ETAPPE 01
D AHREIS
UND ES GEIT WIDR LOS. GAD Z BERN ABGFAHRE, FAHTS AHFA SCHNEIE. CHÖNNT DEMFAU NI E BESSERE ZITPUNKT VRWÜTST HA. WIDR HEISSTS AB ID WERMI, EIFACH DASMAU DR ZIT VORUS.
DR FLUG U AUS ISCH SUPPER GSI. HA ZWÖI FRÜNDLECHI AUTI THAI-GROSSIS NEBE DRANN GHA, MIT DENE HETMES SEHR LUSTIG GHA.
DR FLUG SÄUBER ISCH SOGAR NO E STUNG FRÜECHER AHCHO AUS PLANET. SO BINI AM 5 AM MORGE IN BANGKOK GLANDET. SCHO BIM DRÜBERFLÜGE ISCH KLAR GSI WIE GROSS DIE STADT WÜRK ISCH. DA CHA MEDELLIN U SO DE GAD IHPACKE.
HA MR DE MIS ZÜG ZEMEGSUECHT, BI NO GO GÄUD USELA U HAMER E MITFAHRGLÄGEHEIT GSUECHT FÜR ZUM HOSTEL. DIE FAHRT ISCH TROTZ WENI VRCHEHR U GUETE BREITE OUTOBAHNE ANGERHAUBSTUNG GANGE. HA DE CHÖNNE IHCHECKE U SOGAR BO CHLI DÖRFE GO SCHLAFE IZE BINI GSPANNT WAS HIE AUS SO WIRD PASSIERE.
ETAPPE 02
WIUDS BANGKOK
BANGKOK, GANZ ÖPPIS WIUDS. DIE ERSTE TÄG HANI EINERSITS CHLI MIT JETLAG USKURIERE VRBRACHT U DRZUE D STADT ERKUNDET. WIUD ISCHES NI NUME IM NACHTLÄBE, DÜRE TAG LÄBTS OH ZIMLECH HIE. ERSTI USFLÜG NACH CHINATOWN, ZUDE MÄRKT UF DE FLÜSS, ODER ZUM TRAINMARKET ZÜGE DRVO. ES PASSIERT SEHR VIU, AUS DÜRENANG, ES ISCH VRRUCKT.
SO HANI MR BANKGKOK VORGSTEUT, I MUES SÄGE, FÜR SONE GROSSI ASIATISCHI METROPOLE ISCHES DOCH E SEHENSWÄRTI STADT! SCHO NUR WEME DÜR DIE ÄNGE, VOUGSTOPFTE MARKTGASSES VO CHINATOWN LOUFT, WIRDME FASCH ÜBERFORDERET MIT GRÜCH, FARBE, MÖNSCHE, KRIMSKRAMS U TIER. UF SO SACHE HANI MI SO SEHR GFREUT, ISCH GANZ ANGERS AUS IN SÜDAMERIKA. Z BESTE AM GANZE ISCH ABER ÄUÄ Z ÄSSÄ. HUNGER HETME HIE SÄUTE, MI CHOUFT EIFACH AM NÄCHSTE STRASSESTANG WIDR FRÜEHLIGSROUE, ES PAT THAI, FRIED RICE ODER SCHÜSCH ÖPPIS GUETS. Z ÄSSE HIE ISCH HAUT EIFACH SCHO DR WAHNSINN! D VIUFAUT VODE GWÜRZ U DE SAUCENE MACHT AUS EIFACH MEGA GUET. E NUDUSUPPE MITEMNE EI ZUM Z MORGE, ZUM ZMITTAG GITS ES PAT THAI, AUSO THAI NUDLE MIT FLEISCH U SAUCE, U ZUM ZNACHT LOUFTME DÜRD STRASSE WO GFÜUT SI MIT ESSENSSTÄNG U SAMMLET ZEME MIT DE ANGERE TÄUERWIS DIVERSI KÖSTLECHKEITE U VRZEHRT DIE ZÄMÄ. SO MUESES EIFACH SI. NACH DE STRAPAZE VOM ZNACHTESSE, VODE USFLÜG ODER VOM UMELOUFE GITS AUBE SCHÄU E RÜGGE ODER FUESMASSAGE U DE ISCHME UME UFEM DAMM. AHSCHLISSEND GEITS IS WIUDE NACHTLÄBE VO BANGKOK. E LÄNGI STRASS, VOU MIT BARS U CLUBS. SO WIEMES HAUT SO KENNT VO ASIATISCHE GROSSSTÄDT. IRE GRUPPE ISCHES MEGA LUSTIG HIE. HAARSTRÄUBEND LUTI MUSIK, VIU LÜT, VIU BARS, VRCHOUFSSTÄNG MIT ESSE, SCHMUCK, SNACKS IWE SKORPIONE ODER SPINNELE, LACHGASBALÖN, MEGA VIU CANABISSTÄNG U ZIMLECH GUETI DRINKS, GÄBE GNUES AHLASS, D NACHT EIFACH DÜREZFIRE. BEVORS IS HOSTEL GEIT, GITS DE VILICH NOMAU E MASSAGE.
NACH SETTIGE NÄCHT NIMMTMES NORMALERWIS AUBE CHLI GMÜETLECH, ÜSES GRÜPPLI WOSECH BIUDET HET, HET ABER DOCH AUBE ES STRAFFS TAGESPROGRAMM DÜREZOGE. WIE SCHO ERWÄHNT ISCHES AH EIM TAG NACH CHINATOWN U ZU DIVERSNÄ TEMPLE GANGE, AM ANGERE SIMER ZU DENE BEIDNE MÄRKT. DR ZUG MARKT ISCH NISO SPEZIEU GSI, GLICH WIE IN HANOI ISCHES E MARKT WOSI AUES VRRUME WE DR ZUG CHUNNT. ABER DÄ ISCH NISO GROSS GSI. DR MARKT UFDE FLÜSS ISCH ABER NO COOL GSI, CHLI VIU STÄNG U BOOT MIT DE GLICHE SACHE, ABER HET GFÄGT DÜR DIE KANÄU Z FAHRE U SO D UMGÄBIG VO BANGKOK Z ERKUNDE.
