE BARS GANGE, WOS DE GUET BIER HET GÄ. KRASS SI D HAPPY MENUS VOR BAR. MI FINGT HIE I GWÜSSNE LOKAU AUS, OBWOUS ZIMLECH STRIKT VRBOTE ISCH. VO CANABIS, ÜBER OPIUM BIS ZU METH CHAME AUES CHOUFE. ISCH NO RECHT SCHOKIEREND, WASSECH GWÜSSI LÜT HIE AUS HINGERE DRÖHNE.
NACHERE LANGE NACHT MIT WOMER DOCH SEHR VIU LÜT, WOMER IRGENDWO UF DR REIS HEI TROFFE, HEI GSEH, SIMER DE SPÄT GO LIGE.
AM NÄCHSTE MORGE HEIMER DE SCOOTER GMIETET U SI HIE UFEM LAND CHLI UMHÄR GFAHRE. LETSTÄNDLECH SIMER BI EIRE VO SÄCHS LAGUNÄ AHGHAUTÄ U HEI HIE DR NAMI LA USKLINGE U CHLI BÄDLET. SPETR ISCHES DE ZRÜGG GANGE, HEI UNGERHAUB VO HEISSLUFTBALLÖN NO DR SUNNEUNGERGANG CHLI GNOSSE. NERE ISCH ZNACHT ESSE AHGSEIT GSI U AB IH USGANG. DASMAU ISCHES INE ANGERI BAR GANGE, MEGA GMÜETLECH MIT FÜR U AUEM, Z HAPPYMENU ISCH NO USPRÄGTER GSI AUS VORHÄR. HIE HANI ABER DE SCHNÄU GMERKT, DASES MIR LANGSAM Z VIU WIRD, HA DI LETSTE TÄG OH NI WAHNSINNIG VIU SCHLAF BECHO, DE BINI DU GO LIGÄ. SO HANI AM NÄCHSTE MORGE BI ZITÄ CHÖNNE UFSTA, DE SIMER LOSGFAHRE RICHTIG SÜDE. HEI MITEM SCOOTER NO CHLI D UMGÄBIG WÖUE ERKUNDE. DE SIMER ZUMNE SCHÖNE RISIGE SEE CHO MIT GANZ VIUNE LAGUNE U INSLE. DER HEIMER CHLI CHILLT U SI DE WIDR RICHTIG HOSTEL. AM EIS SIMER DE ABGHOUT WORDE ZUM TUBING. SO SIMER MITERE GROSSE GRUPPE VO LÜT WOMER ZEMEGSAMMLET UFE FLUSS. ZUR ERSTE BAR ISCHES NI WIT GSI, SI EUE DERT OH CHLI Z LANG BLIBE. VOR ERSTE ZUR ZWÖITE BAR ISCHES DE NÄRE 20 MIN GANGE. BIR ZWÖITE BAR HEIMER EUE OH WIDR CHLI Z VIU ZIT VRBRACHT, D SUNNE ISCH SCHO AM UNGERGA GSI WOMER DERT WIDR IS WASSER SI, BIS ZUM LETSTE HAUT ISCHES DE ABER NO 2 STUNG GANGE. SO ISCHES DOCH DE DUNKU WORDE, U VORAUEM CHAUT. ABER JA MIR HEIS ÜBERLEBT. NACH DERE TOUR HANI DRINGEND ÖPPIS ZESSE BRUCHT. BI DE NO MIT PAARNE CHLI INE BAR GO CHILLE, CHLI BILLIARD U CHARTESPILI SPILE. SO HEI MIR E GMÜETLECHE ABE GMACHT, WÄHREND ANGERI DIREKT HEI WITERGMACHT U IH USGANG SI, WAS SI IZE AUI AM NÄCHSTE TAG ZIMLECH BERÖIE. MIR GEITS ZUMGLÜCK GUET, IG MACHE HÜT NO E GMÜETLECHE TAG, LOUFE CHLI IM DORF DSUME USO. HÜT ISCH DR LETST TAG IN VANG VIENG, SOMIT DR ZWÖITLETST TAG IN LAOS. MORN GEITS DE WITER UF VIENTIENNE U NERE AM NÄCHSTE TAG UF VIETNAM. BISHER HETMI LAOS SEHR ÜBERZÜGT. WÜRD EIGENTLECH IZE GÄRN NO MEH ZIT HIE VRBRINGE, ABER MUES SEGE ES FÜEUT SECH OH GUET AH, IZE WITER Z GA. MINI PLÄN WÄRDE MI IZE EUE RICHTIG HANOI U NERE UF HOIAN TRIBE, U VO DERT NO PAAR WUCHE DE UF KAMBOTSCHA. I DENKE DAS DE NERE IRGENDWENN MAU GUET FÜR MI ISCH, UNI MINI HEIREIS WIRDE AHTRÄTTE. JEDOCH HANI NO PAAR ORTÄ UF MIRE LISTE WONI BIS DENN WETT BSUECHT HA. DAHER BLIBTS SPANNEND HIE.
ETAPPE 05
LAOS
LAOS ISCH UNBEDINGT E REIS WÄRT! ISCH ÄUÄ EIS VODE SCHÖNSTE, BESTÄ U COOLSTÄ BACKPACKLÄNDER GSI, WONI JEMAUS BI GSI. IG DÄNKE DASI WIDR MAU DAHERE WIRDE CHO, UM ME CHÖNNE Z GSEH. DR NORDE ISCH UNGLOUBLECH SCHÖN U BIETET SO VIU. ES ISCH NO SEHR URSPRÜNGLECH HIE. SEHR HOUPRIGI STRASSE, ABGSCHIDEHEIT U RUE PRÄGE DR AUTAG HIE. IG CHAS FÜR AUI SEHR EMPFÄHLE, NACH LAOS Z GHA. ES ISCH ES WUNDERBARS ABENTÜR!
AB UF VIETNAM IZE.