AUS I AUEM HET BANGKOK DOCH MEGA SPASS GMACHT, ISCH ZWAR CHLI ERMÜEDENT GSI, U CHLI ES LUTS U SCHWIRIGS HOSTEL, ABER ES MEGA ERLÄBNISS. JEDOCH MUESI OH SEGE DASES HIE IR STADT DOCH NO RECHT TÜR ISCH, ÖMU IZE IM VRGLICH ZUDE LETSTE WUCHE. AB IZE WIRDS DE GÜNSTIGER. NÄCHSTI DESTINATION ISCH KRABI, IM SÜDE, AM MEER. I FREUE MI UF DIE SCHÖNE STRÄND. UNGERWEGS MIT ÖPPEREM WONI IM HOSTEL HA LEHRE KENNE SUECHE MR IZE DR WÄG DERT ABE. ES WIRD SUPER!
ETAPPE 03
KRABI
AM MORGE FRÜE AM 4RI ISCHES LOSGANGE. BANGKOK HEIMER GMÜETLECH MIT MASSAGE U GUETEM ESSE LA USKLINGE. IZE ISCH ENDLECH STRAND AHGSEIT. MITEM FLUGI ISCHES DE NACH PHUKET GANGE, U VOM FLUGHAFE US MITEM BUS 4 STUNG WITER NACH KRABI. ES ISCH ÜS EMPFOHLE WORDE, GSCHIDER DERT HERE Z GA, WÜUS WENIGER TOURISTISCH ISCH. WE DAS SO ISCH, DE FRAGI MI DOCH WIES DE IN PHUKET ISCH. HIE ISCH GANZ KLAR MASSETOURISMUS AHGSEIT. ABER FÜR PAAR TÄG SPILI DAS SPILI MIT. I MEINE Z MEER U D STRÄND U DIE INSLE, UMGÄ VO DENÄ KRASSE FEUSÄ WO USEM WASSER RAGE, CHÖI SCHO SEHR VIU. MIR SI DE GMÜETLECH IN KRABI AHCHO U SI DIREKT AH STRAND. NACHEMNE ZIMLECH LÄNGE BAD IM MEER HEIMER DE ES CHLISES PROGRAMM UFGSTEUT MIT SACHE WOMER DIE NÄCHSTE TÄG WEI MACHE. ROLLERMIETE, UMEDÜSE ZUMNE SEE U SU SCHÖNE STRÄND MIT WENI LÜT, INSUTOURÄ, NATIONAUPÄRK, ELEFANTE, AFFE, ESSE, AUS ISCH MÜGLECH. FÜRE ERST GANZ TAG HEIMER ÜS DE FÜRNE 4 INSLE TOUR ENTSCHIDE. SO ISCHES AM MORGE LOSGANGE. MITEM BOOT SIMER VOM FESTLAND ÖPPE E HAUBSTUNG DÜR BUCHTÄ GFAHRE BIS ZUM ERSTE STRAND UF ERE INSLE. WIE ERWARTET WIMMLETS NUME VO LÜT, SPEZIEU INDER U CHINESE SI OMNIPRÄSENT. ABER WEME DIE IGNORIERT, DE ISCHES DOCH EIFACH MEGA SCHÖN. WASMR NI SO PASST ISCH DR STRENG GSTAFFLET FAHRPLAN VO DERE TOUR. 40 MINUTE UF DERE INSLE, 30 MINUTE UF DR NÄCHSTE... MI HET EICH NISO ZIT GHA ZUM ENTSPANNE. GO SCHNORCHLE ISCHME OHNO, DASCH ABER BIS UFS GSTOCHE WÄRDE VORÄ QUAUÄ NI WAHNSINNIG SPEKTAKULÄR GSI. Z SCHLUSSFAZIT VOR TOUR ISCH, D FAHRT UFEM BOOT MIT DR USSICHT ISCH WAHNSINNIG. Z BADE ISCH OH SUPER, EIFACH ISCHMR Z MEER FASCH CHLI Z WARM.
DR RÄST ISCH EHER CHLI MASSEABFERTIGUNG GSI. ABER I DENKE, AH DAS MUESMESECH HIE EIFACH GWÖHNE. ISCH HAUT SO. GAD VORAUEM I DERE REGION. I MEINE, ES ZEICHE WO DRFÜR SPRICHT, DASES HIE HAUT EIFACH UFE FERIETOURISMUS USGLEIT ISCH, ISCH DASES NIDMAU EIS INZIGS REIN THAILÄNDISCHES RESTAURANT GIT. MC DONALDS, BURGERKING UND CO. SOWIE PIZZERIAS U AUS MÜGLECHE SI ABER IM ÜBERFLUSS VORHANDE..
WENI DE CHLI WITER ÖSTLECH RICHTIG KO SAMUI GHA CHÖNNTS DE HOFFI BESSER WERDE.
IZE BINI MAU GSPANNT UF DIE NÄCHSTE TÄG.
ETAPPE 04
PATONG BEACH
ÜSI PLÄN ÄNDERESECH ANDUREND HIE. LETSTENDLECH SIMER DE MITERE FÄHRE IN PHUKET GSTRANDET U SI NERE NACH PATONG BEACH CHAUFFIERT WORDE. DA D KOLLEGIN SECH NI SO GUET GFÜEUT HET UF KRABI HEIMER DER CHLI WENIGER AKTIVITÄTE GMACHT AUS PLANET. ISCH ABER DOCH GMÜETLECH GSI. HIE IN PATONG AHCHO SIMER ÜSES ZÜG IS HOSTEL GO DUE, U DE DIREKT MIT EIM, WO OH I ÜSEM ZIMMER ISCH, GO Z NACHTESSE. NACHEM ZNACHT HEIMER CHLI E RUHIGERI BAR GSUECH, E DRINKT GNO, U ÜSI NÄCHSTE TÄG VRSUECHE UFZGLEISE. AHSCHLIESSEND SIMER DE NO CHLI DPRD PARTY STRASS VO PATONG GLOFFE, ISCH NO VRRUCKTER AUS IN BANGKOK.
NÄCHSTE MORGE ISCHES DE MIT ROLLER LOS GANGE. MIR HEI ÜS FÜRNE STRAND TAG ENTSCHIDE. 3 ANGERI US ÜSEM HOSTEL HEI ÜS OHNO BEGLEITET. MIR HEI ÜS DE UFE WÄG GMACHT ZUM FREEDOM BEACH. EIGENTLECH WÄR DR PLAN GSI MEHRERI STRÄND ABZKLAPPERE, ABER I U D ANNA SI DE DOCH EIFACH A DEM STRAND BLIBE. DI ANGERE HEISECH GLI UFE WÄG GMACHT ZU ANGERNE SEHENSWÜRDIGKEITE. MIR HEIS GMÜETLECH GNO.
IRGENDWENN ISCH DE DR HIMU GRAU WORDE, DE HEIMER ÜSES ZÜG ZEMEPACKT U SI GAD WOS HET AHFA RÄGNÄ LOSGANGE. ROLLERFAHRE IM RÄGE, NACH STRAND, SSAUZWASSER U VIU SUNNE FÜEUT SECH DOCH SEHR GUET AH.
NACHERE GRÜNDLECHE DUSCHI HEIMER NACH DERE INTENSIVE SUNNE ES CHLISES SCHLÄFLI BRUCHT.
WOMER DE UME LÄBIG SI GSI, HEIMER ÜS UFE WEG GMACHT FÜRNES GUETS ZNACHT. MIR SI INES LOKAUS CHLISES RESTAURANT, WO IMMER MEGA VOU ISCH. NO SÄUTE I MIM LÄBE HANI SO FEIN GÄSSE. RIS MIT PIULET U FRITIERTEM PFEFFER U CHNOBLOUCH, DRZUE MEGA FEINS GMÜES. ES HET AUS CHÖNNE. GFÜEUT 3 KILO SCHWERER SIMER DE UME RICHTIG HOSTEL, MIR SI ZU KABUT GSI FÜR NO GO Z FIRE. ÄUÖ DOCH GAD CHLI Z VIU SUNNE GHA.
SOMIT NEIGT SECH Z REISE MIT DR KOLEGIN AM ÄNDI ZUE, SI GEIT MORN RICHTIG NORDE, MI TRIBTS I D RICHTIG KO SAMUI, AB UFD INSLE, AB GO TOUCHÄ.
ETAPPE 05
WIE WITER?
IRGENDWIE ISCHES DOCH SO VIU SCHWIRIGER MITEM BLOG HIE IN ASIE, US DEM GRUND HANI EUE IN VIETNAM OH KENE GSCHRIBE. MI ISCH KONSTANT UNGERWEGS MIT LÜT, OH WEME GNUE ZIT HÄT, WOME SECH UM SINI CHLINIKEIGE CHA KÜMMERE, MI FINGT ÖFFTERS E USRED FÜR ÖPPIS ANGERS Z MACHE, SIGS OH NUME GO E MEGA GUETE MANGOSMOOTHIE Z NÄ.
DIE FOUGENDE TÄG BINI UME MAU CHLI ALEI UNGERWEGS, WETT DIE ZIT CHLI NÜTZE, UM MR GEDANKE Z MACHE WOMI DI REIS SO CHÖNNT HEREFÜEHRE. DI ERSTI FRAG ISCH SCHONUME, OBI LENGER AUS DIE 30 TÄG VOM VISA IN THAILAND SÖU BLIBE, ODER OBI WITER SÖU RICHTIG LAOS.
MITLERWILE HANI DOCH RÄCHT VIU LÜT LEHRE KENNE, WO VIU SECH DIE GLICHE FRAGE STEUE. ES WÜRD AUSO DRNA USGSEH, DASI MIT PAARNE, WONI Z BANGKOK HA LEHRE KENNE, NACH LAOS WÜRD ZIE. D FRAG ISCH EIFACH OBI DE DAS WETT. I LAMER DAS AUS UF DE INSLE IDE KOMMENDE TÄG LA DÜRE CHOPF GA. E WITERI FRAG STEUT SECH WAS PASSIERT NACH LAOS, IN LAOS WIRDI SEHR WAHRSCHINDLECH EH NUR DR NORDE BEREISE, DA LÄNGT E WUCHE ODER ZWÖI.
E OPTION, WONI MR GUET CHA VORSTEUE, WOMER ABER KENI RUE LAHT, ISCH OBI WITER NACH VIETNAM SÖU. DR HA GIAN LOUP NOMAU GO MACHE, ALEI ODER IRE CHLINE GRUPPE. DAS WÄR ÄUÄ SCHO E SUPER SACH, PLUS NOMAU NACH HANOI, WITER NACH KAT BAH, U VILICH NOMAU IN HOIAN GO BAHN MIH ÄSSE, VILICH GITS JA DERT NO PAAR HEMLI. NERE WÜRDS VO DERT US DE WITER GA NACH KAMBOTSCHA. DAS SI AUS GEDANKESPILI WOSECH MOMENTAN I MIM CHOPF ABSPILE. FRAGE MI ABER CHLI OBS GLICH WÜRD WERDE WIE Z.B. IN COSTA RICA, WO Z ZWÖITE MAU WENIGER GUET ISCH GSI AUS Z ERSTE. MIR WERDES GSEH.
I MERKE ZUDEM, DAS SECH MIS REISEVRHAUTE IM VRGLICH ZU VORHÄRIGE REISE DOCH SEHR GÄNDERET HET, WEIS NI OBS DIE PAAR JAHR COVID SI GSI, OBS DOCH ES BIZLI Z ÄUTER WÄRD ISCH, FRAG MI NI. IG HA ABER LANG NÜMM DIE GLICHE BEDÜRFNISS WIE UF VORHÄRIGE REISE. WE ANGERI JEDE ABE I USGANG GÖ, CHANI TROSTLOS SEGE, DASI NI IMMER MUES MITGA. OH FÜR GWÜSSI AKTIVITÄTE BRUCHTS MI OH NI UNBEDINGT DRBI. VIUFACH WETTI OH AM NE ORT OH EIFACH CHLI SI U NID DI GANZ ZIT WITERZIE. VILICH LIGTS JA OH CHLI DRANN, DASI GAD HIE VIUFACH ZUDE ÄUTERE GHÖRE. ES HET DOCH SEHR VIU WO ZWÜSCHE 18 U 23 JÄHRIG SI.
ZURZIT HANI GAD CHLI MELANCHOLISCHI TÄG, WAS ZUM GLÜCK NI SCHLÄCHT ISCH. IG GLOUBE I BI IZE I DEM MINDSET AHCHO, WONI MR CHA AHFA GEDANKE MACHE, WIES WITER GEIT. VORAUEM WIES WITERGEIT NACH DR REIS, I WELI RICHTIG OH IMMER DAS WIRD SI. ES STEUE SECH DOCH IMMER ME FRAGE, SIGS SCHO NUME WIES WITER GEIT MIT DR WG.
IG GLOUBE UF DENE SCHÖNE INSLE, IMNE GMÜETLECHE HOSTEL, WÄG VOM TOURISTISCHE RUMMU, WIRDI DAS E CHLI CHÖNNE USSORTIERE.
DIE GANZE GEDANKE GHÖRE HAUT OH ZUM REISE. TROTZ DR GANZE FREIHEIT, Z MACHE WAS IMMER ME WETT, DUETS DOCH OH GUET SECH AH ÖPPISEM CHÖNNE Z HÄBE, WAS UF DERE GANZE REIS BISHER FÜR MI CHLI SCHWIRIG ISCH. ES ISCH Z ERSTE MAU WONI WÜRK KE RÜCKREIS MÜESST AHTRÄTTE U SO HAUT AUS OFFE ISCH.
SO MUESI MR DAS GANZE ZÜG SÄUBER SETZTE, WAS NI GANZ EIFACH ISCH, DAME HAUT NIE GANZ WEIS WAS EIM UF DR WITERE REIS WIRD ERWARTE. DAHER DENKI DASMR E GROBE FAHRPLAN FÜR DIE NÄCHSTI ZIT OH WIRD GUET DUE.
ETAPPE 06
OH DAS GHÖRT DRZUE
NACHERE LÄNGE REIS UF D INSLE KO SAMUI, BINI IM HOSTEL AHCHO. ES GSEHT SEHR EDU US, ISCH SEHR SUBER, ABER SCHO RÄCHT ES PARTYHOSTEL. D LÜT SI ABER SUPER WOME HIE SO TRIFFT. NUR LEIDER CHANIS NISO GNIESSE. I HAMER EUE IN PATONG E BÖSI MAGEVRSTIMMIG IHGFANGE, KONSTANTI, DOCH SEHR STARCHI MAGECHRÄMPF BESTIMME HIE GAD CHLI MI AUTAG. MIT HIUF VO MDEIKAMENT VRSUECHI DAS HIE IZE CHLI I GRIFF Z BECHO, ABER IZE GEITS DE SCHO WITER UF DIE NÄCHSTI INSLE, WO SEHR RUHIG SÖTT WÄRDE. DERT GEITS VORAUEM UMS TOUCHE. AB UF KO TAO!
ETAPPE 07
D FAHRT
AM MORGE GUET USGSCHLAFE, AM 12I US CHECKÄ U AM EIS BINI NERE ABGHOUT WORDE. AB UF KOH TAO. MITEMNE SCHNÄUBOOT ISCHES NÄRE UF D NACHBAR INSU GANGE. DERT HEIMER DE GWARTET UF Z NÖCHSTE BOOT FÜR UF KOH TAO. MIT ANGERHAUB STUNG VRSPÄTIG ISCH DE Z BOOT CHO. ISCH E GROSSE 3 STÖCKIGE KATAMARAN GSI.
Z SCHIFF ISCH VOMNE ANGERE HAFE VO KOH SAMUI CHO, DAHER HEISI ÜS NUME UFGLADE. WOMER UFS BOOT SI CHO, HETMI D STIMMIG DOCH CHLI KOMISCH DÜECHT. HET ZWAR VIU LÜT GHA, ABER AUI SI GANZ STIU GSI. PAARI HEI OH SEHR LÄÄR IR WÄUT UMHERGLUET, VIU SI CHRIDÄ WISS GSI. IZE HANI AHFA HOFFE, DASS DAS MIT MIRE MAGÄVRSTIMMIG GUET CHUNNT... IMMERHIN HANI NO SONE TABLETTE GNO, WO GÄGE SEECHRANKHEIT SÖU NÜTZE.
SO ISCHES DE LOS GANGE. BIM HAFE ISCHES NO GANZ RUHIG GSI, ABER NERE HET Z SCHIFF AHFA GAS GÄ WÄHREND D WÄUE IMMER GRÖSSER SI WORDE.
VOR CHURZEM HANI NO GLÄSE, DAS IZE ÜBER VRGANGNIS WUCHENEND E GROSSE STURM IM GOLF VO THAILAND ISCH GSI, US DAHER SEHR FEST WINDET U SEHR GROSSI WÄUE CHÖME.
ES ISCH WIE E ACHTERBAHNFAHRT GSI, ÖMU VOM GFÜEU HÄR. BI JEDERE WÄUE HETME SONES GFÜEU IM BUCH GSPÜRRT, WOME SCHÜSCH VORE ACHTEBAHN WES ABE GEIT ODER VOMNÄ FLUGZÜG KENNT. DAS GANZE WIRD IZE ANGERHAUB STUNG GA.
NACH ÖPPE 20 SETTIGNE MINUTE ISCH DE Z KONZERT LOSGANGE.. VO ÜBERAU HER HETS AHFA WÜRGE. MÖNSCHE SI UMHERTORKLET UFDR SUECHI NACH TÜTÄNE. D BOOTSCREW HET AHFA GHÜDERSECK VRTEILE U ISCH MIT SERVIETTE UMHÄRGRENNT.
ES PAAR REIHÄ WITER VOR HETS E MUETER MIT 2 CHING GHA. ZERSCH HETSECH Z BABY AHFA ÜBERGÄ, CHLI SPETER DR CHRIDÄWISS BUEB U PRAKTISCH GLICHZITIG SI OH. ES SI SEHR SCHWIRIGI ZUESTÄNG GSI. GOTTEFROH ISCH D REIS ABER NI NO LÄNGER GANGE. SO SIMER AUI DOCH DE NO "SICHER" AHCHO. I HAS ZUMGLÜCK OHNI UNGLÜCK ÜBERSTANGE. AB IS HOSTEL, U EIFACH FROH SI, WIDR LAND UNGER DE FÜESS Z HA, WO SECH NISO BEWEGT!
ETAPPE 08
KOH TAO
KOH TAO ISCH E REGURÄCHTI ENTSCHLEUNIGUNG GSI. DOE PAAR TÄG HANI SUBER GNÜTZT, UM MIM MAGE SINI RUE Z GÄ. EIGENTLECH HANI HIE WÖUE TOUCHÄ, ABER UNGER DENE UMSTÄNG LANI DAS LUEBER LASI, U GNIESSE D INSLE SCHÜSCH. SOBAUME 5 MINUTE USEM HOUPTORT USELOUFT WIRDS MWGA CHILIG, VIU CHLINI RESTAURANTS, BARS U CHLINI LÄDELI. DAS GANZE SÄUBSTVRSTÄNDLECH AM STRAND. VO AHFANG AH HANI MR GAD E ROLLER GMIETET U BI AHFAH UMECHESSLE UF DERE INSLE. MACHT MEGA SPASS. INNERHAUB VO 20 MINUTE FAHRT ME VOM EINTÄ ÄNDI AS ANGERE. IMMERWIDR FAHRT ME AH WUNDERBARE STEÄND U USSICHTSPÜNKT VRBI.
MI TAG HET IR REGU IRE CHLINE BÄKEREI AHGFNAGE, WOSI MEGA GUETS SURTEIGBROT MACHE. GUETS BROT ISCH E SEHR WIUKOMMENI ABWÄCHSLIG, MUES SEGE, DAS ISCH ÖPIIS VO DENE SACHE, WONI AM MEISTE VRMISSE DAHEIM. NERE ISCHES AUBE UFENE TOUR GANGE, IRGENDWOHERE UF DR INSLE. DERT WOSMR GFAUT, LIGI NERE CHLI AH STRAND U GNIESSES. IRGENDWENN BRUCHTS AUBE UME ÖPPIS Z ESSE, DE NIMI ES PAD THAI ODER CHLI FRIED RICE U GA NERE UME A STRAND. WAS BRUCHT ME ME, HÖCHSTENS ES MANGO SMOOTHIE, VILICH OH 2.
EI ABE BINI INES CHLISES RESTAURANT GHOCKET U HA MR ÖPPIS BSTEUT, WO PLÖTZLECH E FROU FRAGT OB SI DÄ STUEU CHÖNN NÄ U HOCKT MIT IHRNE LÜT AH TISCH NÄBE DRA. Z KOMISCHE ISCH GSI, DASI MI UF SCHWIZERDÜTSCH HET GFRAGT. UMSO VEBLÜFFTER KSCHSI DE GSI, DASI UF SCHWIZERDÜTSCH ANTWORT GIBE.
ES SI 3 LUSTIGI MÖNSCHE GSI. ÄR HOCKET IM ROUSTUEU, HET SCHINBAR MS U ISCH GANZ E GSPRÄCHIGE, HET UNGLOUBLECH VIU Z VRZEUE. DIE BEIDE ANGERE SI ZWÖI ÄUTERI FROUE, BEIDI RASTAS U LIEBE BOB MARLEY. AUI KENNE SECH VO SPIEZ. SI SIGE IN KOH TAO,DASI FLUCHTARTIG D INSLE NEBE DRANN HEIGE VRLA U ABWARTE, BISD FULLMOON PARTY DERT DÜRE ISCH. ES ISCH SCHONO KRASS. ZUR ZIT FINGTME ABSOLUT KES HOSTEL ME, U OH AUI HOTELS UF AUNE INSLE HIE SI ABSOLUT USBUECHET. DAS SIG JEDE MOMENT SO, WE DIE PARTY UME AHSTEIT.
IG HA DE DR GANZ ABE MIT IHNE BRICHTET, HEIS MEGA LUSTIG GHA. ISCH E NETTI ABWÄCHSLIG GSI, UME MAU MIT BÄRNER CHÖNNE Z REDE, VORAUEM SIS DOCH SEHR SPANNENDI LÜT GSI.
AM NÄCHSTE TAG BINI DE PER ZUEFAU NO ARE KOLEGIN VOR MITBEWOHNERIN ÜBERE WÄG GLOFFE, DE SIMER DE ZEME SCHÄU GO KÄFELE.
AUS I AUEM ISCH KO TAO SUPER CHILLIG GSI. GENAU DAS WONI GAD HA BRUCHT, CHLI ABSTANG VO AUEM, U EIFACH CHLI AM STRAND SI.
WITER GEITS NACH DENE INSUTÄG UF CHIANG MAI, IM NORDE VO THAILAND. IG HAMI ENTSCHIDE, NI AH DIE FULL MOON PARTY Z GA. SIGE EH ÜBERBEWÄRTET HEIMER VIU GSEIT. LIEBER BRUCHI DIE ZIT IM NORDE, GLOUNE DA GITS VIU ZUM GSEH. VO DERT US CHANI DE IRGENDWENN OH GÄBIG ÜBERD GRÄNZE FÜR NACH LAOS.
I BI GSPANNT
ETAPPE 09
CHIANG MAI
GANZ ÖPPIS NAGERS. NACH BANGKOK, VIU MEER U VIUNÄ INSLE ISCH DS DOCH E WIUKOMMENI ABWÄCHSLIG. IM VRGLICH ISCH CHIANG MAI DOCH E CHLINERI STADT, WOME ABER ENDLECH MAU Z FUESS ODER WES HÖCH CHUNNT MITEM ROLLER CHA ERKUNDE. IR MITI VOR STADT ISCH D AUTSTADT, WO QUADRATISCH ABTRENNT ISCH MITERE GROSSE STRASS U EMNE KANAU VOM RESTE VOR STADT. IR AUTSTADT GITS SEHR VIU CHLINI HÄRZIGI LÄDELI, RESTAURANTS U BARS. ES DUET SO GUET, ENDLECH WIDR SO CHÖNNE E STADT Z ERKUNDE, OHNI GENG ES TUC TUC ODER TAXI Z NÄ. SO HANI PRAKTISCH MINI ERSTE ANGERHAUB TÄG HIE VRBRACHT. NACH ANGERHAUB TÄG HETSECH DS HIE SCHO WIE DAHEI AHGFÜEUT, HA CHÖNNE UMELOUFE WIE UND WO IG WETT, HA IMMER OHNI CHARTE MINI WÄGE CHÖNNE FINGE. OHWEMER IRGENDWO IM STADTZENTRUM IM SUFF SI GSI.
AM 2TÄ GANZE TAG HETS E CHOCHKURS GÄ. DA SIMER CHLI USSERHAUB VOR STADT.
WO MR UFS GLÄND VOR SIAM GARDEN COOKING SCHOOL SI GFAHRÄ, HANI CHLI MÜESSE SCHMUNZLE, MERKWÜRDIGERWIS SI ÜBERAU NEBST THAI FAHNE OH SCHWIZER FAHNE UFGÄNKT GSI.
WIE SECH USEGSTEUT HET ISCCH DR BSITZER SCHWIZER, U HET MIT SIRÄ THAILÄNDISCHE FROU DIE SCHUEU UFGMACHT. SI ISCH SÄUBER CHÖCHIN, U HET OHSCHO IR SCHWIZ GSCHAFFET.
SO HEIMER ÜSI SACHE I ÄSSENSSAU DA U SI USE ID CHUCHI GANGE. GANZ VIU GASCHOCHHERDE SI DA NÄBENENANG UFGSTEUT GSI. ZERSCH ISCHS UMS "MISE EN PLACE" GANGE. DAS SIG SEHR WICHTIG IG THAI CHUCHI.
FÜRE AHFANG HEIMER D MISCHIG FÜR FRÜEHLIGSROUE GSCHNITTE U GMACHT U GLICHZITIG FÜR D GLASNUDUSUPPE. WO DAS GMACHT ISCH GSI, HEIMER D FRÜEHLIGSROUE GROUT U FRITIERT, U D SUPPENE GCHOCHET. SO SIMER Z ERSTE MAU VO ÜS SÄUBER VRWÖHNT WORDE. HA GSTUNET WIE GUET DASES ISCH CHO.
NACH DERÄ VORSPIS ISCHES DE I GARTE GANGE, WOMER D PFLANZE U D GMÜES FÜR ÜSI GRICHT HEI CHÖNNE GSE U GAD ERNTÄ. DE SIMER WIDR ID CHUCHI U HEI MIT DE SAUCENE U DE ZUETATE FÜRS PAD TAI AHGFANGE. NERE ISCHES DE ZUR CURRYPASTE FÜR MIS RED CURRY GANGE. IMMER UNGER DR STRÄNGE ÜBERWACHIG VOR CHOCHLEHRERIN. DIE HET EIM FASCH EIS UFD FINGER GHOUE, WESME ÖPPIS FAUSCH HET GMACHT. WO AUS ZWÄG ISCH GSI, HEIMER DE ZERSCH Z DESSERT AHFA MACHE. ES HET MANGPO STICKY RICE GÄ. ISCH WUNDERBAR FEINE, CHLÄBRIGÄ, SÜESSE, MIT KOKUSMIUCH UFKOCHETE RIS, MITERE SÜESSE WISSE SAUCE U ERE HAUBE MANGO. ISCH HIE DOCH GANZ KLAR MIS LIEBLINGS DESSERT. WO DAS NACHE ISCH GSI, HEIMER DE Z ZERSCH Z CURRY IRE PFANNE, U NERE Z PAD THAI IM WOK GMACHT. SONE GUETE WOK MIT GASCHOCHHER CHA EBE SCHO SEHR VIU. WEME DAS DAHEI DOCH OH HÄT.
WOMER DE HEI AHGFNAGE ESSE, ISCHMR DOCH KLAR WORDE, WIE VIU ESSE DAS ISCH WORDE.
NO NIE HANI SONES CURRY CHÖNNE CHOCHE, U PAD THAI U STICKY RICE CHANI OHNO DRZUE, DAS HETSECH GLOHNT. DIE GANZE REZÄPT FÜRD GRICHT U D PASTENE PLUS GANZ VIU ME DRZUE HEIMER OHNO BECHO. FREUE MI, DAS AUS DAHEI MAU NACHE Z CHOCHE!
NACH NACH DEM VILE ÄSSE HANI DE NO MÜESSE MIS HOSTEL WÄCHSLE, U HA NERE AM POOL VOM NEUE HOSTEL CHLI CHÖNNE VRDOUE.
AM NÄCHSTE TAG HEISECH DE D WÄGE VO MIR U DR KOLEGIN, WONI IM SÜDE MITÄRÄ BI GREIST WIDR KRÜTZT. SI SI GAND AHCHO U HEISECH OH AM POOL BI MIM HOSTEL USGLÖIÄT. SO ISCH DAS GANZ E ENTSPANNTE U SUNNEVRWÖHNTÄ TAG WORDE.
AM ABE BINI DE INES ANGERS HOSTEL ES BIER GO NÄ. ZGANZE HOSTEL DERT ISCH NERE INE CABARET SHOW GANGE U NERE I USGANG. DA HANI NI CHÖNNE NEI SÄGÄ, ES HEISST HAUT, DASME MINDISTENS EINI MUES GSE HA.
ISCH DOCH SEHR E LUSTIGE U WIUDÄ ABE WORDE.
MIT EMNÄ SCHWED WONI IM USGANG HA LEHRE KENNE BINI DE AM NÄCHSTE TAG IH "GRAND CANYON" GANGE. DAS SI SO KÜNSTLECHI GFLUETETI SCHLUCHTE, WO SI E WASSERPARK HEI UFBOUE. ENDLECH WIDR MAU ES CHING SI. ES SI UNGLOUBLECH VIU, SO HÜPFBURGÄHNLECHI UFBlASBARI HINDERNISS GSI, WOME HET MÜESSE PASSIERE. ÜBERAU MUESME UME UFECHLÄTERE U WIDR ABE RÜTSCHE ODER GUMPE. AM BESTE MACHTMES AUS WETTKAMPF, WER SCHNEUER ISCH. ES ISCH SO LUSTIG GSI UN SEHR VIU AHSTRÄNGENDER AUS ERWARTET, DR EINT ODER ANGER BLAU FLÄCKE HETS DE OHNO GÄ.
DR ABE HANI DE GANZ ENTSPANNT LA USKLINGE U HAS CHLI IM HOSTEL GNOSSE. ISCH DOCH ES SEHR GUETS HOSTEL, MIT RISIGE, BEQUEMÄ BETT IMNE SCHLAFSAU, U JEDES CHAME ABSOLUT DICHT MITEMNE VORHANG ZUEDUE. GIT DOCH SEHR VIU ME PRIVATSPHÄRE.
SOMIT CHUNNT MIS NÄCHSTE KAPITU. AB UF PAI. SO WIE AUI SCHWÄRME MUES DAS SUPER WÄRDE. MUES ABER SCHINS CHLI GASGÄ. EINERSITS LOUFT MIS VISUM ÄUÄ GLI US, U SI FÖ DERT IR GÄNGEND I PAAR TÄG AHFA D FÄUDER ABBRÖNNE. D LUFTQUALITÄT WIRD MISERABU U GSEH WIRDME OH NÜMM. SO PASST DAS JA ABER NO GUET ZEME. AHSCHLIESSEND GEITS DE NO UF CHIANG RAI U VO DERT DE ÜBERD GRÄNZE UF LAOS. SO GEIT ES WITERS KAPITU SCHO GLI WIDR Z ÄND. WASI BIS IZE ÖMU CHA SEGE. ZÄSSE CHA SEHR SEHR VIU!
ETAPPE 10
PAI
PAI. ÄUÄ EINE VO MINE LIEBSTE ORTE IN THAILAND. CHLI WITER IDE BERGE LIGT DIE GÄGEND. DÜRE TAG ZWAR AUBE SEHR HEISS, WIRDS IR NACHT DOCH SO CHAUT, DASI NIMAU GNUE CHLIEDER DRBI HA. ES ISCH EIFACH SONE UNGLOUBLECH GMÜETLECHI GÄGEND, ZWAR CHLI TROCHÄ ABER EGAU. Z BESTE DRANN ISCH DR FLUSS. ER ISCH NI WAHNSINNIG GROSS, HET OH NI AUZUVIU WASSER, ABER LÄNGT GAD DASME GMÜETLECH CHA DRILIGE. NÄBÄ SUNNETANKE U BADE CHAME OH GANZ VIU WITERI SACHE MACHE. AH EIM TAG BINI I CANYON CHLI GO WANDERE. ISCH NO SPEZIEU WIE HEFTIG ZUMTEU DIE KRETÄNE SI, WOME DRUF MUES UMEBALANCIERE. MI ISCH DOCH BI DERÄ HITZ NO RECHT LANG UNGERWEGS FÜR DRI ABE. Z LUSTIGE ISCH JA ABER, DASES DOBE VIU SCHÖNER U SPEZIEUER ISCH, UNGERNACHE ISCHME EIFACH IMNE WAUD, WO WIE ÜSI WÄUDER USGSEHT.
MI ERINNERTET DÄ ORT CHLI AH PALOMINO IN KOLUMBIE ODER SANTA TERESA IN COSTA RICA. GOLUBE DIE MEISTE LÄNDER I DENE BACKPACKER DESTINATIONE HEI SONE ORT. ES ISCH E ORT WO AUS EIFACH MEGA GMÜETLECH GNO WIRD, MEISTENS SIS OH CHLINERI ORTE. HIE MUESME FASCH MITEM ROLLER UMEFAHRE, NI NUME WEGE DE HÜGLE WOME CHA GO ERKUNDE, SONDERN WÜS FASCH KEINI TAXIS ODER SO HET. GENAU GLICH WIE OH IN PALOMINO ODER SANTA TERESA TRIFFTME HIE DIE REISENDE WO SCHO MEHRERI WUCHE ODER GAR MONATE HIE VRBRACHT HEI. VRSTAHSE SCHO, ABER FÜR DAS WÄR MER DÄ ORT Z CHLI. HIE UNGER DE IHHEIMISCHE ABER OH DE REISENDE SEITME, DAS DIE IM PAI-HOLE (LOCH) SI BLIBE STECKE. ES SI HAUT OH ORTE WOS NI WAHNSINNIG SCHWIRIG ISCH AH JENSTI DROGE Z CHO. IM GÄGETEU, Z BESTE U Z MEISTE BECHUNSCH DREKT IM HOSTEL. VO DEM MERKTME MUESI SEGE HIE OH RÄCHT VIU, VORAUEM WAS DR PIUZ U OPIUM KONSUM AHBELANGT. GAD IDE HOSTEL ISCHES AUBE CHLI KOMISCH, MI WETT GONES BIER NÄ U FAHT AHFA MIT LÜT REDE U MI TSCHEGGT SO GAR NÜT WAS DIE REDE, DA VIU MÖSCHE SECH HIE EIFACH ZUEDRÖHNE. GAD HAUT OH WÜUS SEHR GÜNSTIG ISCH U SCHINS DOCH SEHR GUETI QUALITÄT HEIG. DRZUE ISCH DR CANABISKONSUM ISCH LEGAU IN THAILAND, MI CHAS OH I JEDEM KAFI ODER BAR CHOUFE.
HIE HANI MI CHLI ZRÜGG IS KOH TAO FEELING VRSETZT. AM MORGE GMÜETLECH UFGSTANGE, NERE MAU INES CHLISES KAFI FRIDLECH GO ZMÖRGELE. Z OBLIGATE SMOOTHIE DARF NI FÄHLE, HIE VORZUGSWIS MIT MANGO, DASI EIFACH SO WAHNSINNIG GUET SI. NERE HETS DE MEISTENS E ROLLERTOUR GÄ IRGENDWO HERE. WOSMR DE AUBE Z HEISS ISCH WORDE, BINI AH FLUSS GO LIGE U BADE. SO GEGE SUNNEUNGERGANG ZUE BINI DE AUBE IS HOSTEL ZRÜGG GLOFFE U HAS DERT CHLI IR HÄNGEMATTE CHILLT. IRGENDWENN ISCH DE DUSCHE AHGSEIT GSI U NERE AB IS STÄDLI, BI EIM VODE UNZÄHLIGE STREETFOODSTÄNG ESSE GO HOLE, DAS GNIESSE U NERE INE BAR ES PAAR BIER GO NÄ.
MI CHÖNNT MEGA VIU SO GFÜEHRTI TOURE HIE MACHE, ABER HA DIE CHLI GSE. ISCH LETSTENDLECH AUS GENG CHLI Z GLICHE U CHOSTET AUBE GUET GÄUD FÜR DASES NÄRE SO ABFERTIGUNG ISCH. LIEBER FAHRI WIE HIE EBE ZUM CANYON SÄUBER U LUEGES SÄUBER AH.
JEDOCH EI TOUR HANI LUST. ES ISCH UME MAU TUBING AHGSEIT. MITERE GROSSE TRUPPE SIMER AH FLUSS GFAHRE, NERT UFD RINGE GSTIGE U LOS TRIBE. ISCH ZIMLECH ANGERS GSI AUS NO IN KOLUMBIE, DR FLUSS HET CHUM WASSER, MI ISCH UNGLOUBLECH LANGSAM U MIT LAHTSECH OH NI WAHNSINNIG WIT LA TRIBE. WAS ABER UNGERWEGS ANGERS ISCH GSI, ISCH DASME AM NE ORT DE USE GEIT, U DERT HETS E DJ U BAR U SO. SO GITS DERT AM FLUSS NERE FÜR PAAR STUNG E GUETE CHLINE RAVE. DS HET DOCH UME MAU GFÄGT, HETMI OH CHLI AD SCHWIZ ERINNERET.
SITEM TUBING BINI IZE UME UNGERWEGS MIT DR ANNA, WONI Z BANGKOK HA LEHRE KENNE. ZEME SUECHE MR ÜS IZE E WÄG RICHTIG CHIANG RAI U NÄRÄ NO WITER ÜBERE MEKONG NACH LAOS. WENN AUS NACH PLAN LOUFT, SIMER ABEM 18. FEBRUAR DE IN LAOS. SO WIRDI MI GEBURI IN LAOS CHÖNNE FIRE. CHÖNNT GUET WÄRDE. BI ABER GSPANNT OB DE AUS SO CHUNNT WIE MR ÜS DAS VORSTEUE. SOMIT HEI DIE LETSTE TÄG THAILAND DEFINITIV AHGFANGE.
ETAPPE 11
CHIANG RAI
ES ISCH SO WIT, DIE LETSTI ETTAPPE VO THAILAND ISCH AHBROCHE. MITEM BUS GUET IN CHIANG RAI ACHO, SIMER DE MIT ÜSNE SIBÄ SACHE ZUM HOSTEL GLOFFE. HÜT STÖ VORAUEM NO SACHE UFEM PLAN, WOMER MÜESSE ERLEDIGE VOREM GRÄNZÜBERTRITT. DAS HEISST GNUE SNACKS FÜRD REIS CHOUFE, GNUE GÄUD USELA FÜRE GRÄNZÜBERTRITT U VORAUEM NO ES LETSTS MAU Z THAI ESSE GNIESSE. NACHERE NUDUSUPPÄ SIMER DE DAS AUES GSTÄRCHT AHGANGE. SCHLUSSENDLECH HEIMER DE AM NAMI FÜRIG ZIT GHA FÜR NO CHLI IM HOSTEL Z FULÄNZE. AM ABE SIMER DE MIT ÖPPEREM VOM HOSTEL NO UFE NACHTBAZAR GANGE, WOS MEGA VIU DIVERSI ESSENSSTÄNG HET. SO HEIMER ÜS NOMAU CHLI DÜR DIE THAILÄNDISCHI CHUCHI DÜREPROBIERT U SI DE MIT EMNE VOUE MAGE ZRÜGG IS HOSTEL.
NACHERE ERHOUSAME NACHT IMNE DOCH SEHR BEQUEME BETT SIMER DE RECHT FRÜE UFGSTANGE, HEI ÖPPIS ZMORGE GÄSSE U ÜSES ZÜG PARAT GMACHT. NACHEM USCHECKÄ IM HOSTEL HEIMER D RUCKSÄCK DERT GLA U SI NO ID STADT. AM 12I WÄRDE MR ABGHOUT, DAS HEISST ES HET NO GNUE ZIT, UM NO ÖPPIS Z UNGERNÄ. I BI DE MITEM BUS CHLI USSERHAUB VOD STADT GFAHRE U HAMER DR WIS TÄMPU NO AHGLUEGT.
DÄ WIS TÄMPU ISCH SEHR IMPOSANT. KRASS WIE VRSCHNÖRKLET DÄ ISCH. ÄR GSEHT MEGA COOL US, FRAGE MI ABER DOCH CHLI NACHEM SINN VO DEM TÄMPU. CHUNNT EIM MEH VOR WIENE TOURISTÄMAGNET. IG GLOUBE UF DR GANZE THAILAND REIS ISCH DAS DR MEIST TOURISTISCH ORT GSI, WONI BSUECHT HA. KRASS WIE HIE EIFACH, VORAUEM D CHINESE, MITEM CAR AHCHÖME, I EIM STRESS DÜR Z ZÜG STOGLÄ U WIRD GÖ. VREINZELNT GSEHTME LÜT, WO DAHERE CHÖME ZUM BÄTÄ, ABER I STEUE MR Z BÄTÄ, UMGÄ VO RISIGE GRUPPE VO TOURISTE, EHER WENIGER SINNLECH VOR. TROTZDEM MUESME GLOUB WEME MAU HIE ISCH DÄ TÄMPU GSEH HA.
NACH DERÄ BESICHTIGUNG BINI DE ZRÜGG ZUM HOSTEL, HA ÖPPIS GÄSSE U HEI NÄRE UF ÜSI MITFAHRGLÄGEHEIT ZUR GRÄNZE GWARTET. WIE DI GANZI REIS ISCH GANGE, WIRDI IR ERSTÄ ETAPPA VO LAOS SCHRIBE.
THAILAND ISCH E COOLI ZIT GSI. ES ISCH IM GRUNDSATZ ES WUNDERSCHÖNS LAND, MIT EXTREM HÖFLECHE U FRÜNDELCHE IHHEIMISCHE. NI Z VRGÄSSE SI NATÜRLECH DIE GANZE KÖSTLECHKEITE, WOMESECH HIE CHA LA VRWÖHNE. DR SÜDE MIT AUNE INSLE U EM WUNDERBARE MEER ISCH MEGA SCHÖN, DOCH HAUT EIFACH KRASS TOURISTISCH. DR NORDE CHUNNT EIM ZUMGLÜCK NERE WENIGER TOURISTISCH VOR IM VRGLICH. MI MERKT GUET, WIE STARCH THAILAND UFE TOURISMUS USGLEIT ISCH. DIE GANZI INFRASTRUKTUR, STRASSE, BUSSE, RESTAURANTS U AUES LOUFT FASCH PERFEKT, MI HET CHUM PROBLEM. ES FUNKTIONIERT EIFACH AUS. JEDOCH MERKTME GAD VORAUEM IM SÜDE, WIE DR TOURISMUS DÄM LAND OH CHA SCHADE. DR GANZ PARTYTOURISMUS U HAUT DÄ MASSETOURISMUS HEI D THAI KULTUR PRAKTISCH LA VRSCHWINDE. ES ERINNERET ZUMTEU ME AH ORTE IN EUROPA. I GLOUBE THAILAND ISCH DOCH E REIS WÄRT. ES ISCH SEHR ERHOUSAM U DOCH HAUT EIFACH MEGA SCHÖN HIE GSI.
DOCH IZE BINI GSPANNT WIE LAOS WIRD. IG CHAMER VORSTEUE, DASS DAS ZIMLECH ABENTÜRLECH CHÖNNT WÄRDE!